تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د جمهوري غوښتونکو لومړنۍ ټاکنې؛ نیکي هیلي د امریکا په پلازمېنه کې ټرمپ ته ماتې ورکړه
نیکي هیلي چې د جمهوري غوښتونکو ګوند په لومړنیو ټاکنو کې د ډونالډ ټرمپ یوازینۍ پاتې سیاله ده، توانېدلې، د امریکا په پلازمېنه واشنګټن ډي سي کې د ګوند رایې وګټي او په لومړي ځل ډونالډ ټرمپ ته ماته ورکړي.
خو د دواړو نوماندانو د رایو توپیر دومره ستر دی چې د جمهوري غوښتونکي ګوند د نوماندۍ سیالۍ په ګټلو کې، د ښاغلي ټرمپ وروستۍ بریا کره ښکاري.
د یکشنبې په ورځ د امریکا په پلازمینې کې جمهوري غوښتونکو د خپل ګوند په ټاکنو کې ګډون وکړ او په پایله کې نیکي هیلي د ډونالډ ټرمپ د ۳۳ سلنې پر وړاندې ۶۳ سلنه رایو په ګټلو سره وکولای شول، د دې ښار او سیمې ټول ۱۹ ټاکنیزې استازولۍ خپلې کړي.
د پلازمینې په رایو سره، په ملګرو ملتونو کې د امریکا پخوانۍ سفیره نیکي هیلي اوس ۴۳ ټاکنیزې نمایندګۍ لري، چې د ښاغلي ټرمپ له خوا د ګټل شویو ۲۴۷ ټاکنیزو استازولیو پرتله ډېرې لږ دي.
اغلې هیلي د امریکا د جمهوري غوښتونکو ګوند په تاریخ کې لومړنۍ ښځه شوه چې په پلازمینه کې د ګوند لومړنۍ سیالۍ یې وګټلې.
ډونالډ ټرمپ تر دې دمه ټولې ایالتي ټاکنې ګټلي دي او تمه کیږي چې سبا سه شنبې، د مارچ په پنځمه په ډېری ایالتونو کې ټاکنې ترسره شي او له همدې امله د "سترې سه شنبې" نوم ورکول شوی دی او اټکل دی چې مېرمن هیلي ته بیا ماتې ورکړي او مطلقې بریا ته به د هغه نژدې کېدل " رسمي" کړي.
وړاندې تر دې نیکي هیلي په نیواډا ایالت کې د جمهوري غوښتونکو په لومړنیو ټاکنو کې له سختې ماتې سره مخ شوې وه، سره له دې چې د رایو په ورکولو کې د ډونالډ ټرمپ موجود هم نه و.