लाइभ, रसुवामा भीषण बाढी, कम्तीमा १७ जनाको शव फेला परेको पुष्टि
रसुवामा बिहान स्थानीय भोटेकोशी नदीमा अचानक ठूलो बाढी आएपछि ठूलो क्षति पुगेको अधिकारीहरूले बताएका छन्।
सारांश
रसुवामा बुधवार बिहान आएको बाढीका कारण धनजनको ठूलो क्षति पुगेको आशङ्का, ५० जनाभन्दा बढीको ज्यान गइसकेको प्रधानमन्त्रीको भनाइ
त्रिशूली नदीको तटीय क्षेत्रमा चितवनसम्म नै खतरा हुन सक्ने भन्दै सतर्कता अपनाउन सरकारको अनुरोध
बाढीबाट पृथ्वी राजमार्ग, गल्छी-नुवाकोट-रसुवा स्याफ्रुबेँसी सडक, मुग्लिङ-नारायणगढ सडकमा यात्रा नगर्न र नगराउन सरकारद्वारा आग्रह
क्षतिबारे विस्तृत विवरण आउन बाँकी
लाइभ कभरेज
भोटेकोशी बाढीबाट ५० जनाभन्दा बढीले ज्यान गुमाएको प्रधानमन्त्रीको भनाइ
तस्बिर स्रोत, EPA
प्रधानमन्त्री वालेन्द्र शाह 'बालेन'ले बुधवार बिहान भोटेकोशी नदीमा आएको बाढीबाट हालसम्म ५० भन्दा बढी नेपालीहरूको मृत्यु भइसकेको बताएका छन्।
आफ्नो भेरिफाइड फेसबुक पेजमा उनले लेखेका छन्, "बाढीका कारण हालसम्म ५० भन्दा बढी हाम्रा प्रिय नागरिकहरूले ज्यान गुमाइसकेको दुःखद खबर प्राप्त भएको छ।"
उनले बाढीबाट भएको भौतिक र मानवीय क्षतिले सिङ्गो देश नै स्तब्ध र मर्माहत भएको बताएका छन्।
"यो दुःखद खबर पाउनासाथ सरकारले ढिला नगरी आफ्ना सम्पूर्ण शक्ति र संयन्त्रहरूलाई हजारौँको सङ्ख्यामा उद्धार कार्यमा परिचालन गरेको छ," बालेनले लेखेका छन्, "बाढी प्रभावित क्षेत्रमा नागरिकहरूको ज्यान जोगाउन र खोजतलास गर्न नेपाली सेना, सशस्त्र प्रहरी बल र नेपाल प्रहरीका टोलीहरूलाई तत्कालै मैदानमा उतारिएको छ।"
नेपाल-चीन सीमामा किन दोहोरिरहन्छन् विनाशकारी बाढीपहिरो
नेपाल–चीन सीमावर्ती हिमाली क्षेत्रको भौगोलिक बनोट, हिमतालहरूको स्थितिमा भइरहने परिवर्तन तथा वर्षायाममा हुने भारी वर्षाका कारण उक्त क्षेत्रमा आकस्मिक विपद्का घटना दोहोरिने गरेका विज्ञहरूले बताएका छन्।
बुधवार बिहान रसुवाको भोटेकोशी/त्रिशूली नदीमा आएको भीषण बाढीका कारण रसुवा, नुवाकोट, धादिङ, गोरखा र चितवनलगायतका जिल्ला प्रभावित भएका छन्।
तीब्बती क्षेत्रमा थुप्रै हिमताल रहेका र नेपालतर्फका भिरालो भूभागतर्फ थुप्रै बस्तीहरू हुनाले हिमताल विस्फोटन र हिमपहिरोबाट हुने दुवै प्रकृतिका क्षति उक्त क्षेत्रले बेलाबखत बेहोर्ने गरेको छ।
नेपाल पर्यटन बोर्डले सार्वजनिक
गरेको पछिल्लो विवरण अनुसार आज विहानको बाढीमा परि हालसम्म सम्पर्क विहीन
रहेकाहरूको सङ्ख्या ४०३ रहेको छ। त्यसमा ६२ जना नेपाली र अन्य ३४१ जना विदेशी नागरिकहरू
रहेको जनाइएको छ। ती मध्ये २०० जना महिला र २०३ जना पुरुष रहेका छन्।
सम्पर्कविहीन विदेशीहरूमा १३३ जना
भारतका, ४७ जना अमेरिकाका र ३३ जना ब्रिटेनका गरि विभिन्न २६ देशका रहेका बुझिएको छ।
ती अधिकांश मानसरोवर यात्रा गर्ने क्रममा रहेका यात्रुहरू रहेको टुर अपरेटर्सहरूलाई उद्धृत गर्दै बोर्डले जनाएको थियो।
उद्धार र राहतकार्यलाई प्रभावकारी बनाउन पूर्वराजाको अपील
तस्बिर स्रोत, RSS
पूर्वराजा ज्ञानेन्द्र शाहले रसुवा जिल्लाको भोटेकोशी बाढीमा आएको क्षतिका कारण आफूलाई दुःखित बनाएको बताएका छन्।
देशबासीका नाममा सन्देश जारी गर्दै शाहले सुरक्षाकर्मीसहित बेपत्ता भएका नागरिकहरूको खोजी कार्यलाई तीव्रता दिन आवश्यक रहेको उल्लेख गरेका छन्।
“प्राकृतिक विपत्तिको यस दुःखद घडीमा खोजी, उद्धार, राहत तथा उपचारका कार्यमा कुनै कमी हुन नदिन सम्बन्धित सबै निकायलाई आग्रह गर्दछौँ। साथै, सरकार, सुरक्षा निकाय, राष्ट्रसेवक, स्थानीय तह, सामाजिक सङ्घ-संस्था तथा आम नागरिक सबैले आ-आफ्नो क्षेत्रबाट सक्दो सहयोग गर्दै विपत्तिमा परेकाहरूको उद्धार तथा राहत कार्यलाई प्रभावकारी बनाउन एकजुट हुन हामी आग्रह गर्दछौँ,” पूर्वराजाको विज्ञप्तिमा भनिएको छ।
पूर्वराजा शाहले छिमेकी समेत देशलाई प्रत्यक्ष प्रभाव पार्ने विपद्मा त्रिदेशीय प्रयास उचित हुने सुझाव समेत दिएका छन्।
बाढीपछि ११४ जनाको हवाई उद्धार
रसुवास्थित भोटेकोशी
नदीमा बुधवार बिहान भीषण बाढी आएलगत्तै नेपाली सेना र निजी कम्पनीका हेलिकप्टरहरूले ११४ जनाको उद्धार गरेको प्रधानमन्त्रीको सचिवालयले जनाएको छ।
नेपाली सेनाले विभिन्न
उडानमार्फत् ८५ जनाको र निजी क्षेत्रका विभिन्न हेलिकप्टर कम्पनीले २९ जनाको
उद्धार गरेका हुन्।
सचिवालयका अनुसार नेपाली
सेनाले रसुवाको टिमुरेबाट ६० जनालाई धुन्चे, टिमुरेबाट १३ जनालाई त्रिशूली अनि मैलुङबाट ५ जना, बेत्रावतीमा ४ जना र त्रिशूलीबाट ३ जनालाई उद्धार गरेर काठमाण्डू लगेको छ।
निजी क्षेत्रअन्तर्गत
कैलास हेलिकप्टरले रसुवाबाट महाराजगन्जस्थित टीचिङ अस्पतालमा
५ घाइतेलाई, सिम्रिकले रसुवाबाट ३ जना र अन्नपूर्ण हेलीले
रसुवाबाट चार जनालाई टीचिङ अस्पतालमा ल्याएको छ।
प्रभु हेलिकप्टरले
रसुवाबाट टीचिङ अस्पतालमा ५ जना, सिम्रिकले रसुवाबाट टीचिङ अस्पतालमा २ जना, फिशटेलले रसुवाबाट टीचिङ अस्पतालमा ५ जना, एभरेस्टले रसुवाबाट टीचिङ अस्पतालमा २ जना र प्रभु हेलीले रसुवाबाट वीर
अस्पतालमा २ जनालाई उद्धार गरेर ल्याएको सचिवालयले जनाएको छ।
‘नेपाललाई सम्भावित सबै मानवीय सहायता उपलब्ध गराउन भारत तयार’
भारतका प्रधानमन्त्री नरेन्द्र
मोदीले नेपालमा भीषण बाढीका कारण मानिसहरूको ज्यान गएकोप्रति समवेदना व्यक्त गरेका
छन्।
बाढीका विषयमा नेपालका प्रधानमन्त्री वालेन्द्र शाहसँग कुरा गरेको जनाउ दिँदै मोदीले यो कठिन समयमा
भारतका नागरिकहरू नेपालका दाजुभाइसँगै रहेको बताएका छन्।
“नेपाललाई सम्भावित
सबै मानवीय सहायता उपलब्ध गराउनका लागि भारत तयार छ। उद्धार तथा राहत कार्यमा हाम्रा
टोलीहरू नजिक रहेर समन्वय गरिरहेका छन्,”
मोदीले सामाजिक सञ्जालमार्फत् भनेका छन्।
तिब्बतमा 'हिमचट्टान पहिरो'का कारण नेपालमा बाढी
तस्बिर स्रोत, RSS
राष्ट्रिय विपद् जोखिम न्यूनीकरण तथा जोखिम व्यवस्थापन प्राधिकरणले रसुवास्थित भोटेकोशी नदीमा आएको बाढीको कारण तिब्बततर्फ गएको 'हिमचट्टान पहिरो' भएको उल्लेख गरेको छ।
प्राधिकरणले स्याटलाइट तस्बिरको विश्लेषणका आधारमा गरिएको प्रारम्भिक अध्ययनले नेपाल-चीन रसुवागढी नाकाबाट करिब २० किलोमिटर उत्तरपूर्वबाट बाढी सुरु भएको देखिएको उल्लेख गरेको छ।
"नेपाल-चीन सिमानामा गएको हिमचट्टान पहिरोका कारण ल्हेन्दे खोलामा गेग्य्रानसहितको बाढी आएको र टिमुरे हुँदै उक्त बाढी त्रिशूली नदीमा प्रवेश गरेको देखिएको छ," प्राधिकरणले उल्लेख गरेको छ।
तिब्बतसँग जोडिएको उक्त क्षेत्रमा अवस्थित ल्हेन्दे खोलामा गत वर्ष पनि भीषण बाढी आउँदा ठूलो क्षति पुगेको थियो।
यसैबीच अन्तर्राष्ट्रिय एकीकृत विकास केन्द्र (इसिमोड)का विज्ञहरूले पनि आज आएको भीषण बाढीको कारण हिमपहिरो हुन सक्ने औँल्याएका छन्।
“यस पटक सम्भवतः हिमपहिरोका कारण नदी थुनिएर अचानक पानीको ठूलो बहाव तलतिर आएको हुन सक्छ," राष्ट्रिय समाचार समितिलाई इसिमोडका विपद् जोखिम न्यूनीकरणविज्ञ शाश्वत सन्यालले बताए।
इसिमोडका जलवायु तथा वातावरणीय जोखिम प्रमुख स्याङ्गोङ झाङले गत वर्ष रसुवामा आएको बाढीबाट तहसनहस भएको त्यही क्षेत्र अहिले फेरि जोखिममा परेको औँल्याएका छन्।
“ल्हेन्देखोलामा आज आएको बाढी हिमपहिरो कारणले भए पनि यसको अझै पुष्टि हुन बाँकी छ। नेपाल-चीन सीमास्थित नदीको माथिल्लो भागमा अझै अवरोध कायम रहेकाले दोस्रो पटक बाढी आउन सक्छ,” रासससँग उनले भने।
बाढीबाट सो क्षेत्रमा ठूलो मात्रामा जनधनको क्षति भएको अधिकारीहरूले बताएका छन्। तर विस्तृत विवरण आउन बाँकी नै छ।
चितवनमा पनि उच्च सतर्कता, ईश्वर जोशी, चितवन
तस्बिर स्रोत, BBC/Ishwor Joshi
त्रिशूली नदीको बाढी चितवन आइपुगेसँगै चितवनमा पनि उच्च सतकर्ता अपनाइएकाे अधिकारीहरूले बताएका छन्।
चितवनकाे नदीतटीय क्षेत्रमा सुरक्षाकर्मीहरू परिचालन गरिएकाे छ। ती क्षेत्रका बासिन्दा तथा व्यवसायीहरूलाई सुरक्षित स्थानमा जान भनिएकाे छ।
बाढी आउन सक्ने सम्भावित खतरालाई मध्यनजर गर्दै नारायणगढ-मुग्लिन सडक पनि बन्द गरिएकाे छ।
फिस्लिङदेखि गाेलाघाटसम्मका नदीतटीय क्षेत्रका बासिन्दालाई उच्च सतर्कता अपनाउन जिल्ला प्रशासन कार्यलय चितवनले आग्रह गरेकाे छ।
यद्यपि यस जिल्लामा बाढीकाे ठूलो खतरा टरेकाे अधिकारीहरूले बताएका छन्।
क्षतिको अवस्था र सरकारका निर्णयबारे परराष्ट्रमन्त्रीद्वारा सदनलाई जानकारी
प्रतिनिधिसभालाई सम्बोधन गर्दै नेपालका परराष्ट्रमन्त्री शिशिर खनालले भूकम्पसँगै आएको हिम पहिरोका कारण रसुवा विपद्को अवस्था आएको बताउँदै त्यसबारे थप पुष्टि गर्ने काम चलिरहेको समेत बताए।
बिहान अन्दाजी ८ बजेर ४० मिनेट जाँदा रसुवाको भोटेकोशी नदीमा आएको बाढीले रसुवा र नुवाकोट जिल्लाका विभिन्न ठाउँहरू प्रभावित बनेको उनले बताए। जस क्रममा टिमुरे, स्याफ्रुबेँसी, बेत्रावती, त्रिशूली बट्टार र देवीघाट लगायतका ठाउँमा ‘निकै ठूलो क्षति पुगेको’ उनले बताए।
उनले ८:३७ बजे गएको भूकम्पका कारण उक्त बाढी आएको बताए।
मन्त्री खनालले रसुवाको बाढीसँगै ‘राष्ट्रिय विपद्को अवस्था’ रहेको र ‘प्रारम्भिक सूचनाहरू’ मात्र आइरहेको बताए।
भोटेकोशी र त्रिशूली नदीका तटीय क्षेत्रमा अझै जोखिम रहेको बताउँदै उनले नुवाकोट, धादिङ, गोरखा र चितवन जिल्लाका नदी आसपास र तटीय क्षेत्रमा उच्च सतर्कता अपनाउन आग्रह गरे।
प्रभावित नागरिकको उद्धार तथा राहतमा काम गर्न सबै निकायलाई निर्देशन दिइएको उनले बताए।
सरकारले घाइतेहरूको नि:शुल्क उपचार एवं बिचल्लीमा परेकाहरूलाई उद्धार गर्दै सुरक्षित स्थानमा सार्ने काम विभिन्न मन्त्रालय एवं सेनाको सहयोगमा भइरहेको बताए।
सेना र निजी हेलिकप्टर कम्पनीहरूलाई त्यस क्रममा परिचालन गर्ने निर्णय भएको समेत उनले बताए।
प्रभावित जिल्लालाई तीन महिना ‘विपद् सङ्कटग्रस्त क्षेत्र घोषणा’ गर्ने निर्णय समेत सरकारले गरेको बताए।‘
२६ जना नेपाल प्रहरी र ९ जना सशस्त्र ४४ नेपाली सेना, भन्सार र अध्यागमन क्षेत्रका कर्मचारी, र केही स्थानीय बासीहरू सम्पर्कविहीन रहेको बताए।
९ जनाको शव सनाखत हुन नसकेको अवस्थामा रहेको उनले बताए।
सडक पुल, जलविद्युत क्षेत्र र अन्य सार्वजनिक पूर्वाधारमा समेत ठूलो क्षति पुगेको उनले बताए।
गल्छी-नुवाकोट, रसुवाको स्याफ्रुबेँसी सडक एवं मुग्लिङ नारायणगढ सडकमा तत्काल यात्रा नगर्न र नगराउन सरकारले अनुरोध गरेको छ।
तस्बिर स्रोत, RSS
बाढी आउनुअघि र आएपछिका स्याटलाइट तस्बिर
सरकार र दल एकढिक्का हुनुपर्छ : रवि लामिछाने
तस्बिर स्रोत, RSS
राष्ट्रिय स्वतन्त्र पार्टी (रास्वपा)का सभापति रवि लामिछानेले प्राकृतिक विपद्को सामना गर्न सरकार र सबै राजनीतिक दललाई एकढिक्का भएर राहत तथा उद्धारमा खट्न आह्वान गरेका छन्।
राष्ट्रिय समाचार समितिका अनुसार प्रतिनिधिसभाको आजको बैठकको आकस्मिक समयमा उनले दलका राहत तथा उद्धारमा दक्ष, जानकार र तालिमप्राप्त जनशक्तिलाई सरकारी निकाय तथा स्थानीय प्रशासनसँग समन्वय गरी प्रभावित क्षेत्रमा परिचालन गर्न आग्रह गरे।
उनले राहत र उद्धारका लागि राजनीतिक दलहरूले एकीकृत खाका बनाएर काम गर्नुपर्ने तथा कुनै दलको झण्डाभन्दा देशको झण्डामुनि एकजुट हुनुपर्ने बताए।
“यो विपत्तिमा पक्ष–प्रतिपक्ष होइन, एकैसाथ सरकारको साथमा छौँ भन्ने जुन उच्च राजनीतिक संस्कारको प्रदर्शन भयो, म विपक्षीलाई धन्यवाद दिन चाहन्छु,” उनले भने।
“नागरिकको ज्यान बचाउने कुरा यतिखेर सबैभन्दा महत्वपूर्ण कुरा हो,” लामिछानेले भने, “सरकारले आफ्नो सम्पूर्ण सामर्थ्य सबैभन्दा पहिला नागरिकलाई बचाउनमा लगाउने छ भन्ने विश्वास छ।”
लाङटाङ खोला जलविद्युत् आयोजनामा कार्यरत ६० जना सम्पर्कविहीन
रसुवाको स्याफ्रुबेँसीमा निर्माणाधीन २० मेगावाटको लाङटाङ खोला जलविद्युत् आयोजनामा कार्यरत ६० कर्मचारी सम्पर्कविहीन रहेको राससले जनाएको छ। लाङटाङ जलविद्युत् आयोजनाका प्रबन्ध निर्देशक तथा स्वतन्त्र ऊर्जा उत्पादकहरूको संस्था, नेपालका सचिव विजयमोहन भट्टराईले आयोजनामा कार्यरत इन्जिनियरसहित कर्मचारीहरू सम्पर्कविहीन भएकाले भन्दै खोजीका लागि सरकारलाई आग्रह गरेका छन्। “आयोजनाको सुरुङको क्रङ्क्रिट ढलानको काम भइरहेको थियो। सो कार्यमा ६० भन्दा धेरै कर्मचारी सम्पर्कविहीन हुनुभएको छ। त्यसैले खोजी गर्नका लागि सरकारसँग अनुरोध गर्दछु,” उनले रासससँग भने।
राससका अनुसार बाढीले जलविद्युत् आयोजनाको संरचनामा गम्भीर क्षति पुर्याएको छ।
भट्टराईलाई उद्धृत गर्दै राससले बाढीका कारण नदीको सतहभन्दा १० मिटरमाथि रहेको सुरुङमा समेत असर पुगेको विवरण राससले प्रकाशित गरेको छ।
२९१ विदेशीसहित ३८४ पर्यटक सम्पर्कविहीन : नेपाल पर्यटन बोर्ड
विभिन्न ट्राभल एजेन्सीहरूले दिएको विवरणअनुसार रसुवा जिल्लामा भोटेकोशी नदीमा बाढी आएपछि २९१ जना विदेशी पर्यटक र ९३ जना नेपालीहरू सम्पर्कविहीन भएको नेपाल पर्यटन बोर्डले जनाएको छ।
बोर्डका अनुसार त्यसरी सम्पर्कविहीन बनेका पर्यटकमा सबैभन्दा धेरै १०० जनाभन्दा बढी भारतका छन्। त्यसबाहेक ३७ जना गैरआवासीय भारतीयहरू रहेको जानकारी सम्बद्ध ट्राभल कम्पनीहरूले दिएको बोर्डले जनाएको छ।
बोर्डका अनुसार सम्पर्कविहीन अरू पर्यटकमा १७ जना मलेशिया, १२ जना यूकेका र ४ जना दक्षिण अफ्रिकाका भएको जानकारी प्राप्त भएको छ। तर झन्डै १०० जनाको राष्ट्रियता अझै पुष्टि भइनसकेको बोर्डले जनाएको छ।तिब्बतस्थित कैलास मानसरोवर र रसुवास्थित गोसाईँकुण्ड जाने तीर्थयात्रीहरू एवम् लाङटाङ राष्ट्रिय निकुञ्जममा पदयात्रा गर्न जाने मानिसहरू रसुवा जाने गर्छन्।
त्रिशूली नदीमा पानीको तह
जल तथा मौसम विज्ञान विभागले धादिङ जिल्लाको फुर्केखोलामा त्रिशूली नदी आज बिहान खतराको तहभन्दा पनि माथि पुगेको जनाएको छ।
विभिन्न जिल्लामा १७ जनाको शव फेला पर्यो : नेपाल प्रहरी
नेपाल प्रहरीले रसुवामा बिहान आएको बाढीका कारण विभिन्न जिल्लामा ज्यान गएका कम्तीमा १७ जनाको शव फेला परेको पुष्टि गरेको छ।
प्रहरीका केन्द्रीय प्रवक्ता अबिनारायण काफ्लेले रसुवामा १ पुरुष, नुवाकोटमा ३ महिला र ४ पुरुष, धादिङमा ३ महिला र २ पुरुष अनि गोरखामा १ पुरुषको शव फेला परेको बताए।
धादिङमा ज्यान १ जना र गोरखामा २ जनाको पहिचान खुल्न नसकेको उनले जनाए।
घाइतेको उद्धार र उपचार हुँदै
नेपाली सेनाले बाढीबाट प्रभावित विभिन्न स्थानहरूबाट घाइतेहरूको उद्धार गरी उपचारका लागि लगेको अधिकारीहरूले बताएका छन्।
उद्धारकार्यका लागि नेपाली सेनाका र निजी कम्पनीहरूका हेलिकप्टर पनि प्रयोग भएको छ।
तस्बिर स्रोत, PMO/RSS
तस्बिर स्रोत, PMO/RSS
तस्बिर स्रोत, RSS
तस्बिरको क्याप्शन, नुवाकोटका विभिन्न स्थानमा बाढीबाट बच्न भाग्ने क्रममा घाइते भएकाहरूको विदुरस्थित चक्रदेव अस्पतालमा उपचार हुँदै गरेको राससले जनाएको छ
तस्बिर स्रोत, RSS
नुवाकोटको देवीघाटका केही तस्बिर
तस्बिर स्रोत, RSS
रसुवाको भोटेकोशी नदीमा आएको बाढीका कारण त्रिशूली नदीको तटमा अवस्थित नुवाकोट जिल्लाको विदुर नगरपालिकास्थित देवीघाट बजार पनि प्रभावित भएको छ।
तस्बिर स्रोत, रसुवाको भोटेकोशी नदीमा आएको बाढीका कारण त्रिशूली नदीको तटमा अवस्थित नुवाकोट जिल्लाको विदुर नगरपालिकास्थित देवीघाट बजार
तस्बिर स्रोत, RSS
कारागारमा पनि बाढी पस्यो
तस्बिर स्रोत, RSS
रसुवास्थित भोटेकोशी नदीमा आएको बाढीका कारण नुवाकोटको विदुर नगरपालिकाको खम्पाक्याम्पस्थित केन्द्रीय कारागारमा बाढीले क्षति पुर्याएको राष्ट्रिय समाचार समितिले जनाएको छ।
राससका अनुसार त्यहाँको प्रशासनिक भवन र नेपाल प्रहरीको सुरक्षा टोलीको भवनमा क्षति पुगेको छ भने कारागारमा आंशिक असर परेको छ।
कारागारमा रहेका कैदीबन्दीलाई सुरक्षित ब्लकमा सारिएको बुझिएको छ।
तस्बिर स्रोत, RSS
तस्बिर स्रोत, RSS
उद्धार, राहत र पुनर्स्थापनामा जुट्न गैरसरकारी सङ्घसंस्थालाई आह्वान
भीषण बाढीले रसुवा, नुवाकोट लगायत विभिन्न जिल्लामा मानवीय तथा
भौतिक क्षति पुर्याएसँगै समाज कल्याण परिषद्ले राष्ट्रिय तथा अन्तर्राष्ट्रिय
गैरसरकारी सङ्घसंस्थालाई तत्काल उद्धार, राहत तथा
पुनर्स्थापनामा जुट्न आह्वान गरेको छ।
परिषद्ले प्रभावित
क्षेत्रमा राहत तथा पुनर्स्थापनाका कार्यक्रम सञ्चालन गर्दा सम्बन्धित स्थानीय तह, जिल्ला विपद् व्यवस्थापन समिति र जिल्ला प्रशासन
कार्यालयसँग समन्वय तथा सहकार्य गर्न आग्रह समेत गरेको छ।
“साथै गैरसरकारी सङ्घसंस्थाले सञ्चालन गर्ने उद्धार, राहत तथा पुनर्स्थापनासम्बन्धी गतिविधिको जानकारी समाज
कल्याण परिषद्लाई गराउन अनुरोध गरिएको छ,” परिषद्ले एउटा सूचनामा भनेको छ।
नेपाललाई आवश्यक सहयोग गर्न भारत र चीनको प्रस्ताव
तस्बिर स्रोत, PM Secretariat
रसुवा र नुवाकोट हुँदै बहने भोटेकोशी नदीमा आएको बाढी पछि उद्धार र राहतका लागि चीन र भारतका सरकारसँग संवाद भइरहेको सरकारका प्रवक्ताले बताएका छन्।
“चीन सरकारसँग र भारत सरकारसँग पनि संवाद भइरहेको छ । परराष्ट्र मन्त्रालय मार्फत् समन्वय भइरहेको छ। चीन सरकारले आवश्यक सहयोग गर्ने पनि जानकारी गराएको छ भारत सरकारले पनि गराएको छ,” सरकारका प्रवक्ता सस्मित पोखरेलले भने।
विपद्पछि बसेको मन्त्रिपरिषद् बैठकले उद्धार र राहतका लागि सरकारी र निजी क्षेत्रका हेलिकप्टर परिचालन गर्ने निर्णय गरेको शिक्षामन्त्री समेत रहेका पोखरेलले जानकारी दिए।
प्रवक्ता पोखरेलका अनुसार भोटेकोशीमा आएको बाढीबाट भएको जनधनको क्षतिप्रति सरकारले दुख व्यक्त गर्दै घाइतेको निःशुल्क उपचार गर्ने निर्णय गरेको छ।
उनले घर बगाएकाहरूलाई खाने बस्ने व्यवस्था मिलाउन, सडक पुन: सञ्चालनमा ल्याउन र खानेपानीको व्यवस्था मिलाउन तथा बिद्युत् आपूर्ति र दूरसञ्चारको व्यवस्था मिलाउन सम्बन्धित मन्त्रालयहरूलाई निर्देशन दिइएको बताएका छन्।
सरकारले मृतकका परिवारलाई तत्काल आर्थिक सहायता उपलब्ध गराउने र विपद्बाट प्रभावित क्षेत्रलाई विपद् सङ्कटग्रस्त क्षेत्र घोषणा गर्ने निर्णय समेत गरेको छ।
सरकारका प्रवक्ताले उद्धारका लागि हेलिकप्टर आवश्यक परे आपत्कालिन सहायता नम्बर १२३४ मा सम्पर्क गर्न आग्रह गरेका छन्।
