You’re viewing a text-only version of this website that uses less data. View the main version of the website including all images and videos.
लोकसभा निवडणुकांच्या निकालांचे लाईव्ह अपडेट्स तुम्हाला इथे वाचता येतील. तसंच, निकालासंबंधी इतरही घडामोडींचे अपडेट तुम्हाला या लाईव्ह पेजवर मिळतील.
ओंकार करंबेळकर
आठ वाजल्यापासून मतमोजणीला सुरूवात होईल. निवडणूक संपल्यानंतर अनेक संस्थांनी निकालाचे अंदाज वर्तवणारे एक्झिट पोल केले होते.
एक्झिट पोलची ही आकडेवारी काय सांगत आहे? देशात एनडीएला किती आणि इंडिया आघाडीला किती जागा? महाराष्ट्रात महाविकास आघाडीला झुकतं माप की महायुतीला? निकालाआधी एकदा जाणून घ्या एक्झिट पोलचे कल...पाहा व्हीडिओ
मतमोजणीच्या आधी अनेक ठिकाणी ईव्हीएम मशीन बदलण्यात आले असल्याचा आरोप छत्तीसगढचे माजी मुख्यमंत्री भूपेश बघेल यांनी केला आहे.
सोशल मीडिया प्लॅटफॉर्म 'एक्स'वर पोस्ट लिहित त्यांनी लिहिलं आहे, “निवडणूक आयोगाने मतदानासाठीच्या मशीन्सचे नंबर दिले होते. यामध्ये बॅलेट युनिट, कंट्रोल युनिट आणि व्हीव्हीपॅटचा समावेश आहे. माझ्या राजनांदगाव या क्षेत्रात फॉर्म 17 सी मध्ये जी माहिती दिली आहे, त्यानुसार अनेक मशिन्सचे नंबर बदलण्यात आले आहेत. ज्या बूथवर नंबर बदलले गेले आहेत, तिथे हजारो मतांवर परिणाम होऊ शकतो.”
बघेल यांनी पुढे लिहिलं आहे की, “अनेक लोकसभा मतदारसंघातून या तक्रारी आल्या आहेत. आम्ही राज्य निवडणूक पदाधिकाऱ्यांकडे तक्रार करत आहोत. निवडणूक आयोगाला उत्तर द्यायला हवं की, कोणत्या परिस्थितीत मशीन बदलण्यात आली आहेत. निवडणुकीवर याचा जो परिणाम होईल त्यासाठी जबाबदार कोण असेल?”
त्यांनी एक्सवर बदललेल्या नंबरची एक यादीही प्रसिद्ध केली आहे.
सहा आठवडे चाललेल्या लोकसभा निवडणुकीच्या मतदान प्रक्रियेनंतर आता सर्वांच लक्ष आहे आजच्या निकालाकडे.
निवडणूक आयोगाने दिलेल्या माहितीनुसारॉ लोकसभेच्या 543 पैकी 542 जागांवर मंगळवारी (4 जून) सकाळी आठ वाजता मतमोजणी सुरू होईल.
गुजरातच्या सुरत लोकसभा मतदारसंघात भाजपचे मुकेश दलाल हे याआधीच बिनविरोध निवडून आले आहेत. या जागेवर काँग्रेसच्या उमेदवाराचा अर्ज बाद ठरल्यानंतर बाकी अपक्ष उमेदवारांनीही आपले उमेदवारी अर्ज मागे घेतले होते.
नियमानुसार सर्वांत आधी पोस्टल बॅलेटची मतमोजणी होईल आणि नंतर अर्ध्या तासाने ईव्हीएममधील मतांची मोजणी.
जर एखाद्या केंद्रावर पोस्टल बॅलेट नसतील, तर थेट ईव्हीएमच्या मतांची मोजणी सुरू होईल.
मुख्य निवडणूक आयुक्त राजीव कुमार यांनी सोमवारी एक पत्रकार परिषद घेऊन सांगितलं की, 19 एप्रिल ते एक जून पर्यंत चाललेल्या सात टप्प्यांतील मतदानादरम्यान देशातील 96.8 कोटी नोंदणीकृत मतदारांपैकी 64.2 कोटी मतदारांनी आपला मतदानाचा हक्क बजावला.
यामध्ये महिला मतदारांची संख्या 31.2 कोटी आहे.
सरासरी 58.58 टक्के मतदान झालं आहे.
राजीव कुमार यांनी म्हटलं की, या संपूर्ण प्रक्रियेदरम्यान 1.5 निवडणूक कर्मचारी आणि सुरक्षा कर्मचारी तैनात करण्यात आले होते.
लोकसभा निवडणुकांचे निकाल आज जाहीर होतील. थोड्याच वेळात निकालांचे कल समोर येतील. निवडणूक निकालाचे लाईव्ह अपडेट्स तुम्ही बीबीसी मराठीच्या या लाईव्ह पेजवर वाचू शकता, पाहू शकता.
तसंच, बीबीसी मराठीच्या यूट्यूब चॅनेलवरून दिवसभर निवडणूक निकालाचे विश्लेषणही पाहायला मिळेल.
लोकसभा निवडणुकांसंदर्भात बीबीसी मराठीनं आजवर केलेल्या बातम्या तुम्हाला इथे वाचता येतील.