تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
خوست کې د والیبال سیالۍ؛ هره ورځ سلګونه ننداره چیان ورټولېږي
د افغانستان په خوست ولایت کې د روژې له لومړۍ اوونۍ راهیسې د والیبال سیالۍ پيل شوي چې هره ورځ له روژه ماتي وروسته سلګونه ننداره چیان یې لېدو ته ورځي.
په خوست کې د طالبانو ځايي چارواکي وايي، دغه تورنمنټ کې شاوخوا ۳۵ لوبډلو برخه اخیستې، چې په دریو ډلو وېشل شوي دي.
د والیبال په دغو سیالیو کې، هر شپه دوه لوبې کېږي، چې څلور لوبډلې په کې برخه اخلي.
د والیبال د ځايي چارواکو په وینا، د والیبال دغو سیالو ته له کابل او پښتونخوا هم ځینې لوبډلې وربلل شوې دي.
د دغو لوبو یو ننداره کوونکی نسیم نور وایي: "له څو شپو راهیسې پرله پسې د تراویح له لمانځه وروسته د لګڼو سیمې ته راځوو او د لوبو ننداره کوو. د لوبو ننداره د امن په فضا کې ډېر خوند کوي."
خوست کې نژدې هر کال د والیبال ورته سیالۍ کېږي، چې له بېلا بېلو ولایتونو لوبډلې او مینه وال ورځي.
د طالبانو امنیتي چارواکي وايي، د دغو لوبو لپاره یې امنیت هم ټینګ کړی دی.
له خوست پرته د لغمان، بغلان، کندزو او کابل په ګډون د افغانستان په ډېرو سیمو کې د والیبال مینه وال شته او پیاوړې ملي لوبډله هم لري.
د افغانستان والیبال ملي لوبډلې د روان کال د فیبرورۍ په وروستیو کې د نشنل کپ سیالیو په لړ کې مالدیف ته درې - صفر ماتې ورکړې وه.
د نشنل کپ سیالۍ د مالدیف په کوربتوب د څلورو هېوادونو افغانستان، مالدیف، مالیزیا او سینګاپور ترمنځ وې چې افغانستان په کې ښه وځلېد.