Man United ta kammala ɗaukar Dorgu daga Lecce
Asalin hoton, Getty Images
Manchester United ta kammala ɗaukar mai tsaron bayan tawagar Denmark, Patrick Dorgu daga Lecce kan yarjejeniyar kaka biyar da rabi.
Ƙudin da aka yi cinikin ɗan wasan mai shekara 20-ya kai £25m da karin £4.1m na tsarabe-tsarabe.
Dorgu ya buga wa Lecce wasa 57 tun lokacin da ya fara taka mata leda a bara, bayan da ya koma ƙungiyar a matashi a 2022.
An hakura da batun cewar Tyrell Malacia, mai shekara 25 da zai koma Benfica ta Portugal.
An tsara cewar Marcus Rashford zai je a auna koshin lafiyarsa kafin a ruffe kasuwar cinikin ƴan ƙwallo ranar Litinin, wanda zai koma wasannin aro a Aston Villa.
Rabonda Rashford ya yi wa United wasa tun ajiye shi da koci, Ruben Amorim ya yi a karawa da Manchester City ranar 12 ga watan Disamba.
An gabatar da Patrick Dorgu da Ayden Heaven a gaban magoya baya, kafin take wasan Premier League tsakanin United da Crystal Palace ranar Lahadi.
Dorgu shi ne na biyu da United ta ɗauka a Janairun nan, bayan ɗan wasan tawagar Ingila mai shekara 19, Ayden Heaven daga Arsenal.
Asalin hoton, Getty Images
