कोभिड नेपालः थप १,३८८ मा कोरोना भाइरस सङ्क्रमण, २४ जनाको मृत्यु

नेपालमा थप १,३८८ जनामा कोरोनाभाइरस सङ्क्रमण पुष्टि भएको र २४ जनाको कोभिड-१९ का कारणले मृत्यु भएको स्वास्थ्य तथा जनसङ्ख्या मन्त्रालयले जनाएको छ।

यससँगै नेपालमा सङ्क्रमितको कुल सङ्ख्या आठ लाख ४२ हजार नाघेको छ भने मृतकको सङ्ख्या १०,७१४ पुगेको छ।

आइतवार अपराह्ण सार्वजनिक तथ्याङ्कअनुसार १०,२९७ जनाको परीक्षण गर्दा त्यति सङ्ख्यामा सङ्क्रमण पुष्टि भएको हो।

तीमध्ये ३,०३८ जनाको परीक्षण एन्टिजन विधिबाट र अरूको पीसीआर विधिबाट गरिएको हो।

अहिले कुल परीक्षणको १९.५ प्रतिशतमा सङ्क्रमण देखिएको मन्त्रायलको तथ्याङ्कले देखाउँछ।

मन्त्रालयका अनुसार गत २४ घण्टाको अवधिमा २,२६० जना सङ्क्रमणमुक्त भएका छन्।

कहाँ छन् सङ्क्रमित?

हाल ३,०५२ जना संस्थागत आइसोलेशनमा भएको मन्त्रालयले जनाएको छ।

अस्पतालमा उपचार गराइरहेकामध्ये ६२५ जना सघन उपचार कक्ष आईसीयूमा र १६७ जना भेन्टिलेटरमा छन्।

विगत २४ घण्टामा सबैभन्दा बढी काठमाण्डू जिल्लामा ३१२ सङ्क्रमित भेटिएका हुन्।

नेपालभरि २० जिल्लामा ५०० भन्दा बढी सक्रिय सङ्क्रमित छन् भने थप १९ जिल्लामा २०० देखि ४९९ सक्रिय सङ्क्रमित रहेका मन्त्रालयको तथ्याङ्क छ।

५०० भन्दा बढी सक्रिय सङ्क्रमित कहाँ धेरै?

५०० भन्दा बढी सक्रिय सङ्क्रमित भएका जिल्लाहरूको सङ्ख्या वाग्मती प्रदेशमा उच्च छ।

उक्त प्रदेशका काठमाण्डू, भक्तपुर, ललितपुर, चितवन, मकवानपुर, काभ्रेपलान्चोक, सिन्धुपालचोक र नुवाकोट जिल्लामा सङ्क्रमितहरूको सङ्ख्या ५०० भन्दा बढी छ।

गण्डकी प्रदेशको नवलपरासी पूर्व, कास्की,बागलुङ, गोरखा, स्याङ्जा र तनहुँमा ५०० भन्दा बढी सक्रिय सङ्क्रमित छन्।

प्रदेश १ का मोरङ, सुनसरी र झापाको अवस्था पनि त्यस्तै छ।

लुम्बिनी प्रदेशका दुई जिल्ला दाङ र रूपन्देहीमा ५०० भन्दा बढी सक्रिय सङ्क्रमित छन् भने कर्णाली प्रदेशको सुर्खेतमा पनि सङ्ख्या ५०० माथि छ।

कतिले लगाए खोप

अहिलेसम्म पूर्ण मात्रामा खोप लगाउनेहरूको सङ्ख्या ४० लाख ५२ हजार नाघेको मन्त्रालयले जनाएको छ।

प्राविधिक समस्याका कारण पछिल्लो २४ घण्टामा खोप दिइएकाहरूको अद्यावधिक तथ्याङ्क आइतवार समावेश गर्न नसकिएको मन्त्रालयले जनाएको छ।

कोभिशील्ड, भेरो सेल र जोनसन एन्ड जोनसन खोप मात्र नेपाल आएका छन्।

जोनसन एन्ड जोनसन खोप एक मात्रा मात्र लगाए पुग्छ भने कोभिशील्डको र भेरो सेलको दुई मात्रा लगाउनुपर्छ।

कोभिड भएर अस्पताल जानुपर्ने भए के गर्ने

कोभिड-१९ भएका बिरामीले अस्पताल जानुपर्ने भए वा शय्या आवश्यक परे यी नम्बरमा सम्पर्क गर्न स्वास्थ्य मन्त्रालयले सुझाव दिएको छ -

११३३

९८५१२५५८३९

९८५१२५५८३७

एम्बुलेन्स सेवाको लागि -

१०२

यी नम्बरहरू चौबीसै घण्टा खुल्ला रहने बताइएको छ।