Jota ba zai buga wasan Liverpool da Arsenal ba
Asalin hoton, Getty Images
Kocin Liverpool Arne Slot ya ce ɗan wasan gaba Diogo Jota ba zai buga wasan Premier da za su yi da Arsenal ranar Lahadi ba.
An maye gurbin Jota ne a nasarar da suka yi da Chelsea a ranar Lahadin da ta gabata bayan ya samu rauni a kirji lokacin da suka yi karo da ɗan wasan baya na Blues Tosin Adarabioyo.
Ɗan wasan na Portugal bai buga wasan da Liverpool ta doke RB Leipzig a gasar cin kofin zakarun Turai ba a ranar Laraba ba kuma ba zai buga wasan da za su kara da Gunners ba a ranar Lahadi, tare da ɗan wasan gefe Federico Chiesa.
Mai tsaron raga Alisson Becker ya ci gaba da jinya sakamakon raunin da ya ji a wasan da suka yi nasara a Crystal Palace ranar 5 ga watan Oktoba kuma ana sa ran zai dawo a tsakiyar watan Nuwamba.
Liverpool ce ke kan gaba a teburin gasar Firimiya kafin wasannin wanna makon kuma tana da tazarar maki huɗu a kan Gunners da ke matsayi na uku, wanda Slot ya ce sun yi wa Reds nisa cikin shekaru biyu da suka gabata.
