Man United ta kasa daukar fansa a kan Bournemouth

Ranar Asabar Manchester United ta je ta tashi 2-2 a gidan Bournemouth a wasan mako na 33 a Premier League.

A minti na 16 da fara wasa ne Bournemouth ta fara cin kwallo ta hannun Dominic Solanke daga baya Bruno Fernandes ya farke saura minti 14 su je hutu.

Bayan da suka sha ruwa suka koma zagaye na biyu ne Bournemouth ta kara na biyu ta hannun Justin Kluivert, sai Fernandes ya kara farkewa a bugun fenariti.

Da wannan sakamakon Manchester United ta koma ta bakwai da maki 50 ranar Asabar, ita kuwa Bournemouth mai maki 42 tana ta 12.

Ranar 9 ga watan Disamba, Bournemouth ta je Old Trafford ta doke United 3-0, inda Dominic Solanke da Philip Billing da kuma Marcos Senesi suka ci mata kwallaye.

Manchester United wadda ta kare ta ukun teburin Premier a bara na fatan daukar koda kofi daya ne a bana, wadda take cikin FA Cup zagayen daf da karshe.

Ranar 21 ga watan Afirilu United za ta buga zagayen daf da karshe da Coventry City a FA Cup a Wembley.

Tuni aka yi waje da United a cikin rukuni a Champions League a bana, sannan Newcastle United ta fitar da ita a Carabao Cup, wanda ta lashe a bara.

Wasannin dake gaban Manchester United a bana:

FA Cup Lahadi 21 ga watan Afirilu

Premier League Laraba 24 ga watan Afirilu

Premier League Asabar 27ga watan Afirilu

Premier League Litinin 6 ga watan Mayu

Premier League Lahadi 12 ga watan Mayu

Premier League Laraba 15 ga watan Mayu

Premier League Lahadi 19 ga watan Mayu