د امریکا سفارت: د کورونا له کبله کابل کې د ویزو خدمات سر له ننه ودرول شول
د عکس سرچینه، US Embassy Kabul
په کابل کې د امریکا سفارت ویلي، په افغانستان کې د کورونا وېروس په ډېرېدو یې په دې هېواد کې د وېزې ورکولو هر ډول خدمتونه درولي.
خو دې پرېکړې هغه افغانان اندېښمن کړي چې له امریکایانو سره یې کار کړی او دا وېره لري چې د امریکايي ځواکونو تر وتلو وروسته به دوی امریکا ته پر کډوال کېدو ونه توانېږي.
د امریکا د سفارت اعلامیه کې له افغانستان سره د کورونا وبا خلاف مبارزه کې د ۱۶ میلیون ډالرو مرسته هم یاده شوې. اعلامیه دا هم وايي یو ایس ایډ د کورونا له اړخه د افغانستان ۵ سختو ځپل شویو ښارونو کې د کورونا شدید پېښو ته د رسېدو لپاره د روغتیاپالونکو په روزنه ۳ اعشاریه ۷ میلیون ډالر لګوي.
د امریکا سفارت په یوه خبرپاڼه کې ویلي، په کابل کې د وېزې نامحدود ځنډول له یکشنبې ورځې (جوزا/غبرګولی ۲۳) پیلېږي.
دا پرېکړه داسې مهال نیول شوې چې په ټول افغانستان کې د کورونا وبا درېیمه څپه په چټکۍ روانه ده او په دې هېواد کې محدودیتونه لا پسې ډېر شول.
د امریکايي (سټارز اېنډ سټرایپس) ورځپاڼې د معلوماتو له مخې، د کورونا وېروس درېیمې څپې پیل کې افغانستان کې د امریکا د سفارت یو کارمن هم د کوویډ-۱۹ له کبله مړ شوی دی.
تېر کال د کورونا وبا له پیل راهیسې افغانستان کې تر ۳۴۰۰ ډېر کسان د دغه وېروس له کبله مړه شوي دي.
د امریکا د سفارت په خبرپاڼه کې راغلي: "موږ د متقاضیانو اندېښنه درک کوو او بخښنه غواړو، خو ددې پرېکړې هدف د سفارت د کارمنانو او متقاضیانو ساتنه ده، چې ډاډمن شو راتلونکي کې د وېزو صادرولو بهیر او نور کونسولي خدمتونو ته دوام ورکړو".
دغه سفارت ویلي، هغه کسان چې په راتلونکو ورځو کې یې د وېزې لپاره د ملاقات وخت درلود، د وېزې د بېرته پیلېدو بهیر سره به لومړی د دوی کارونه مخته وړل کېږي.
لا تر اوسه سفارت د وېزو د بېرته ورکولو د بهیر پیلېدو نېټه نه ده مشخصه کړې.
د امریکا د لویو درستیزانو کمېټې روانه اونۍ ویلي وو،چې له افغانستانه د امریکايي ځواکونو او تجهیزاتو ایستلو بهیر ۵۰ سلنه بشپړ شوی دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
په تېره اپرېل میاشت کې د امریکا ولسمشر جو بایډن وویل، چې د روان کال تر سپتمبر میاشتې به ټول امریکايي ځواکونه له افغانستانه ووځي.
خو امریکايي چارواکو او ناټو ویلي وو ښايي ددغو ځواکونو ایستل تر جولای میاشتې پورې بشپړ شي.
د امریکايي ځواکونو له وتلو سره هممهاله، د امریکا بهرنیو چارو وزارت افغانانو ته د کډوالۍ د ۱۸ زره خانګړو وېزو لړۍ پیل کړې ده، چې تېر کال دا بهیر د کورونا وبا له کبله درول شوی و.
د کډوالۍ د ځانګړو وېزو پروګرام یا (SIV) له لارې هغو افغانانو ته د امریکا وېزې ورکول کېږي چې د امریکا له دولت سره یې کار کړی او له خپلو کورنیو سره امریکا ته د کډوالۍ اجازه ورکول کېږي.
