د باميانو ۴۰ زده کوونکې مسمومې شوي

د افغانستان د مرکزي ولايت باميانو ځايي چارواکي وايي چې د دغه ولايت د پنجاب ولسوالۍ د نجونو په ليسه کې شاوخوا ۴۰ نجونې مسمومې شوې دي.

دوی وايي چې د دغه مسموميت لامل تر دې مهاله روښانه نه دي، خو يو روغتيايي پلاوى يې څيړي.

چارواکي وايي کومې نجونې چې د بې هوښۍ له کبله سيمه ييز روغتون ته رسول شوي درملنه يې شوې او بيرته خپلو کورونو ته ستنې شوې دي.

د دوی په خبره په لومړۍ ورځ د شاوخوا لسو نجونو پر روغتيا ناوړه اغيز شوى و خو وروسته دا شميره شاوخوا ۴۰ نجونو ته ورسيده.

دوی وايي په چټکۍ سره د دغې شمېرې لوړېدو له سيمه ييزو چارواکو او د پنجاب ولسوالۍ د ليسې د نجونو له کورنيو سره ژورې انديښنې پيدا کړې.

د باميانو والۍ حبيبې سرابي بي بي سي ته وويل چې تر دې مهاله د دغې روغتيايي ستونزې ريښتونى لامل نه دى په ډاگه شوى، خو وايي د ځينو راپورونو له مخه دغه نجونې مسمومې شوې دي.

د باميانو د سيمه ييزو چارواکو په وينا ځينې مسمومې شوې نجونې د بې هوښۍ په حالت کې د پنجاب ولسوالۍ روغتون ته رسول شوي چې تر درملنې وروسته ښې شوي او خپلو کورونو ته تللي دي.

چارواکي وايي چې د باميانو روغتيايي پلاوى او د ولايتي بيا رغاونې ډلې پر دې بوختې دي چې د دغه مسموميت لامل او علت بيامومي.

تير کال هم د افغانستان په پلازمينه کابل او او ځينو نورو ولايتونو کې هم د نجونو د ليسو نجونې مسمومې شوې وې.

هغه مهال د افغانستان روغتيايي چارواکو ويلي وو چې ددغې مسمومتيا د لاملونو په اړه پلټنې کوي، خو د دغو پلټنو پايلو تر اوسه رسنيو ته لاره ونه کړه.