Париж: Башаламандык менен коштолгон Бастилия күнү

Францияда 14-июлда Бастилия күнү белгиленди. 1789-жылы 14-июлда Бастилия чебин көтөрүлүшчүлөр басып алып, француз революциясына жол ачкан. Мамлекеттик түрмөнүн да милдетин аткарган Бастилия чебин алган күн Франциянын улуттук майрамы катары 1880-жылдан бери белгиленип келет.

Баш калаа Париждин борборундагы аянтта жыл сайын аскердик парад өтөт. Ага өлкөнүн президенти Эммануэль Макрон менен жогорку даражадагы расмийлер, меймандар катышты.

Майрам күнү "сары кемселчендер" кыймылынын колдоочулары полиция менен кагылышып, 150 киши камакка алынды. "Сары кемселчендер" 2018-жылдын аягында күйүүчү май үчүн салыкты жогорулатууга каршы нааразылык акцияларды уюштурган. Учурда аталган кыймылдын өкүлдөрү президенттин кызматтан кетүүсүн талап кылууда.

Парадга төрт миңден ашуун аскер катышты.

Франциянын президенти Эммануэль Макрон Европа Биримдигинин лидерлерине кайрылып, аскердик кызматташууну күчөтүүгө чакырды.

Париждеги парадга Германиянын канцлери Ангела Меркель, Нидерланддардын премьер-министри Марк Рютте жана Европа кеңешинин жаңы шайланган президенти Шарль Мишель катышты.

2017-жылкы парадга АКШнын жаңы шайланган президенти Дональд Трамп дагы катышкан. Андан бери Франция менен АКШнын мамилеси солгундады.

Параддан кийин полиция менен "сары кемселчендер" кыймылынын ортосунда кагылышуулар болду.

Коопсуздук кызматкерлери "сары кемселчендер" кыймылы парадды токтотууга аракеттенди деп билдирди.

***