ISIS ta sanar da kashe shugabanta tare da naɗa wani sabo

Kungiyar masu iƙirarin jihadi ta IS ta sanar da rasuwar shugabanta, Abu al-Hassan al-Hashemi al-Qurayshi.

Wani saƙon murya na kakakin ƙungiyar ya ce an kashe shi ne lokacin yana fada da wadanda ya kira "makiya ubangiji", amma kuma bai yi wani karin bayani ba.

A watan Maris ya zama shugaba bayan da tsohon shugaban ya kashe kansa a lokacin da dakarun Amurka suka kai masa hari a arewa maso yammacin Syria.

Kakakin ya ce sabon shugaban shi ne Abu al-Hussein al-Husseini al-Qurayshi amma ba a bayyana kasar da ya fito ba.

Sai dai ya bayyana Abu al-Hussein a matsayin gogaggen dan jihadi sa'annan ya bukaci 'yan kungiyar su yi masa mubaya'a.

A wani sako a shafin Telegram ƙungiyar al-Qaeda ta ce an dade da kashe shugaban na IS.

Ana tunanin cewa kungiyar IS na da mayaka tsakanin 6,000 zuwa 10,000 a kasashen Iraƙi da Syria.

Majalisar Ɗinkin duniya ta ce ƙungiyar na da mabiya sosai a ƙasashen Afghanistan da Somalia da kuma tafkin Chadi.