Kana amfani da shafin BBC mai bayyana rubutu kawai (babu hoto) domin rage cin data. Idan ana so a ga hotuna da bidiyo sai a koma babban shafinmu.
Mbappe na gaban Haaland a cin kwallaye a Champions League
Kyalian Mbappe shi ne kan gaba a jerin wadanda suka ci kwallaye a Champions League kakar 2022/23 kawo yanzu.
Dan wasan tawagar Faransa yana da shida a raga, bayan da ya ci Maccabi Haifa biyu a wasan da Paris St Germain ta yi nasara da ci 7-2 ranar Talata.
Kungiyoyin sun buga wasa na biyar-biyar a cikin rukuni a babbar gasar tamaula ta Zakarun Turai ranar Talata.
Tuni PSG ta kai zagaye na biyu da maki 11, iri daya da na Benfica wadda ta doke Juventus 4-3 a Portugal.
Sauran da ke biye da Mbappe a cin kwallaye a Champions League sun hada da Erling Haaland da Robert Lewandowski da Mohamed Salah da kowanne yake da biyar-biyar.
Wadanda ke kan gaba a cin kwallaye a Champions League a 2022/23
- Kylian Mbappe Paris Saint-Germain 6
- Erling Haaland Manchester City 5
- Frantzdy Pierrot Maccabi Haifa 5
- Mislav Orsic Dinamo Zagreb 5
- Robert Lewandowski Barcelona 5
- Mohamed Salah Liverpool 5
- Jude Bellingham Borussia Dortmund 4
- Rafa Silva Benfica 4
- Leroy Sane Bayern Munich 4
- Giacomo Raspadori Napoli 4
Haaland shi ne kan gaba a cin kwallo, bayan da ya zura biyu a ragar Copenhagen a wasa na uku a cikin rukuni, amma bai yi karawa ta hudu ba.
Sannan bai zura kwallo ba a raga a wasa da Dortmund a Jamus da City ta tashi 0-0. ranar Talata
Barcelona za ta kara da Bayern Munich, watakila Lewandowski ya yi wani abun, haka ita kuwa Liverpool ta ziyarci Ajax - kila Salah ya kara nuna kansa ranar Laraba.