امریکا: افغان حکومت او طالبان دې د سولې خبرې چټکې کړي؛ کابل د مرستو د دوام د ډاډ مننه وکړه
د عکس سرچینه، Dr Abdullah
واشنګټن د افغانستان له دولتي مشرانو او طالبانو وغوښتل چې د سولې پروسه چټکه کړي. د امریکا د بهرنیو چارو وزارت مرستیالې ویاندې جالینا پورټر پرون (جمعه د جون ۴مه) یوې خبري ناستې ته ویلي د افغانستان حکومت او طالبان باید د یوه جامع او دایمي اوربند پر سر هوکړې ته د رسېدو او دغه هېواد کې له ۴۰ کلونو د اوږدې جګړې پای ته رسولو لپاره د سولې مذاکرات چټک کړي.
امریکا داسې مهال د افغان سولې د پروسې د چټکېدو غوښتنه کوي، چې د افغان دولت د مرکچي ټیم غړي طالبانو سره سولې خبرو د دوام لپاره دوحې ته تللي دي.
له دې سره له قطره رپوټونه وايي د افغان حکومت او طالبانو پلاوي سره تماس کې دي خو تر اوسه رسمي ناستې لا نه دي شوي.
د افغان حکومت او طالبانو ترمنځ خبرې ټکنۍ پر مخ ځي او دواړه خواوې یو بل خبرو ته په کمه لیوالتیا تورونوي.
د امریکا بهرنیو چارو زوارت په ورته وخت کې له افغانستان سره بشردوستانه برخو کې د ۲۶۶ میلیون ډالرو اضافه مرسته هم اعلان کړې ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د امریکا بهرنیو چارو وزیر انتوني بلېنکن پر خپل ټویټر لیکلي: "متحدو ایالتونو له کلونو راهیسې د افغان راستنېدونکو، کډوالو او بېځایه شویو ملاتړ ته لومړیتوب ورکړی دی. د امریکا لخوا د ۲۶۶ میلیون ډالرو نوې بشردوستانه مرسته د افغانستان د سوله ییز او باثباته راتلونکې او د دغه هېواد له خلکو سره ژموږ د ژمنتیا پخه بېلګه ده."
متحدو ایالتونو څو ورځې وړاندې هم افغانستان سره د ۳۰۰ میلیون ډالر مرسته اعلان کړې وه.
اغلې پورټر ویلي چې دغو مرستو سره به له ۲۰۰۲ کال افغانستان سره دامریکا د ټولو بشردوستانه مرستو کچه ۳ اعشاریه نهه میلیارد ډالرو ته ورسېږي.
د دغو مرستو لویه برخه به له بې ځایه شویو، راستنو شویو او بې وزله کورنیو سره په مرسته ولګېږي.
د امریکا بهرنیو چارو وزارت وایي د ځواکونو تر ایستلو وروسته هم افغانستان سره مرستو ته دوام ورکوي.
د افغان حکومت غبرګون
د افغانستان بهرنیو چار وزارت د امریکا لخوا دغه هېواد سره د دغو نویو بشردوستانه مرستو د اعلان او راتلونکې کې د ملاتړ د دوام د ډاډ مننه کړې ده.
د دغه وزارت ویاند ګران هېواد بي بي سي ته ویلي: "د مرستو دا اعلان د دې ښکارندوی دی چې د غوڅ ملاتړ ماموریت د پوځونو تر وتلو وروسته هم افغانستان سره د متحدو ایالتونو ملاتړ دوام لري."
پر دې سربېره د افغانستان د ملي مصالحې عالي شورا رئیس عبدالله عبدالله هم پر خپل ټویټر لیکلي چې د افغانستان له حکومت او خلکو سره د امریکا د دوامداره ملګرتیا مننه کوي.
