Жакынкы Чыгыш өлкөлөрү Ирандын кол салууларын айыптаган билдирүү таратышты

Түз алып баруу

Ирандагы соңку кырдаал

1. 19 март 2026Жакынкы Чыгыш өлкөлөрү Ирандын кол салууларын айыптаган билдирүү таратышты

   Биргелешкен билдирүү Эр-Рияддагы тышкы иштер министрлеринин жолугушуусунан кийин жарыяланды. Жолугушууга Катар, Бахрейн, Египет, Иордания, Кувейт, Ливан, БАЭ, Саудия Арабиясы, Сирия, ошондой эле Түркия, Азербайжан жана Пакистандын тышкы иштер министрлери катышты.

   Билдирүүдө министрлер Ирандын турак жай конуштарына, жарандык инфраструктурага жана дипломатиялык өкүлчүлүктөргө багытталган "атайын жасалган кол салууларын" айыпташты. Алар бул чабуулдарды "кандай гана шылтоо болбосун" актоого мүмкүн эмес экенин билдиришти.

   Өз билдирүүсүндө тышкы иштер министрлери Иранды "чабуулдарын токтоосуз токтотууга", эл аралык укукту жана "жакшы кошуначылык принциптерин" сыйлоого, ошондой эле Ормуз кысыгын жабууга багытталган "чаралардан же коркутуулардан" карманууга чакырышты.

   Мындан тышкары, жолугушуунун катышуучулары БУУнун 51-беренесине ылайык, алардын өлкөлөрү өзүн-өзү коргоого укуктуу экенин баса белгилешти.

2. 19 март 2026Washington Post: Пентагон Ирандагы согушка 200 миллиард доллар сурап жатат

   Пентагон Иран менен болгон согушту андан ары каржылоо үчүн 200 миллиард доллардан ашык бюджеттик өтүнүчтү Ак үйгө бекитүүгө жөнөттү. Бул тууралуу Washington Post гезити администрациядагы жогорку кызматтагы булагына таянып жазды.

   Гезит белгилегендей, бул сумма буга чейин жарыяланган согуштук кампаниянын чыгымдарынан алда канча көп. Кошумча каржылоонун максаттарынын бири катары курал-жарактын жана ок-дарылардын өтө маанилүү категорияларын өндүрүүнү "тез арада" арттыруу аталууда.

   Washington Post басылмасынын жазганына караганда, бул акыркы эки жума ичинде сунушталган ведомствонун бюджеттик муктаждыктарынын биринчи эле баасы эмес. Бирок, эгер өтүнүч Конгресске ушул көлөмдө жөнөтүлсө, бул "чоң саясий кармашка алып келиши мүмкүн".

   Коргоо министрлиги жана Ак үй гезитке комментарий берүүдөн баш тартышты.

3. 19 март 2026Иран "коңшуларынын мунай-газ тармагын жок кыларын" айтып коркутту

   Ирандын Ислам революциясынын сакчылар корпусу эгер өзүнүн энергетикалык сектору кайрадан жабыркаса, Перс булуңундагы өлкөлөрдүн мунай-газ тармагын жок кылууга даяр экенин билдирди.

   "Биз силерге дагы бир жолу эскертебиз: Ислам Республикасынын энергетикалык инфраструктурасына кол салуу менен чоң ката кетирдиңер жана буга карата жооп кайтаруу чаралары көрүлө баштады", — деп айтылат ирандык ЖМКлар тараткан Ислам революциясынын сакчылар корпусунун билдирүүсүндө.

   "Эгер бул кайталанса, силердин жана өнөктөштөрүңөрдүн энергетикалык инфраструктурасына жасалган чабуулдар ал толугу менен жок кылынмайынча токтобойт. Биздин жообубуз бүгүнкү чабуулдарга караганда алда канча катуу болот", — деп AFP агенттиги билдирүүдөн цитата келтирет.

4. 18 март 2026Тель-Авивге жасалган соккунун кесепетинен эки адам каза болду

   Иран Улуттук коопсуздуктун жогорку кеңешинин катчысы Али Ларижанинин өлтүрүлүшүнө жооп катары Тель-Авивге кассеталык дүрмөттүү ракеталар менен сокку урду. Бул тууралуу шаршемби күнү Ирандын мамлекеттик телеканалы билдиргенин Reuters кабарлады.

   Шейшембиге караган түнү болгон чабуулдун натыйжасында Тель-Авивдин жанындагы негизги аскердик объектилер жайгашкан аймакта эки адам каза болду деп жазат агенттик.

   Тез жардам кызматынын маалыматы боюнча, Тель-Авивдин четиндеги Рамат-Ган шаарына жасалган ракеталык соккудан 70 жаштардагы эркек киши жана аял киши каза тапкан.

   Муну менен Израилде согуштун кесепетинен каза болгондордун саны 14кө жетти.

   Ирандын мамлекеттик телеканалында окулган Ислам революциясынын сакчылар корпусунун билдирүүсүндө, чабуулда көп дүрмөттүү "Хоррамшахр-4" жана "Кадыр" ракеталары колдонулганы айтылат.

   Израилдин билдирүүлөрүнө ылайык, Иран абада көптөгөн майда жарылуучу түзүлүштөргө бөлүнүп, чоң аймакка жайылып кетүүчү кассеталык дүрмөттөрдү бир нече ирет колдонгон. Бул аларды атып түшүрүүнү кыйындатат.

5. 18 март 2026Премьер-министр: БАЭдеги австралиялык базанын жанына ирандык снаряд түштү

   Австралиянын премьер-министри Энтони Албанезе Бириккен Араб Эмираттарындагы (БАЭ) австралиялык базанын жанына ирандык снаряд түшкөнүн билдирди. Ал куралдын так кайсы түрү экенин ачыктаган жок. Албанезенин айтымында, снаряд 17-мартта саат 22:15те Аль-Минхад базасынын жанына кулаган.

   "Австралиялык аскер кызматкерлеринин эч кимиси жабыркабаганын жана баары толук коопсуздукта экенин тастыктай алам", - деп билдирди премьер-министр журналисттерге.

   Ал ошондой эле базадагы турак жай корпусу жана медициналык пункт анча чоң эмес зыянга учураганын кошумчалады.

   Аль-Минхад базасы Дубайдан 24 чакырым түштүк тарапта жайгашкан. 2003-жылдан бери анда австралиялык аскерлер жайгашып, ал Австралиянын Жакынкы Чыгыштагы операцияларын координациялоочу негизги борбор катары кызмат кылат. AFP агенттигинин Австралия армиясына таянып берген маалыматына караганда, базада 80ге чейин австралиялык аскер болот.

6. 18 март 2026Бейруттун борборунда Израилдин соккуларынан алты адам каза болду

   Бейруттун борборуна жасалган Израилдин эки соккусунан кеминде алты адам каза болуп, 24ү жаракат алганын Ливандын Саламаттык сактоо министрлиги билдирди. Бул тууралуу AFP агенттиги кабарлады.

   Бул алдын ала маалыматтар экени жана каза болгондордун тек-жайы ДНК тесттеринин жардамы менен аныктала турганы белгиленген.

   Буга чейин жалпыга маалымдоо каражаттары соккулардын бири өкмөт имаратынын жана бир нече чет элдик элчиликтердин жанындагы Зукак аль-Блат районундагы көп батирлүү үйгө тийгенин кабарлашкан.

   Экинчи сокку Баста районуна жасалган. AFP маалымдагандай, күбөлөр ал жерден бир нече жарылуунун үнүн угушкан.

7. 18 март 2026Иран Ларижанинин өлүмүн тастыктады

   Иран бийлиги Улуттук коопсуздуктун жогорку кеңешинин катчысы Али Ларижани Израилдин соккусунан улам каза болгонун тастыктады.

   Буга чейин Тегеран Ислам революциясынын сакчылар корпусу (ИРСК) "Басидж" аскерлештирилген түзүмүнүн кол башчысы Голамреза Сулейманинин да Израилдин чабуулунан каза болгонун ырастаган.

   Шейшемби күнү Израилдин аскерлери Ирандын жаңы жогорку лидери Можтаба Хаменеини да бутага аларын билдиришти.

   "Биз Можтаба Хаменеи жөнүндө эч нерсе билбейбиз, аны уккан да, көргөн да жокпуз. Бирок мен сизге бир нерсени айта алам: биз аны издеп таап, жок кылабыз", — деп билдирди Израилдин Коргоо армиясынын (ЦАХАЛ) расмий өкүлү Эффи Дефрин журналисттерге.

   Иран армиясынын башчысы Али Хатами Израилдин авиасоккусунан набыт болгон Али Ларижанинин өлүмү боюнча билдирүү жасады.

   "Кылмышкер Америкага жана канкор сионисттик режимге ылайыктуу убакта жана ылайыктуу жерде чечкиндүү, токтотуучу жана өкүндүрө турган жооп берилет", - деди Хатами. Ал ошондой эле ирандык башка "шейиттердин" өлүмү үчүн өч алууну убада кылды.

   Армиядан бөлөк иш алып барган Ислам революциясынын сакчылар корпусу Ларижанинин өлүмү үчүн "өч алуу" иретинде Израилдин борборуна ракеталарды учурганын билдиргенин AFP кабарлады.

8. 17 март 2026Трамп: АКШ Ирандагы 7 миң бутага сокку урду

   АКШ президенти Дональд Трамп Иранга каршы аскердик операция акыркы бир нече күндөн бери толук күчүндө уланып жатканын билдирди.

   Анын айтымында, согуш башталгандан бери Вашингтон 7 миңден ашык бутага сокку уруп, көптөгөн кемелерди чөктүрдү. Атап айтканда, дүйшөмбү күнү АКШ Ирандагы учкучсуз учактар жана ракеталар чыгарылган үч заводду бутага алганын айтты.

   "Иран режиминен келген коркунучтарды жок кылууга багытталган биздин кубаттуу аскердик операциябыз акыркы бир нече күндө толук күчүндө уланды. Алар түз эле жер менен жексен болду. Аскердик аба күчтөрү жок кылынды, Аскердик деңиз флоту талкаланды. Көптөгөн кемелер чөктүрүлдү, - деди Трамп. - Абадан коргонуу системасы жок кылынды. Алардын радарлары талкаланып, лидерлери өлдү. Калган жагынан алардын иштери жаман эмес".

   Трамп ошондой эле АКШнын союздаштарын Ормуз кысыгындагы кемелердин коопсуздугун камсыздоого жардам берүү чакырыгына жай жооп кайтаргандыгы үчүн сынга алды.

   "Биз силерди 40 жылдан бери коргоп келебиз, ал эми силер буга кийлигишүүнү каалабай жатасыңар, - деди ал журналисттерге. - Биз башка өлкөлөрдү тез арада жана чоң энтузиазм менен бизге кошулууга чакырабыз".

   Ал кошумчалагандай, кээ бир дүйнөлүк лидерлер анын демилгесин колдоп жатышат, бирок алардын атын атагандан баш тартты.

9. 17 март 2026Reuters: Перс булуңундагы өлкөлөрдүн бийликтери АКШдан Иранга каршы операцияны токтотпоону суранууда

   Перс булуңундагы араб мамлекеттери башында АКШдан Иранга карата согуш баштоону суранышкан эмес, бирок азыр алардын көбү Вашингтонду токтоп калбоого жана Ирандын аймакта саясатын таңуулоосуна жол бербөөгө чакырууда. Бул тууралуу Reuters агенттигине Перс булуңундагы өлкөлөрдүн өкмөттүк деңгээлдеги үч булагы билдирген.

   Аймактык лидерлердин позициясынын өзгөрүшү Ирандын Америка-Израил соккуларына кайтарган жообу менен байланыштуу. Перс булуңундагы өлкөлөр эгер Иранда курал-жарактын же аскердик-өнөр жай объекттеринин олуттуу бөлүгү кала турган болсо, Ислам Республикасы аймактын энергетикалык ресурстарына дайыма коркунуч келтирет деп кооптонушат. Учурда Иран Ормуз кысыгын тосуп, кошуна өлкөлөрдөгү объекттерге сокку уруу менен дал ушундай коркунуч жаратууда.

   Reuters агенттигинин булактары билдиргендей, азыр Перс булуңундагы мамлекеттер Вашингтон Ирандын аскердик потенциалын ар тараптуу алсыратышы керек деп эсептешет.

   Өз кезегинде АКШ Перс булуңундагы өлкөлөргө басым жасап, алардын Иранга каршы согушка кошулуусун талап кылууда. Бул тууралуу Reuters агенттигине жогорудагы булактар, ошондой эле батыштык жана араб дипломаттар кабарлашты.

10. 16 март 2026Дубайдын эл аралык аэропортунда учкучсуз учактын жарылуусунан улам каттамдар токтотулду

    Дубай бийлиги "бардык жүргүнчүлөрдүн жана кызматкерлердин коопсуздугун камсыз кылуу максатында алдын алуу чарасы катары" аэропорттогу каттамдарды убактылуу токтотууну жарыялады. Бийликтин билдирүүсүнө караганда, аэропортко учкучсуз учак кулап, күйүүчү май багын жабыркаткандыктан, өрт чыккан.

11. 16 март 2026Трамп: "Эгер союздаштар Ормуз кысыгын ачууга жардам бербесе, бул НАТОнун келечеги үчүн жаман болот

    АКШ президенти Дональд Трамп Financial Times гезитине берген маегинде Ормуз кысыгын колдонуудан пайда көргөн өлкөлөр аны ачуу үчүн күч жумшашы керектигин айтты. Трамптын айтымында, эгер башка өлкөлөр тараптан эч кандай аракет болбосо, бул "НАТОнун келечеги үчүн өтө жаман кесепеттерге" алып келиши мүмкүн. Буга чейин ал Кытайды, Францияны, Жапонияны, Түштүк Кореяны жана Улуу Британияны кысыкты ачуу боюнча "биргелешкен аракеттерге" кошулууга чакырган.

    "Биз Украина боюнча аларга жардам берүүгө милдеттүү эмес болчубуз. Украина бизден миңдеген километр алыстыкта жайгашкан. Бирок биз аларга жардам бердик. Эми алар бизге жардам береби, көрөбүз. Анткени мен эбак эле биз алардын жанында болорубузду, бирок алар биздин жаныбызда болбой турганын айткам. Жана алардын бизди колдооруна ишенбейм", — деди Трамп.

12. 16 март 2026Индия Иран менен сүйлөшүп суюлтулган газ ташыган эки танкерин Ормуз аркылуу өткөрдү

    Индиянын тышкы иштер министри Субраманям Жайшанкар Financial Times гезитине суюлтулган мунай газын ташыган эки индиялык танкердин Ормуз кысыгы аркылуу өтүшү боюнча Иран менен жеке өзү сүйлөшүүлөрдү жүргүзгөнүн айтып берди. Иран тарабынан блоктолгон кысыктан кемелердин өткөндүгү тууралуу 14-мартта белгилүү болду.

    "Мен учурда алар [Иран] менен сүйлөшүүлөрдү жүргүзүү менен алекмин жана бул сүйлөшүүлөрүм кандайдыр бир жыйынтыктарды берди", - деп белгиледи Жайшанкар.

    Индия үй чарбалары колдонгон суюлтулган газдын 60% импорттойт. Бул жеткирүүлөрдүн 90% Перс булуңундагы өлкөлөрдөн - биринчи кезекте Саудия Арабиясынан жана Бириккен Араб Эмираттарынан келет жана адатта Ормуз аркылуу өтөт. Индиядагы 330 миллиондон ашык үй чарбасы тамак бышыруу үчүн суюлтуган газ баллондорун колдонушат.

    Ормуз бөгөттөлгөндөн кийин Индиянын социалдык тармактарында газ баллондорун саткан жерлердеги узун кезектердин видеолору пайда боло баштады.

13. 13 март 2026Жума күнүнүн кечине карата негизги жаңылыктар:

    • Ирактын батышында кырсыкка учураган америкалык KC-135 май куюучу учагынын экипажынын алты мүчөсү тең каза болду. Бул тууралуу АКШнын Борбордук командачылыгы билдирди. Кырсыктын себептери айтыла элек, бирок америкалык аскерлердин маалыматы боюнча, учак атып түшүрүлгөн эмес.
    • АКШнын коргоо министри Пит Хегсет Иран армиясы натыйжалуулугун жоготконун айтып, Иранга каршы жаңы "эң кубаттуу аба сокку жасаларын" жарыялады. Бирок ал эки негизги суроого - Ормуз кысыгынын коопсуздугун кантип камсыздоо жана Ирандагы байытылган урандын запастарынан кантип арылуу керектигине бүдөмүк жоопторду берди.
    • АКШ президенти Дональд Трамп Ирандын лидерлерин "акылынан айныган акмактар" деп атап, аларды жок кылуу ал үчүн "чоң сыймык" экенин билдирди.
    • Израилдин түндүгүндөгү Зарзир айылына жасалган ракеталык чабуулдан 50дөн ашык адам жабыркады. Буга жооп катары Израил Тегеранга катуу аба соккусун урду, Ирандын борборунда катуу жарылуулар болгону кабарланууда.
    • Ислам революциясынын сакчылар корпусу Ирандын тургундарына массалык СМС-билдирүүлөрдү жөнөттү. Анда жарандарга өкмөткө каршы нааразылыктарга катышпоо эскертилип, демонстранттарды "нео-ислам мамлекети" деп атап, аларды жазалоо менен коркутту.
    • "Улуу Британия орус мунайына карата санкцияларды жумшартпайт", - деп билдирди энергетика министринин биринчи орун басары Майкл Шэнкс.
    • Германиянын канцлери Фридрих Мерц да АКШнын деңиз жолу менен жеткирилүүчү, санкцияга кабылган орус мунайын жана мунай продуктуларын сатып алууга убактылуу уруксат берүүсүнө каршы чыкты.

14. 13 март 2026Америкалык май куюучу учактын кырсыкка учурашынан экипаждын төрт мүчөсү каза болду

    Ирактын батышында кырсыкка учураган америкалык май куюучу учактын экипажынын алты мүчөсүнүн ичинен төртөө каза болду. Бул тууралуу Жакынкы Чыгыштагы америкалык аскерлерге жооптуу болгон АКШнын Борбордук командачылыгы билдирди.

    Каза болгондордун тек-жайы алардын жакындарына кабарланганга чейин ачыкталбайт.

    KC-135 май куюучу учагы жума күнү Ирактын батышында башка учактын катышуусундагы инциденттин натыйжасында кулаганын америкалык аскерлер буга чейин маалымдашкан.

    "Учактардын бири Ирактын батышында кулап түштү, ал эми экинчиси аман-эсен конду. Бул окуя душмандын же союздаштардын огуна байланыштуу эмес", — деп айтылат АКШнын Борбордук командачылыгынын билдирүүсүндө.

15. 13 март 2026Тегеранда жарылуулар угулууда: Израил жаңы соккуларды урууда

    Израил коргонуу армиясы "Тегерандагы ирандык террордук режимдин инфраструктурасына каршы кеңири масштабдуу соккулардын толкунун жаңы эле баштаганын" жарыялады.

    Акыркы бир нече мүнөттүн ичинде шаарда жана анын тегерегинде көптөгөн жарылуулардын үндөрү угулду.

16. 13 март 2026

    Израил: Ракеталык соккудан 50дөн ашык адам жеңил жаракат алды

    Жума күнү эртең менен Израилдин түндүгүндөгү Зарзир айылына жасалган ракеталык чабуулдун кесепетинен ондогон адамдар жабыркаганын "Маген Давид адом" (MDA) тез жардам кызматы билдирди.

    Израилдин түндүгүндөгү Назарет шаарына жакын жайгашкан айылга сокку урулгандан кийин, медиктер 58 жабырлануучуга жардам көрсөтүп, ооруканаларга жеткиришти.

    Израилдик маалымат каражаттарынын билдиришинче, сыныктардан жаракат алган бир аялдын абалы орточо оор деп бааланууда. Ал эми калган 57 адам жеңил жаракаттарды, анын ичинде айнектин сыныктарынан улам кесилген жарааттарды алышкан.

    Ушул эле тапта Израил коргонуу армиясы Иран тараптан Израил аймагын көздөй жаңы ракеталар атылганын кабарлады.

17. 13 март 2026Оманда дрон түшүп эки адам каза болду

    Омандын маалымат агенттигине коопсуздук кызматтарындагы булак билдиргендей, Сохар шаарындагы Аль-Авахи өнөр жай аймагына дрон кулап, натыйжада чет өлкөлүк эки жаран каза болуп, дагы бир нече адам жаракат алды.

    Экинчи учкучсуз учак дагы Сохардагы ачык жерге кулаган, бирок андан эч ким жабыркаган эмес деп кошумчалайт агенттик. Омандын бийлиги эки окуя боюнча тең иликтөө жүргүзүүдө.

18. 13 март 2026Иранчыл топ Иракта америкалык май куюучу учакты атып түшүргөнүн жарыялады

    Иран тарабынан колдоого алынган куралдуу топтордун бирикмеси - "Ирактагы исламдык каршылык көрсөтүү" кыймылы бейшемби күнү Ирактын батышында кыйроого учураган америкалык KC-135 май куюучу учагы үчүн жоопкерчиликти өзүнө алды. Америкалык аскерлер болсо учактын кыйрашы аткылоого байланыштуу эмес экенин билдиришкен.

    Reuters агенттигинин маалыматына караганда, топ өз билдирүүсүндө учакты "өлкөбүздүн суверенитетин жана аба мейкиндигин коргоо максатында" атып түшүргөнүн ырастоодо.

    Буга чейин америкалык аскерлер KC-135 учагы Ирактын батышында башка бир учак катышкан инциденттин натыйжасында кыйраганын билдиришкен.

    "Учактардын бири Ирактын батышында кыйрап, экинчиси аман-эсен конду. Бул душмандын же союздаштардын огуна байланыштуу эмес", - деп айтылат Жакынкы Чыгыштагы америкалык аскерлерге жооптуу АКШнын Борбордук командачылыгынын билдирүүсүндө.

    Reuters агенттигинин булагы инцидентке катышкан экинчи учак дагы KC-135 экенин, ал эми кыйраган учактын бортунда алтыга чейин аскер кызматкери болгонун кабарлаган.

    АКШ менен Израилдин Иранга каршы операциясынын башталышында америкалык үч F-15 истребители жаңылыштык менен Кувейт тарабынан атып түшүрүлгөн.

    Boeing компаниясы тарабынан чыгарылган KC-135 учагы америкалык аскердик май куюучу учактар паркынын негизин түзөт жана согуштук тапшырмаларды аткарууда чечүүчү мааниге ээ.

19. 13 март 2026АКШ Ирандагы алты миң бутага сокку урулганын билдирди

    Америка Кошмо Штаттары Ирандагы 6 миң бутага сокку урду. Бултууралуу АКШнын Борбордук командачылыгы маалымдады. Бул сандын ичине америкалык аскерлердин ырастоосунда зыянга учураган же жок кылынган 60ка жакын аскердик кеме жана дагы 30 мина төшөөчү кеме кирет.

    Башка буталардын катарында командалык борборлор, курал-жарак чыгаруучу объектилер, баллистикалык ракеталарды учуруучу аянтчалар, суу астында жүрүүчү кайыктар жана абадан коргонуу системалары болгон.

    ЖМКлар кабарлагандай, аскердик тергөөчүлөр Америка менен Израилдин биргелешкен операциясынын башталышындагы аба соккулары учурунда Ирандагы мектепке кокусунан тийген сокку үчүн америкалык күчтөр жооптуу болушу мүмкүн деп эсептешет, бирок азырынча акыркы корутунду чыгарыла элек.

20. 13 март 2026Ирактагы дрондун чабуулунан француз аскери каза болду

    Ирактын Эрбил аймагында дрон чабуулунан француз аскер кызматкери каза болуп, дагы бир нечеси жаракат алды. Бул тууралуу Франциянын президенти Эммануэл Макрон билдирди.

    "Биздин күчтөргө жасалган бул чабуул кабыл алынгыс. Алар 2015-жылдан бери "Ислам мамлекетине" каршы күрөшкө катышып келишет", — деп жазды Макрон X социалдык тармагына. Ошондой эле ал: "Алардын Иракта болушу терроризмге каршы күрөшкө гана негизделген. Ирандагы согуш мындай кол салууларды актай албайт", — деп кошумчалады.

    Франция армиясынын маалыматы боюнча, террорго каршы даярдыктан өтүп жаткан алты француз аскери дрондун чабуулунан жаракат алган. Бул окуя аталган аймактагы италиялык базага кол салуу болгондон бир нече саат өткөндөн кийин катталды.

    Франция "Ислам мамлекети" тобунун согушкерлерине каршы күрөшүү боюнча эл аралык коалициянын алкагында Эрбил аймагына жүздөгөн аскерлерин жайгаштырган. Ал жерде АКШ менен Израилдин Иранга каршы согушу башталгандан бери бир нече жолу чабуулга кабылган америкалык контингент да жайгашкан.

    Эрбил губернатору Омед Кошнау дрондун чабуулу Эрбил провинциясынын Махмур районунда болгонун билдирди. Буга чейин Италиянын Коргоо министрлиги Ирак Курдистанындагы италиялык аскер базасына жасалган түнкү аба соккусу атайын пландалганын жана анын максаты НАТОнун кызматкерлери жайгашкан объект болгонун маалымдаган.

    Учурда Франция союздаштарына коргонуу максатында колдоо көрсөтүү үчүн Жер ортолук деңизине, Кызыл деңизге жана балким, Ормуз кысыгына авианосец тобун жөнөтүүдө.