بېپولې خبریالان: طالبان دې افغان توکمی فرانسوی خبریال مرتضی بهبودي خوشی کړي
د عکس سرچینه، Reporters Without Borders (RSF)
د بې پولې خبریالانو سازمان او ۱۵ فرانسوي رسنیو په افغانستان کې د طالبانو له حکومته غوښتي چې افغان توکمی فرانسوی خبریال مرتضی بهبودي ژر خوشی کړي.
دغهّ سازمان ادعا کړې چې ښاغلی بهبودي یوه میاشت وړاندې په کابل کې د جاسوسۍ په تور د طالبانو له خوا نیول شوی دی.
طالبانو لا په دې اړه څه نه دي ویلي.
د بې پولې خبریالانو سازمان او ۱۵ نورو فرانسوي خبري رسنیو او شرکتونو چې مرتضی بهبودي له ځینو سره کار کړی و د خبرپاڼې په خپرولو د ده پر ژر خوشې کېدلو ټینګار کړی دی.
په خبرپاڼې کې راغلي چې ۲۸ کلن مرتضی دوه وروسته تر دې چې افغانستان ته رسېدلی و او د فوتو ژورنالست په توګه د رسمي کار اجازه پاڼې ته په تمه و، په کابل کې نیول شوی او تر اوسه بندی دی.
د بې پولې خبریالانو سازمان وايي موږ په تېرو ۳۰ ورځو کې غلي وو او د ده د خلاصون هڅه مو کوله، خو اوس غواړو نړۍ خبره کړو چې دغه خبریال یو میاشت وړاندې پلازمېنه کابل کې نیول شوی دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
دغه سازمان ادعا کوي چې ښاغلی بهبودي د جاسوسۍ په تور نیول شوی دی خو دا یې نه دي ویلي چې د طالبانو حکومت کوم چارواکي یا ادارې دا تور لګولی دی.
بي بي سي هڅه وکړه په دې اړه د طالبانو حکومت له اړوندو څانګو معلومات ترلاسه کړي، خو لږترلږه د کورنیو چارو وزارت وویل چې دغه خبریال د دوی په توقیف کې نه دی.
مرتضی بهبودي چې فرانسوي تابعیت هم لري کلونه وړاندې له هېواده وتلی و او په فرانسه کې یې ژورنالستیک کار کاوه.
د رسنیو ملاتړ ځینې سازمانونه په افغانستان کې پر رسنیو محدودیتونو او له خبریالانو سره د طالبانو حکومت چلند ته اندېښمنه ښيي، خو طالبان وایي چې شرېعت په چوکاټ کې د رسنیو آزادۍ ته ژمن دي.
