Ralf Rangnick 'ba ya jin dadin' aiki a Man Utd

Karanta rubutu kawai domin rage cin data
Ralf Rangnick

Asalin hoton, PA Media

Bayanan hoto, Ralf Rangnick ya yi nasara a wasanni 11 cikin 27 da ya jagoranci Manchester United a dukkanin gasar da suka buga
An wallafa

Kocin rikon-kwarya na Manchester United Ralf Rangnick ya ce "ba ya jin dadi gaba daya" na zamansa a kungiyar inda ya ce ya sa ran jagorantar United zuwa wasan cancantar shiga gasar Zakarun Turai.

United ta doke Brentford da ci 3-0 a wasan baya bayan nan da Rangnick ya jagoranta a gidan kungiyar.

Yanzu haka kungiyar ta shida a saman teburin gasar Firimiya kuma ba za ta samu gurbin shiga gasar Zakarun Turai mai zuwa ba.

"Ba na jin dadin sakamakon da muke samu, musamman a mako hudu zuwa biyar da suka gabata," in ji Rangnick.

An kori tsohon manajan United Ole Gunnar Solskjaer a watan Nuwamba, inda tsohon dan wasan kungiyar Michael Carrick ya jagorance ta ta buga wasanni uku, sai dai a watan Disamba an dauki tsohon kocin RB Leipzig Rangnick a matsayin kocin rikon-kwarya zuwa karkashe kakar wasa ta bana.

Sai dai United, wadda sau 20 tana zama gwarzuwar gasar Turai, ba ta yi katabus ba a wannan kakar wasan.

Middlesbrough ta bi su har gida ta doke su a zagaye na hudu na gasar cin Kofin FA, sannan tana bayan Manchester City da maki 25 a gasar Firimiya ta Ingila.