Arsenal ta fara kakar Premier ta bana da kafar dama

Arsenal ta fara kakar Premier League ta bana da kafar dama, bayan da ta hada maki uku a kan Nottingham Forest.

Arsenal ta fara zura kwallo a raga ta Eddie Nketiah a minti na 26 da fara tamaula, sannan Bukayo Saka ya ci na biyu a minti na 32.

Haka suka je hutu Arsenal, wadda ta dauki Community Shield a bana tana da kwallo 2-0 a raga.

An fara wasan da lattin minti 30, bayan da aka samu matsala a bangaren tikiti da ta kai magoya baya da yawa ba su shiga fili ba a kan kari.

Sauran minti takwas a tashi daga karawar Taiwo Awoniyi, wanda ya shiga karawar daga baya ya zare daya daga biyun da aka zuwa wa Nottingham Forest.

Arsenal wadda ta yi ta biyu a bara a Premier League za ta ziyarci Crystal Palace ranar Litinin 21 ga watan Agusta a wasa na biyu a babbar gasar tamaula ta Ingila.

Ita kuwa Nottingham Forsest za ta karbi bakuncin Sheffield United ranar Juma'a 18 ga watan Agusta.