Liverpool ta koma ta biyu a Premier League
Asalin hoton, Getty Images
Liverpool ta koma ta biyun teburin Premier League, bayan da ta ci Fulham 3-1 a Craven Cottage wasan mako na 34.
Liverpool ce ta fara zura kwallo a raga ta hannun Trent Alexander-Arnold a bugun tazara, daga baya Fulham ta farke ta hannun Timothy Castagne.
Daga baya ne Liverpool ta kara na biyu ta hannun Ryan Gravenberch, sannan Diogo Jota ya zura na uku a raga a Craven Cottage.
Kwallo na 100 da Jota ya ci a babbar gasar tamaula ta Ingila a dukkan fafatawa, wanda ya zura 44 lokacin da yake Wolverhampton da kuma 56 a Liverpool.
Da wannan sakamakon Liverpool ta koma ta biyu da maki da maki 74, iri daya da na Arsenal, wadda take kan teburi, sakamakon cin Wolves 2-0 ranar Asabar a Molinuex.
Manchester City, wadda ta kai wasan karshe a FA Cup ranar Asabar, bayan doke Chelsea tana ta ukun teburi da maki 73.
Wannan shi ne wasa na hudu da suka kara a tsakaninsu a bana:
2023/2024
League Cup Laraba 24 ga watan Janairun 2024
- Fulham 1 - 1 Liverpool
League Cup Laraba 10 ga watan Janairun 2024
- Liverpool 2 - 1 Fulham
Premier League Lahadi 3 ga watan Disambar 2023
- Liverpool 4 - 3 Fulham
Liverpool ba ta yi rashin nasara ba a wasa na shida a Premier League a Craven Cottage kenan, wadda ta yi nasara biyar da canjaras daya.
Wasa daya Fulham ta yi nasara a karawa 14 baya da ta fuskanci Liverpool a dukkan fafatawa da canjaras uku da rashin nasara 10.
Liverpool, wadda aka yi waje da ita a Europa League na bana za ta buga wasan Premier League na gaba a gidan Everton ranar Laraba 24 ga watan Afririlu.
