د پوهنتون دهلېز کې جرم؛ کارمن د ملګرې له وژلو وروسته ځان هم وژلی
د عکس سرچینه، Social Media
د مصر قاهرې پوهنتون د یوه پوهنځي یو کارمن وروسته تر هغه خپل ځان وژلی چې یوې ملګرې نجلۍ ور سره د واده موافقه نه ده کړې او هغه یې وژلې ده.
ځوان د قاهرې پوهنتون په انګړ کې – هلته چې ده کار هم پکې کاوه- پر خپلې ملګرې د وسلې ماشه کش کړې ده.
د مصر د کورنیو چارو وزارت د پنجشنبې په ورځ په یوه بیان کې ویلي وو، تورن له جرم وروسته تښتېدلی دی خو کله یې چې چارواکو د هېواد په شمال لوېدیځ مطروح ولایت کې څرک ولګاوه، تورن ځوان د نیول کېدو پرمهال په هماغه وسله ځان هم وژلی چې خپله ملګرې یې پرې وژلې وه.
د وژل شوې نجلۍ کورنۍ په یوه تلوېزیوني مرکه کې ویلي، تورن ځوان څلور کاله مخکې له نجلۍ سره د کوزدې وړاندیز کړی و، خو وړاندیز یې رد شوی و.
د نجلۍ د پلار په خبره، له څو کالو راهیسې تورن کس پرله پسې نجلۍ ځوروله ان تر دې چې د هغې ګاډي ته یې اور واچاوه، د نجلۍ کورنۍ اړه شوه چې د هغه پرضد قضیه ثبت کړي، چې له کبله یې د یو کال زندان سزا ورکړل شوه.
د قرباني شوې نجلۍ کورنۍ وايي، تورن کس له جرم دوه ورځې وړاندې نجلۍ ته په لیکلو پیغامونو لکې ځوروونکې خبرې استولې وې.
تورن کس د احمد. ح په نامه یاد شوی چې ۳۵ کلن و او د قاهرې پوهنتون د ماشوم پالنې پوهنځي د ځوانانو د پالنې برخه کې یې د یوه متخصص په توګه کار کاوه او د خبري رپوټونو له مخې د ناسمې رویې له کبله له کاره شړل شوی و.
۲۸ کلنه نجلۍ نورهان حسین نومېده او د همدې پوهنتون د اثارو پوهنځي کارمنه وه.
احمد نجلۍ ته د کوزدې وړاندیز کړی و او هغې رد کړ. د قتل دا پېښه د پوهنتون په لومړي یوه دهلېز کې شوې ده.
په مصر کې عمومي څارنوالۍ نن د مړینې د رپوټ له چمتو کولو وروسته د جسد د خښولو اجازه ورکړه.
په مصر کې وروستیو کې وړاندې هم ورته پېښې شوې دي. د تېر کال جولای میاشت کې په مصر کې محکمې یو ځوان وروسته تر هغه په اعدام محکوم کړ چې خپله پوهنتوني ملګرې یې وژلې وه.
د تورن ۲۲ کلن محمد عادل محاکمه دوه ورځې روانه وه، چې په لوی لاس د خپلې پوهنتوني ملګرې نیرة اشرف په وژنې پړ وبلل شو.
هغه د محاکمې پرمهال پر خپل جرم اعتراف هم کړی و.
د عکس سرچینه، SOCIAL MEDIA
مصر کې وروسته تر هغه وېره خپره شوه چې یاد تورن کس تېر کال په چړه خپله ملګرې نیره اشرف حلاله کړه. هغې له ده سره د واده وړاندیز رد کړی و. دا پېښه د مصر المنصوره پوهنتون له انګړ بهر شوې وه.
په المنصوره ښار کې هغې جنايي محکمې چې د عادل قضیه کې یې پرېکړه کړې وه، د مصر له پارلمان غوښتي وو چې د اعدام د سزا قانون بدل کړي او د اعدام پلی کېدلو ته پر تلوېزیون په ژوندۍ بڼه د خپرېدو اجازه ورکړي.
په مصر کې د قتل سزا لږ تر لږه اعدامېدل دي. په ۲۰۲۱ کال کې د بښنې نړیوال سازمان مصر په نړۍ کې دویم ډېر اعداموونکی هېواد بللی و.
خو ډېر کم په دې هېواد کې اعدامونه په علني توګه کېږي. په ۱۹۹۸ کال د مصر حکومتي تلوېزیون په یوه کمپېښه خپرونه کې د یوې ښځې او د هغې د دوو ماشومانو د وژنې په تور په اعدام محکومو کسانو د علني او ژوندۍ بڼه د اعدامېدو صحنه خپره کړه.
ښځه او لوڼې یې قاهره کې پخپل کور کې وژل شوې وې.
د ۲۰۲۲ کال په جون میاشت کې د تلوېزیوني خبریالې شیماء جمال وژلو مصر کې تاوده بحثونه راوپارول.
