Obodo dị iche iche na-eme ngagharịiwe megide ndị ọrụ ICE na mba Amerịka

Mkpuchi Na Eme Ozugbo

Michael Ngene, Chinonso Ugorji, Uzoamaka Ewuzie, Ikechukwu Kalu, Michael Ilediagu, Adline Okere, Marvelous Obomanu, Uche Akolisa

1. 4 Jenụwarị 2026Ndị ojiegbe gburu ọtụtụ mmadụ ka anụ ọhịa na Naịja steeti – Onye hụrụ ha

   Ndị uweojii na Naịja steeti ekwuola na ọ bụ eziokwu na ndị ojiegbe mwakporo ma gbuo igwe mmadụ n’obodo a na-akpọ Demo dị na mpaghara Kabe na steeti ahụ.

   Ọnụ na-ekwuru ndịuweojii bụ Wasiu Abiodun sị na ihe ahụ mere n’ụbọchị Satọde n’ebe mgbede.

   Ọ sị na ndị ojiegbe ahụ “zukwara ndị mmadụ ohi, zuru ngwaahịa ha nwere n’ime ahịa nakwa ihe ọbụla aka ha ruru".

   Ndị ọrụ nchekwa na-ekwu na ndị e gburu ruru mmadụ 30, ebe ha tọọrọ ọtụtụ mmadụ amabeghị ọnụ ọgụgụ ha.

   Mana otu onye akaebe sị na ya hụrụ mgbe mkpamkpa a kpara kwuru na “ha na-abịa achụpụ ha n’ụlọ ma na-egbu mmadụ ka ọkụkọ”.

   Ọ gara n’ihu jụọ ajụjụ sị “gọọmenti amakwa na anyị nọ nchancha?”

   Onye ọzọ sị na “ndị ojiegbe ahụ na-ejide mmadụ, kechie ya anya, nwere eriri kee ya dịka ewu tupu ha egbujasịa onye ahụ ka anụ ewu maọbụ ọkụkọ”.

   Ha sị na ọtụtụ ndị mmadụ ka e gburu n’ime ọhịa, na ndị obodo na-aga ebulata ozu ha ma kwuo na ugbua na ha enwetala ozu mmadụ iri anọ na abụọ e gburu egbu.

2. 4 Jenụwarị 2026Ndị uweojii ahụla ozu mmadụ 16 ọzọ nwụrụ n’ọkụ ahụ gbara ụlọ orriri na ọṅụṅụ na Switzerland

   Akụkọ kwuru na ndị uweojii ahụla ozu mmadụ 16 ọzọ nwụrụ n’ọkụ ahụ gbara ụlọ oriri Swiss ski resort dị na Crans-Montana.

   Ozi ndị uweojii wepụtara kwuru na ozu ndị ah gụnyere nwatakịrị nwaanyị gbara afọ 14 nakwa mmadụ 9 ọzọ na-erubeghị afọ 18. E kwuru na ndị ahụ nwụrụ si mba dị iche iche gụnyere Switzerland, Itali, Romenịa, Tọki nakwa Frans.

   Ka ọ dị ugbua, ọ bụ ozu mmadụ 24 ka a hụrụ ozu ha n’ọkụ ahụ. Mmadụ asatọ n’ime ha bụ ndị mba Switzerland.

   Nnyocha kwuru na ihe kpatara ọkụ ahụ bụ ihe ‘knockout’ dị na bọtụl nke e bugara nso na gbamgbam ụlọ oriri na ọṅụṅụ Le Constellation bar.

3. 4 Jenụwarị 2026Anyị ekwubeghị oge a ga-eme ntuliaka afọ 2027 - Ụlọọrụ Inec

   Ụlọọrụ Independent National Electoral Commission (Inec) ekwuola na akụkọ ahụ na-efegharị banyere usoro nakwa ụbọchị a ga-eme ntuliaka ọkwa Gọvanọ na ntuliaka ọkwa Onyeisiala afọ 2027 abụghị eziokwu.

   Nke a na-abịa dịka ozi malitere ifesa nke kwuru na a ga-eme ntuliaka ọkwa Onyeisiala na ụlọomeiwu Sineti na Febụwarị 20, 2027 ma mee nke ọkwa Gọvanọ na ụlọomeiwu steeti na Maachị 6, 2027.

   Akwụkwọ ozi ụlọọrụ onyeisioche Inec wepụtara nke Adebayo Oketola binyere aka na ya, mere ka o doo anya na ozi ahụ na-efegharị abụghị eziokwu ma kọwaa na ọ bụ ndị chọrọ itinye ọgbaaghara wepụtara ozi ahụ.

   O gara n’ihu kwuo na ụlọọrụ Inec na-erube isi nye iwu obodo kwuru na ha ga-ewepụta usoro ma kwuo ụbọchị a ga-eme ntuliaka otu afọ tupu oge ntuliaka ahụ eruo.

   Inec kwuru na ha ga-eme ka ọhanaeze mara maka usoro ntuliaka afọ 2027 ngwangwa ha wepụtara ya ma kwuo na ha ga-ebipụta ozi ahụ na websaịt nakwa soshal midia ha dị iche iche.

4. 4 Jenụwarị 2026Ụtụtụ ọma ndị be anyị

   Nnọ n'ọgbakọ BBC News Igbo taa bụ Sọnde mbụ n'ọnwa Jenụwarị, 2026.

   Ọ bụ obi aṅụrị ka anyị ji anabata gị dịka anyị na-ewetara gị akụkọ ndị ahụ gbara ọkpụrụkpụ si Naịjirịa, Afrịka nakwa mbaụwa niile taa.

   Sonyere anyi n'aka Soshal midia anyị niile maka akụkọ foto na vidio anyị ji bịa taa.

5. 3 Jenụwarị 2026Oke mkpọtụ ndị Igbo na-eme bụ ihe na-etinye ha na nsogbu na Naijiria-Joe Igbokwe

   Otu Onye otu APC ọnụ na-eru n'okwu bụ Joe Igbokwe akatọọla ihe ọ kpọrọ"oke mkpọtụ" ndị Ọwụwa Anyanwụ na-eme bụ nke o kwuru nsọgbụ ha na ndị agbụrụ ndị ọzọ na-enwe na Naijiria.

   N'akwụkwọ Ozi o degara ndị Igbo bi na n'ihu akwụkwọ Facebook ụbọchị Satọde,Igbokwe kwuru sị, "Anyị bụ ndị Igbo na-eme mkpọtụ na-ada ka egbe igwe na Naijiria."

   "Kwụsịnụ ịkpali iwe na iyija ụmụ Naijiria ndị ọzọ."

   "Agbụrụ ọbụla nọ Naijiria nwere ihe doro anya ha na-eweta."

   Okwu Joe Igbokwe na-abịa dịka ụfọdụ ndị si Ọwụwa Anayanwụ na-ewepụta ozi na soshal midia na-ekwu na ndị Igbo gara ụlọ Ekeresimesi na ọ bu ya butere ọtụtụ ebe na Legọs ji tọgbọrọ chakoo.

   Igboskwe kwuru na ọ bụ ezie na nde kwuru nde ndị Igbo bi Legọs, mana ndị Ndịda Ọwụị̀aanya si Kwara, Ondo, Oyo,Ogun,Osun, Ekiti bị na ya ma na-alakwa obodo oge Ekeresimesi.

   Ọ gara n'ihu rụtụ aka na Onye kachasị nwee ego na Naijiria bụ Aliko Dangote na ndọ ọglanga ndị ọzọ si Ugwu Awụsa na ndị Ndịda Anyanwụ anaghị eme mkpọtụ mana "Igbo na-etu ọnụ ihe anyị abụghị".

6. 3 Jenụwarị 2026Nwaanyị abụrụla onyeisioche ụlọakụ 'Fidelity Bank'

   Dịka oge Mustafa Chike-Obi pịakọrọ 'abaị 31 nke ọnwa Disemba, ụlọakụ 'Fidelity Bank' ekwụpụtala otu nwaanyị dịka ga-anọchi ya ka onyeisioche ụlọakụ ahụ.

   Amaka Onwughalu banyere Ụlọakụ Fidelity Bank' n'afọ 2020, dịka odeakwụkwọ ụlọọrụ ahụ bụ Ezinwa Unuigboje,si gbaa ama n'ozi o binyere aka ma wepụta

   Ọnwụghalụ onye gụrụ 'Economic arụọla ọrụ ụlọakụ ihe karịr afọ 30 n'ụlọakụ dị iche iche gụnyere 'Mainstreet Bank' nakwa 'Skye Bank'.

7. 3 Jenụwarị 2026Gọvanọ Mutfwang nke Platu eferela PDP aka, awụbaa APC

   Aka na-achị Platu steeti bụ Caleb Mutfwang eferela otu PDP aka ma wụbaa otu APC.

   Gọvanọ Mutfwang bụ onye banyere n'ọkwa ụ̀ọvanọ steeti ahụ mbụ ya n'abalị 29 nke ọnwa Mee afọ 2023, gbara ama na ya abanyela APC n'ozi wepụtara ụbọchị Fraide n'akara ya n'ọbaozi X.

   Ozi ahụ kwuru sị, "Taa, abalị nke abụọ n'ọnwa Jenụwarị afọ 2026, abanyela m n'otu 'All Progressives Congress'dịka ndebachara afa ma nata akwụkwọ gosiri na mụ onye otu a n'obi Gọọmentị dị na Rayfield."

   Mutfwang gara n'ikwu kwuo na ya zọpụrụ ụkwụ ahụ dịka ọ 'kpachara ya akpa'.

8. 3 Jenụwarị 2026Ala ọmajiji gburu mmadụ abụọ meruo ọtụtụ ahụ na mba Meziko

   Mmadụ abụọ nwụrụ n’ala ọmajiji mere na mba Meziko na mpaghara ndị dị icheiche na n’abalị garaaga bụ Fraịde Jenuwarị 2, 2026.

   Otu nwaanyị dị afọ 50 nwụrụ na Guerrero, dịka Gọvanọ Guerrero steeti bụ Evelyn Salgado si kwuo.

   Mana Clara Brugada bụ Meyọ na Mexico kwuru na otu nwoke dị afọ 60 nwụrụ, ebe mmadụ iri na abụọ meruru ahụ.

   Brugada kwuru na ha enwechitala ọkụ latrịk mebiri mgbe ala ọmajiji ahụ mere.

9. 3 Jenụwarị 2026Ndị Igbo, unu asaala chi?

   Ka chi fotere taa nwetere anyị na unu niile ihe ọma na obi anụrị dịka anyị na-anabata unu n'ọgbakọ BBC News Igbo taa.

   N'ụtụtụ a, ọ bụ Michael Ilediagu bu oche nọrọ mana n'ehihie ka Uche Akolisa ga-esonyere ya.

   Cheta ka ị gaa sonyere anyị na Facebook, Instagram nakwa Whatsapp Chanelụ, iji nweta akụkọ gbasara ihe niile na-eme n'ụwa.

   Nnọọ!

10. 2 Jenụwarị 2026A ka na-achọ ndị ọkụ gbagburu n’ụlọ nkwarị dị na mba Swiss

    Ndị ọrụ gbatagbata ka na-achọ ndị ọkụ gbagburu n’ụlọ nkwarị ski bụ Le Constellation dị na Crans-Montana nke mba Swiss.

    Cheta na akụkọ kwuru na mmadụ ruru iri anọ nwụrụ dịka otu narị na iri na ise ndị ọzọ merụrụ ahụ mgbe ọkụ ahụ gbara n’ụbọchị Tọzde 1 Jenụwarị, 2026.

    Otu dọkịta n’ụlọọgwụ ebe e bu ụfọdụ ndị ihe metụtara gaa sị na ụmụ ntoroọbịa dị afọ iri na ise so na ndị merụrụ ahụ a na-azọ ndụ ha.

    Etu ọ dị ugbua, amatabeghị aha maọbụ ndị bụ ndị ahụ ọkụ gbagburu maọbụ ndị merụrụ ahụ nakwa ihe kpatara ọkụ ahụ ji tiwapụ.

    Onyeisiala mba Swiss bụ Guy Parmelin sị na ọkụ ọgbụgba ahụ bụ nke kachasị njọ n’ihe ọdachi ndị merela na mba ha.

11. 2 Jenụwarị 2026Ndị Igbo, afọ ọhụrụ ọma nụ, Ọfọ anyị bụ ka afọ 2026 wetere anyị naanị ihe ọma ooo

    Nnukwu ọṅụ na ihu sara mbara ka anyị ji anabata gị n'ọgbakọ BBC News Igbo taa bụ Fraịde Eke, 2 Jenụwarị, 2026.

    N'ụtụtụ a, ọ bụ gị na Chinonso Ugorji na Marvelous Obomanu ga-anọrị tupu Uche Akolisa na Michael Ngene eburu oche n'oge ehihie.

    Gaa n'ihu sonyere anyị na Facebook, Instagram nakwa Whatsapp Chanelụ, iji nweta akụkọ gbasara ihe niile na-eme n'ụwa.

    Nnọọ!

12. 1 Jenụwarị 2026Gọọmenti ji iwu adịgboroja eme mgbawe agaghị enweta ọganịrụ - Atiku

    Atiku Abubakar bụbu osote Onyeisiala Naịjirịa ekwuola na “gọọmenti ọbụla ji iwu adịgboroja eme mgbawe agaghị enweta ọganịrụ”.

    Atiku kwuru nke a n’ime ozi afọ ọhụrụ o wepụtara n’akara soshal mịdịa ya.

    N’ime ọzị ahụ ka ọ katọrọ ọtụtụ ihe dị icheiche na-eme na Naịjirịa ọkachasị ọnọdụ ọchịchị na usoro iwu ụtụisi ọhurụ.

    N’okwu ya “naanị ihe na-eti ọtụtụ ụmụ Naịjirịa aka n’obi ugbua bụ na afọ 2025 bụ afọ e ji taa onye ọbụla ahụhụ agafeela”.

    Atiku gara n’ihu kọwaa 2025 dịka “afọ ndị ọchịhị ji kpaa agwa etu o si masị ha, taa akụnụba obodo ahụhụ, na ọchịchị na-enweghị obi ebere”.

    Ọ sị na enweghị ihe gosiri udiri gọọmentị na-achị ugbua karịa mpụ dapụtara "n’usoro ụtụisi adịgboroja" nke ha kpọrọ ‘iwu mgbawe usoro ụtụisi ọhụrụ’.

    Ọ sị na nke na-agbawa obi bụ na “Onyeisiala Naịjirịa ekweghị ka ndị omeiwu mee ihe ha kwesiri ime n’ihe a hụrụ dịka ihe ekperima ga-eme”.

    Atiku tinyekwara ọnụ n’ọnọdụ nchekwa, oke agụụ, ndị ntọ na ọgbaaghara dị icheiche ma kwuo na ọ kawara njọ n’afọ 2025.

13. 1 Jenụwarị 2026Ọkụ agbariela ụlọ azụmahịa ngwa latrik dị n’Ikotun, Legọs Steeti

    Akụkọ kwuru na ọkụ agbariela ngwa ahịa ọnụ ego ya dị nde kwuru nde naịra n’ahịa ngwa latrik dị n’Ikotun, Legọs steeti.

    Ihe onyonyo fesara na soshal midịa kwuru na n’ụtụtụ Tọzde Jenụwarị 1, 2026, gosiri nnukwu anwụrụ ọkụ na-efeli elu n’ogige ahịa ahụ dịka ndị ahịa na ndị bi na mpaghara ahụ n’ekiri anya.

    Ndị nọ oge ọkụ ihe mere kwuru na ọkụ ahụ malitere n’isi ụtụ Tọzde ma fesaa n’ike n’ụlọ ahịa ndị ọzọ dị ebe ahụ.

    Ahịa Ikotun bụ otu ahịa a ma ama nye ndị bi n’okpuru ọchịchị Alimosho na gburugburu ya.

    Ọtụtụ ndị bi na Legọs amalitela ịjụ ajụjụ banyere akụkọ banyere ọkụ na-agba ụlọ n’ebe dị iche iche na steeti ahụ.

    Cheta na ọkụ gbara ụlọọrụ Great Nigeria Building dị na ahịa Balugun na mpaghara Legos Island ma gbuo ihe ruru mmadụ ise dịka akụkọ si kwuo.

    N’ụbọchi Tuzde 30 Disemba, 2025, ọkụ gbariri ụfọdụ mpaghara ahịa Arena Market Oshodi.

    Ụlọọrụ Lagos Fire Service and Rescue Service kwuru na ebe ọkụ ahụ gbara bụ ogige ndị ahịa na-ebusa ngwa ahịa ha dị iche iche.

14. 1 Jenụwarị 2026Usoro ụtụisi ọhụrụ ga-eme ka Naịjirịa nwee ego kwado mmepe obodo ga-abara onye ọbụla uru

    Onyeisiala Naịjirịa bụ Bola Ahmed Tinubu ekwupụtala uru ụtụisi ọhụrụ o wepụtara ga-abara Naịjirịa.

    Tinubu kwuru nke a n’ozi afọ ọhụrụ o wepụtara ma nye ụmụ Naịjirịa n’akara soshal mịdịa ya.

    N’ime ọzị ahụ ka Tinubu kwuru ihe dị icheiche ọkachasị ihe gbasara usoro ụtụisi ọhụrụ ọ manyere bidoro ịdị ire n’abalị nke mbụ n’afọ 2026.

    N’okwu ya “ọchịchị anyị na-etinye ntọnaala ga-enyereaka ka Naịjirịa kwụrụ chịmchịm ma new ọganiru”.

    “Anyị nwe ndidi Naịjirịa ga-eme nkeọma n’afọ 2026 ma nọrọ n’ọnọdụ ọ ga-abụ obodo na-emepe emepe”.

    Ọ gara n’ihu kwuo na ị ha chọrọ mgbe n’oge ha jịkọtara usoro ụtụisi na Naịjirịa niile ọnụ bụ “ka Naịjirịa weta ego ma mee ka anyị nwee ike ịrụ nnukwu ọrụ gbara ọkpụrụkpụ maka mmepe obodo”.

    Ihe ndị ọzọ Onyeisiala Tinubu tinyere ọnụ gunyere ọnọdụ nchekwa na Naịjirịa.

    Ọ kwuru na “Naịjirịa na ndị nkwado ha nakwa Amerịka na-ejikọ aka ọnụ na-ebuso ndị na-enyi ọha egwu agha” ma kwenkwa na “ọchịchị yan were mmasị na nchekwa mmadụ niile”.

    N’okwu ahụ ọ ọ kpọrọ oku udo na onye ọbụla itinye aka n’ọganiri Naịjirịa.

15. 1 Jenụwarị 2026Chelsea na Enzo Maresca agbasaala ka nwunyedi abụọ di ha gara mkpọrọ

    Otu egwu bọọlụ Chelsea agbaala onyisi nchịkọta ha bụ Enzo Maresca alụkwaghịm.

    N'ozi Chelsea wepụtara n'ụbọchị mbụ nke ọnwa Jenụwarị afọ 2026 na websait ha kwụrụ sị, "Chelsea Football Club na onyeisi nchịkọta ha bụ Enzo Maresca agbasaala."

    Chelsea kọwara Enzo dịka onye du otu egwu bọọlụ ahu nweta mmeri n'asọmpi 'UEFA Conference League nakwa nke iko FIFA Club World Cup".

    Ha kelere Enzo maka ịkwalite o nyere otu egwu bọọlụ Chelsea oge ọ na-achịkọta ha.

16. 1 Jenụwarị 2026Ndị uweojii sị na ụfọdụ mmadụ anwụọla oge ihe gbawara na mba Swiss

    “Ụfọdụ” mmadụ anwụọla oge ihe gbawara, tinyere ọkụ ọgbụgba tiwapụrụ n’ogige mkporindụ dị na mba Swiss.

    Ndị uweojii kwuru na ọdachi a mere n’ụlọmmanya dị n’ogige ‘ski’ na mpaghara Crans-Montana nke mba Swiss.

    Ihe ahụ gbawara mgbe o jiri ihe dịka ọkara gaa elekere mbụ nke ime abalị n’oge mba ahụ, n’ụlọmmanya a kpọrọ Le Constellation.

    Ka ọ dị ugbua, a matabeghị ihe kpatara mgbawa ahụ.

    Otu foto a hụrụ na soshal midịa yiri nke e sere n’ogbe ụlọmmanya ahụ, gosiri ụgbọala gbatagbata nakwa opekatampe, otu ụgbọala mgbanyụọkụ.

    Ụlọmgbasaozi BBC na-agba mbọ ugbua inyocha onyonyoo ndị e fesara na soshal midịa site n’ogige mkporindụ Swiss ahụ.

17. 1 Jenụwarị 2026Ndị Igbo, afọ ọhụrụ ọma nụ, Ọfọ anyị bụ ka afọ 2026 wetere anyị naanị ihe ọma ooo

    Nnukwu ọṅụ na ihu sara mbara ka anyị ji anabata gị n'ọgbakọ BBC News Igbo taa bụ Tọzde Orie, 1 Jenụwarị, 2026.

    N'ụtụtụ a, ọ bụ gị na Chinonso Ugorji na Marvelous Obomanu ga-anọrị tupu Uche Akolisa, Michael Ngene na Michael Ilediagu eburu oche n'oge ehihie.

    Gaa n'ihu sonyere anyị na Facebook, Instagram nakwa Whatsapp Chanelụ, iji nweta akụkọ gbasara ihe niile na-eme n'ụwa.

    Nnọọ!