د افغانستان بانک د خپلو کنګل شویو شتمنیو په اړه د امریکا حکومت پرېکړه 'د نه منلو وړ' وبلله
د عکس سرچینه، DAB
د افغانستان بانک د امریکا حکومت هغه پرېکړه "د نه منلو وړ" بللې چې پر بنسټ به یې امریکا کې د افغانستان له کنګل شویو شتمنیو درې نیم میلیارد ډالر د "افغان فنډ" په نوم یوه نوي جوړ شوي صندوق ته سپارل کېږي.
د افغانستان بانک په دې اړه د امریکا د بهرنیو چارو وزارت د اعلان په غبرګون کې په یوه خبرپاڼه کې ویلي چې، "د افغانستان بانک د اسعارو زېرمې د افغانانو ملکیت دی" او "په نا اړوندو برخو کې د دغو زېرمو کارول او لېږد ورته د منلو نه دی."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د یادولو ده چې د امریکا حکومت چارشنبه اعلان وکړ چې د سویس له حکومت او یو شمېر افغان اقتصاد پوهانو سره یې په ګډه دا نوی فنډ یا صندوق جوړ کړی دی، چې د سویس د (بي ای ایس) بانک سره به بانکي حساب ولری.
د امریکا حکومت ویلي، په دې صندوق کې ساتل شوې شتمني به د عامو افغانانو د خیر ښېګڼې او د افغان دولت د نړیوالو پورونو هوارولو لپاره لګول کېږي، خو د طالبانو حکومت به ورته مخامخ لاسرسی ونلري.
"امریکا دې پرخپله پرېکړه بیا کتنه وکړي"
د عکس سرچینه، Getty Images
خو د افغانستان مرکزي بانک له امریکا غوښتي چې پر خپلې دې پرېکړې بېرته له سره غور وکړي ځکه چې په خبره یې، د دغه بانک اسعار او زېرمې د "پولي ثبات، د ملي سیسټم د پیاوړتیا او له نړۍ سره د سوداګرۍ د اسانتیا په موخه کارول کېږي."
د دې تر څنګ د افغانستان بانک په دې خبرپاڼه کې پر امریکا غږ کړی چې د دغه هېواد پر "اسعارو او زېرمو لګېدلي محدودیتونه په بشپړه توګه لرې کړي او په دې برخه کې د ټاکل شویو موخو د تر لاسه کولو لپاره له زېرمو څخه د اغېزناکې استفادې هڅې پيل کړي."
د امریکا د بهرنیو چارو وزارت وایي، په راتلونکي کې به د افغانستان هغه شتمنۍ هم دغه صندوق ته لېږدول کېږي چې له امریکا بهر نورو هېوادونو کې کنګل شوې دي.
د دې شتمنۍ د لګولو واک به له یوې 'تضمین کوونکې شورا' سره وي چې د امریکا او سویس حکومتونو یو یو استازی او همدا راز دوه افغان اقتصادي کارپوهان پکې شامل دي.
بي بي سي ته مالومه شوې چې د دې شورا له افغان غړیو یې یو د سوداګرۍ پخوانی وزیر انور الحق احدي او بل د افغانستان بانک د بورډ پخوانی غړی شاه محمد محرابي دی.
دا په داسې حال کې ده چې واک ته له رسېدو راهیسې په افغانستان کې د طالبانو حکومت په وار وار په ټينګار سره له امریکا او نړیوالو غوښتي چې د افغانستان ټولې کنګل شوې شتمنۍ ازادې او دغه بانک ته وسپارل شي.
خو د امریکا حکومت استدلال کوي چې د افغانستان بانک دا مهال د طالبانو له سیاسي نفوذه ازاد نه دی او د مالي چارو د تنظیم مسلکي وړتیا هم نه لري، نو ځکه دوی پرې اعتبار نشي کولی.
یاده دې وي چې د افغانستان بانک نږدې ۷ میلیارده ډالر دا مهال د امریکا په بانکونو کې ساتل کېږي.
