Man United ta tsawaita kwantiragin Harry Maguire

Kocin ƙungiyar ƙwallon ƙafa ta Manchester United, Ruben Amorim, ya tabbatar da tsawaita kwantiragin Harry Maguire.

Yayin da yake jawabi a taron manema labarai, Mista Amorim ya ce ƙungiyar ta tsawaita kwantiragin ɗanwasan da shekara ɗaya.

Ɗanwasan bayan mai shekara 31, ya koma United daga Leicester City a shekarar 2019, kuma a wannan kakar kwantiraginsa zai ƙare, amma yanzu zai ci gaba da zama a ƙungiyar har zuwa watan Yunin 2026.

Maguire ya yi wa United wasa 222 tare da cin ƙwallo 12, sannan ya taimaka wa ƙungiyar lashe manyan kofuna biyu na Carabao a 2023 da FA a 2024.

Ɗanwasan na Ingila ya yi wasa bakwai ƙarƙashin sabon koci Amorim, kuma yadda ya iya salon buga wasa da 'yanwasan baya uku a Ingila ya ba shi damar haskawa a tsarin sabon kocin, musammnan a nasarar da United ta samu kan Man City a wasansu na baya-bayan nan.

Haka nan, Amorim ya tabbatar da cewa akwai wasu 'yanwasan da ke dab da tsawaita kwantiraginsu.