Sarki Charles lll ya gana da shugabannin Commonwealth a Fadar Buckingham

Rahoto kai-tsaye

Mustapha Musa Kaita, Halima Umar Saleh, Abdullahi Bello Diginza and Nasidi Adamu Yahaya

1. 9 Satumba 2022Abin da ya faru yau - da kuma abin da ake sa ran zai faru

   Idan yanzu kuka shigo wannan shafin, ga takaitaccen bayani game da abubuwan da suka faru a yau zuwa wannan lokaci.

   • Kararrawa ta kada a cocin St Paul's, da Windsor, da Westminster Abbey, an kuma harba bindigar ban-girma a daukacin kasar ga Sarauniya Elizabeth ta II
   • Sarki Charles na III ya koma birnin Landan daga Aberdeen, inda ya gaisa da dubban mutane a wajen Fadar Buckingham
   • Ya kuma gana da Firaiminista Liz Truss a Fadar Buckingham, kuma ita ce ta farko da ya fara ganawa da ita

   Abubuwan da za su faru nan gaba a yau:

   • Sabon Sarki zai yi wa al'ummar Birtaniya jawabi da karfe shida na yamma agogon kasar

   • A daidai lokacin, za a gudanar da addu'o'i na musamman ga marigayi Sarauniya Elizabeth ta II a cocin St Paul a Landan
   • Mahalarta zaman addu'o'in za su rera wakar ''Allah ya ja zamanin Sarki'' a hukumance. Za kuma a rera taken Birtaniya a kuma sauya kalamar ''Sarauniya'', zuwa kalamar ''Sarki'', a kuma sauya kalmar ''Nasara sarauniya'', zuwa kalmar ''nasara ga Sarki''.

   Ranar Asabar

   • Charles zai zama Sarki a hukumance
   • Za a dawo da tutocin Birtaniya kamar yadda suke a baya, na kwana guda. Karfe 1 na rana kuma za a yi wani biki, kuma daga bisani a mayar da su rabi.

2. 9 Satumba 2022Firaiminista ta gana da Sarki Charles a Fadar Buckingham

   Sarki Charles III ya yi ganawar farko ta gaba-da-gaba da Firaiministar Birtaniya Liz Truss a Fadar Buckingham.

   Truss, wadda a ranar Talata ne Sarauniya Isabel ta nada ta, ta kwashe kusan awa guda tana tattaunawa da sabon Sarkin.

   Daga bisani Firaiminista za ta halarci taron addu'ar da za a yi wa Sarki Elizabeth II a Cocin St Paul's da ke London da misalin karfe shida na yamma a agogon kasar.

3. 9 Satumba 2022An dage taron kungiyoyin 'yan kasuwa saboda rasuwar Sarauniya

   An tabbatar da dage babban taron kungiyar 'yan kasuwa na shekara-shekara karo na 154 da aka shirya gudanarwa a Brighton daga ranar 11 zuwa 14 ga watan Satumba.

   A sanarwar da kungiyar ta fitar a shafinta na intanet ta ce nan gaba za ta sanar lokacin da za a yi taron.

   Wannan sanarwa na zuwa ne a yayin da ake ci gaba soke gudanar da al'amura da dama a fadin Birtaniya saboda alhinin rasuwar Sarauniyar.

4. 9 Satumba 2022Sarki Charles III ya gaishe da dimbin mutanen da ke wajen Fadar Buckingham

   Dimbin jama'a ne suka rika gaisawa da Sarki Charles III a wajen Fadar Buckingham a yayin da ya isa can ranar Juma'a.

   Hakan ka iya zama wata alama ta irin salon mulkin da zai gudanar. A yayin da yake gaisawa da mutanen, Sarki Charles ya nuna dattako, inda ya dan rika yin magana da su, wani zubin ma har da raha.

   A baya dai ya kasance mutum mai daukar abubuwa da muhimmanci, kuma yana da kaffa-kaffa, amma yanzu yana haba-haba da jama'a.

   Isar Sarkin London ta kasance wani bangare na ayyukan da ke gabansa a kwanakin da ke tafe. Mahaifiyarsa ta rasu, kuma a lokaci guda ana sanya shi ya fuskanci jama'a, gaba-da-gaba da kuma ta kafar talbijin.

   Yana jimamin rasuwar Sarauniya Isabel, kuma a lokaci guda yana shirin soma daya daga cikin ayyuka mafi wahala a duniya.

5. 9 Satumba 2022Sarki Charles III zai yi jawabi da karfe shida na yamma - Shugaban majalisar dokoki

   Shugaban majalisar dokokin Birtaniya Sir Lindsay Hoyle ya ce da misalin karfe 6:00 na yamma agogon kasar ne, wato karfe 7:00 na yamma agogon Najeriya Sarki Charles III zai yi wa kasar jawabi.

   Ya ci gaba da cewa ''bayan da aka yi bikin nadinta a matsayin Sarauniya a watan Fabrairun 1952, ta je Westminster a karon farko cikin watan Nuwambar 1952, domin bude majalisar dokokin kasar, a lokacin Winston Churchill da William Morrison ke matsayin Firaiminista da shugaban majalisar dokokin kasar, kimanin shekara 70 da suka shude''

   Ya kara da cewa a tsawon mulkin Sarauniyar ta yi zamani da shugabannin majalisar dokoki guda 10, tare da gudanar da manyan zabukan kasa 18.

6. 9 Satumba 2022'Yadda Sarauniya ke karfafa wa matasa gwiwa'

   Daya daga cikin abubuwan da marigayiyar ta yi fice a kansa, shi ne jan matasa a jika tare da karfafa musu gwiwwa

   Dakta Ahmed Adamu, Malami a Jami'ar Nile da ke Abuja, ɗaya ne daga cikin matasan da suka taɓa ganawa da marigayiyar a lokacin da yake shugabantar ƙungiyar ɗalibai ƴan ƙasashen Commonwealth.

   Ga abin da kuma ya shaida wa BBC ''Na fara haduwa da ita a Australiya a taron kungiyar commonwealth lokacin ina shugabantar matasan wannan kungiya, sannan mun sha ziyartarta a gidanta, da bikin ranar tunawa da kungiyar commonwealth, tana ziyaratar mu a sakatariyar kungiyar, mun hadu da ita ya kai sau takwas''

   Ya ce Takan mai da hankali domin sanin labarin duk mutumin da ta hadu da shi

   ''A lokacin da ta ganni a taron commonwealth ta tambayeni cewa kai me kake yi a kasarka da har ka samu zuwa wannan taro?

   ''Gaskiya na yi jimamin mutuwarta, duniya ta girgiza, ni ma na girgizu'' in ji shi

7. 9 Satumba 2022Sarki da matarsa sun shiga fadar Buckingham

   A karon farko Sarki Charles lll ya shiga fadar Buckingham a matsayin sarkin Burtaniya

   Sarkin na tare da matarsa, kuma a nan gaba kadan ne ake sa ran zai yi wa 'yan kasar jawabi

8. 9 Satumba 2022Ana harba bindigogi sama a fadin Birtaniya domin girmamawa ga Sarauniya

   Ana ta harba bindigogi sama domin nuna girmamawa ga sarauniya Elizabeth II a fadin Birtaniya.

   An harba bindigogin a fadar Cardiff, da gidan sarautar Edinburgh da kuma Fadar Hillsborough a Birtaniya.

   Haka kuma an yi irin wannan girmamawa a Gibraltar da Jersey, da hasumiyar birnin Landan da kuma Dandalin Hyde Park.

9. 9 Satumba 2022Cincirindon mutane sun taru a wajen fadar Buckingham domin ganin Sarki Charles lll

   Hotunan da aka dauka daga sama sun nuna dandazon mutane a wajen fadar Buckingham yayin da suke jiran isowar sabon Sarkin

10. 9 Satumba 2022Sarki Charles III ya isa birnin Landan

11. 9 Satumba 2022Sarauniya Elizabeth: Daya daga mutum 10 mafiya dace a ƙarnin bara da bana a duniya

    Daga Rahama Abdulmajid, mai sharhi kan al’amuran yau da kullum, ta wallafa wannan sharhi a shafinta na Facebook.

    Na san tunanin masu karatu shi ne su ce wannan baiwar Allah ta yi sa'ar sarauta ko? To da wannan ɗin ma amma ba shi kadai ba ne dacenta a rayuwa, akwai wasu kamar 12.

    Ga su kamar haka:

    1. Tana cikin tsafaffin da suka ci duniya da tsinke cikin matsanancin ƙoshin lafiya har shekara 96 ba tare da ana jelan asibiti saboda cutar kansa da sauran ciwuka ba.

    2. Ta girma da iyayenta ba tare da ta taba ganin wani abu mai suna rashi ko a nemi abu a ce maka babu ba.

    3. Shekararta 73 da igiyar aurenta har sai da ta yi wa mijinta takaba, sabanin yadda auren manyan mutane ke saurin mutuwa a kasashen duniya.

    4. Ba ta taɓa binne 'ya'yanta ba, duka huɗun sun girma a gabanta, su ma sun ga 'ya'yansu, 'ya'yansu ma sun ga ƴaƴansu kuma duk tana raye wato dai ta ga tattaɓa kunnenta.

    5. Akwai ikirarin cewa ta fi kowane Sarki asali tun daga asalin addinai har na sarauta inda a kiristanci kakanninta ne suka kirkiri Darikar Anglica.

    6. Hotonta ne a daya daga cikin kudade mafiya daraja a duniya wato fan (£) wanda ƙwaya ɗaya yake daidai da Naira 757.

    7. Shekara 70 tana sarauta wanda hakan ya ba ta damar zama Sarauniya mafi dadewa a tarihin Ingila da ma na duniyar ƙarni na 21. Ta ga bikin Silver, ta ga na Golden, ta ga na Diamond ta kuma sake ganin na Plantinium duka na sarautarta.

    8. Ta mulki kasashe da dauloli 31 daya a zamanin da ake cewa rana ba ta taɓa faduwa a sarautar Ingila ba, kuma har yanzu cikin wadannan kasashen akwai 14 da ke karkashinta.

    9. Ita ce wadda ba ta bukatar kowane irin katin shaida wato ID card har fasfo na tafiye-tafiye kuma babu inda take bukatar biza kafin ta shiga wata kasa.

    10. Ba ta taɓa amfani da sunan mijinta a jerin sunayenta ba, sai dai shi ake alakantawa da Mijin Sarauniya.

    11. Tana jin sama da manyan yarukan duniya bakwai a yayin da yaren ƙasarta ya fi kowane yare daukaka a duniya cikin karnin bara da bana.

    12. Sau biyu ake maulidinta a duk shekara, ta yi ranar bikin haihuwarta na ainihi ta yi bikinta da kanta sai kuma ranar bikin da an sabawa duniya a tsakanin Mayu da Yuni.

    13. Ita ce matar da ake sa ran idan ta mutu har tattalin arzikin duniya sai ya girgiza, domin za a sauke tuta sama da 14 a fadin duniya.

    Za a sauya hoton daya daga kudaden duniya mafi daraja wato Fan, sannan za a yi tururuwar zuwa zaman makoki da gaisuwar mutuwa irin wanda ba a taɓa gani a wannan ƙarnin ba.

12. 9 Satumba 2022Duk da yana cikin alhini amma ya nuna kwarin gwiwa da zumma - Truss

    A yayin da take gabatar da jawabi ga zauren majalisar dokoki, firaiministar Birtaniya Liz Truss ta ce ta yi magana da Sarki Charles III jiya da daddare.

    Ta ci gaba da cewa ''Duk da yana cikin alhini da jimamin rasuwa, ya nuna kwarin gwiwa da zummar mulki''

    Mrs Liz ta yaba wa Sarki Charles III, dangane da 'gagarumar gudunmawa' da ya bayar ta bangaren ilimi, ta kara da cewa ''za mu ci gaba da bashi hadin kanmu."

    ''Lallai masarauta ta kadu, haka kuma kasarmu ta kadu."

    ''Kuma da wannan nake cewa Allah ya ja zamanin sarki'', in ji Firaiministar.

13. 9 Satumba 2022Majalisar dokokin Birtaniya na jimamin rasuwar Sarauniya

    'Yan majlisar dokokin Birtaniya sun taru a zauren majalisar domin nuna alhininsu game da rasuwar Sarauniya

    Shugaban majalisar Sir Lindsay Hoyle ne ya bude zaman da jawabin tunawa da sarauniyar.

    Bayan jawabin nasa ne kuma Firaiminista Liz Truss da shugaban jam'iyyar Labour Keir Starmer za su yi nasu jawaban

14. 9 Satumba 2022An soke gudanar da yajin aiki a Birtaniya bayan rasuwar Sarauniya

    Wasu manyan kungiyoyin ma'aikata da ke shirin gudanar da yajin aiki a Birtaniya sun fasa saboda rasuwar Sarauniya.

    Kungiyar ma'aikatan aika sakon gidan waya, da ta ma'aikatan jiragen kasa sun ce ''Saboda girmama yadda Sarauniyar da iyalanta suka bauta wa kasa'' ne ya sa suka fasa yajin aikin da suka kuduri aniyar yi a fadin kasar.

    Sarauniya Elizabeth ta biyu, Basarakiyar da ta fi dadewa a kan karagar mulki, ta mutu ne tana da shekara 96 a duniya, bayan ta shafe tsawo shekara 70 tana a kan karagar mulki.

    Wasu shaguna za su kasance a rufe na dan wani lokaci saboda girmamawa ga Sarauniyar.

    A sanarwar ta suka fitar ma'aikatan aika sakon gidan waya, sun ce sun dakatar da aniyarsu na shiga yajin aikin da suka shirya yi yau Juma'a 9 ga watan Satumba, haka suma takwarorinsu ma'aikatan jiragen kasa sun ce sun dage yajin aikin da suka shirya gudanarwa ranar 15 da 17 ga wannan wata na Satumba.

    Haka ita ma kungiyar direbobin jiragen kasa sun dage yajin aikin da suka shirya gudanarwa ranar 15 ga watan Satumba.

15. 9 Satumba 2022Tarihin Sarauniya Elizabeth ll a takaice

16. 9 Satumba 2022Sarki Charles ya bar fadar Balmoral

    Sabon Sarkin Burtaniya Charles ya bar fadar Balmoral da ke Scotland, tare da matarsa Camilla, wacce yanzu za a rika kira da Queen Consort

    Ana sa ran sabon Sarkin zai dawo zuwa birnin Landan domin ganawa da Firaminista nan gaba a yau.

17. 9 Satumba 2022Masarautar Burtaniya ta bayyana tsawon lokacin makokin Sarauniya

    Fadar Buckingham ta bayyana tsawon lokacin da za ta dauka tana makokin rasuwar Sarauniya, inda lokacin zai fara daga yanzu zuwa kwana bakwai bayan jana'izar Saruniyar.

    Kawo yanzu dai ba a bayyana ranar jana'izar Sarauniyar ba.

    A sanarwar da ta fitar, fadar ta ce ''Bayan rasuwar mai martaba Sarauniya, mai martaba Sarki na son sanar da al'umar Burtaniya cewa fada za ta fara makoki ne daga yanzu, har zuwa kwana bakwai bayan jana'izar Sarauniya''.

    Baya ga makokin kasa da ake sa ran firaminista za ta sanar yau, makokin fada shi ne makokin da iyalan gidan Sarauta, da ma'aikatan fadar, da wakilan fadar a wurare da kasashe daban-daban, tare da sojoji da da jami'an tsaron da ke aiki a fada.

18. 9 Satumba 2022Wadanne abubuwa ne ake sa ran faruwar su a yau?

    A yau ne sabon Sarki Charles na uku zai bar fadar Balmoral da ke Scotland zuwa birnin Landan tare da matarsa Camilla, wadda yanzu ta zama sabuwar sarauniyar Consort.

    Kawo yanzu dai ba a tabbatar da abubuwan da za su faru ba, to amma ga jerin abubuwan da muke tunanin faruwar su a wunin yau.

    • Sabon Sarki zai gana da Firaminista Liz Truss a fadar Buckingham.

    • Da rana kuma ana sa ran 'yan majalisar dokokin Burtaniya za su taru domin nuna girmamawa ga Sarauniyar.
    • Haka kuma da tsakar rana ne za kada kararrawa domin nuna alhinin rasuwar Sarauniyar a gidajen sarautar Westminster Abbey, da kuma fadarta da ke Windsor

    • Da misalin karfe daya na rana za a harba bindigogi sama a dandalin Hyde Park domin nuna girmamawa ga Sarauniyar

    • Firaminista tare da manyan ministoci za su halarci taron addu'o'i a Cocin St Paul's Cathedral
    • Ana kuma sa ran gwamnati za ta sanar da lokacin da za a dauka ana makoki.

    • Sannan ana sa ran Sabon sarkin zai yi jawabinsa na farko ga 'yan kasar a gidan Talabijin a matsayinsa na sabon shugaban gwamnati.

    Ku ci gaba da kasancewa da mu domin kawo muku abubuwan da ke faruwa a gaba-dayan wunin yau.

19. 9 Satumba 2022Yarima Harry ya bar fadar Balmoral

    Da misalin karfe Takwas na safe agogon kasar ne Yarima Harry ya bar fadar Balmoral, cikin tawagar motoci guda biyu .

    Tun da farko dai dama matarsa Meghan ba ta biyo shi zuwa fadar ta Balmoral da ke Scotland.

20. 9 Satumba 2022An ɗage tare da soke harkokin wasanni a Burtaniya don alhinin rashin Sarauniya

    An soke tare da ɗage harkokin wasanni a sassan Burtaniya sakamakon mutuwar Sarauniya Elizabeth ta biyu inda fitattu a ɓangaren wasanni ke ci gaba da karrama marigayiyar.

    Gwarzon ɗan ƙwallon ƙafar nan ɗan Brazil, Pele ya ce Sarauniyar ta kasance tana burge shi tun bayan da ya fara haɗuwa da ita a 1968.

    Shi kuwa Roger Federer, gwarzon ɗan wasan Tennis na maza ya ce za a ci gaba da tunawa da ita tsawon rayuwa.

    Hukumar kula da tseren doki ta Burtaniya ta dakatar da duk wata gasa tsakanin jiya Alhamis da yau Juma'a tare da cewa ana alhinin mutuwar Sarauniyar da ta damu da dawakai.

    Kazalika an soke wasan ƙwallon cricket na maza tsakanin Ingila da Afirka ta Kudu da aka shirya yi a yau.

    An kuma ɗage wasanni biyu na league ɗin Ingila da aka tsara bugawa a yau.