Chelsea ta ɗauki aron Sancho daga Man United
Asalin hoton, Getty Images
Chelsea ta kammala ɗaukar aron ɗan wasan Manchester United, Jadon Sancho zuwa karshen kakar bana.
Cikin ƙunshin yarjejeniyar, Chelsea za ta iya sayen Sancho mai shekara 24 kan £20 zuwa 25m a baɗi idan ya taka rawar gani.
Sancho ya koma United kan £73m daga Borussia Dortmund a Yulin 2021, amma sai ya ci karo da koma baya a Old Trafford.
Ya buga karawa 83 a kaka uku a United, daga baya ya samu saɓani da Erik Ten Hag, wanda ya bukaci ɗan wasan tawagar Ingila ya koma yin atisaye shi kaɗai.
Ɗan wasan ya je aro a Dortmund daga Janairu, inda ƙungiyar Jamus ta kai wasan karshe a Champions League, wanda Real Madrid ta lashe kofin a Wembley.
Sancho ya koma United kan fara kakar nan, amma bai buga wasa biyu na Premier League ba da ta fara a kakar nan.
Rabon da ya buga wa tawagar Ingila tamaula tun 2021, wanda ba a gayyata gasar cin kofin duniya a Qatar a 2022 ba da Euro 2024.
