Ten Hag ya ji daɗin rashin tafiyar Maguire

Erik ten Hag ya ce ya yi farin ciki da Harry Maguire ya ci gaba da zama a Manchester United - kuma a yanzu dole ne mai tsaron bayan ya yi yaki domin dawo da matsayinsa a kungiyar.

Maguire - wanda aka fara da shi a wasan firimiya takwas kacal a kakar wasan data gabata - ya shirya komawa West Ham amma cinikin na fam miliyan 30 ya warware.

Dan wasan bayan na Ingila, mai shekara 30, yana son sake buga wasa akai-akai, kuma kocin United Ten Hag ya ce ya kamata ya yi yunkuri amfani da duk damar da zai samu.

Maguire, wanda ya yi fama da rashin buga wasanni sosai a kakar da ta gabata, an cire shi daga mukamin kyaftin ɗin kungiyar a watan Yuli. Ya rike mukamin tun watan Janairun 2020.

Ya kasance dan wasa da ba a yi amfani da shi ba a nasarar da United ta yi a kan Wolves a gasar Premier ranar Litinin.