Roberto de Zerbi zai bar Brighton bayan wasan Man United
Asalin hoton, Getty Images
Roberto de Zerbi zai bar Brighton bayan buga wasan karshe a Premier League da za su karbi bakuncin Manchester United ranar Lahadi.
Shugaban ƙungiyar, Tony Bloom ya sanar cewar sun cimma yarjejeniya da kociyan dan ƙasar Italiya da su raba gari a tsakaninsu.
De Zerbi, tsohon kociyan Shakhtar Donetsk mai shekara 44, ya karbi aikin jan ragamar Brighton cikin Satumbar 2022 kan yarjejeniyar shekara hudu.
Brighton ta kammala kakar bara a mataki na shida gurbi mafi girma da kungiyar ta taka, hakan ya ba ta damar shiga gasar zakarun Turai karon farko a tarihinta.
A gasar zakarun Turai din ta bana, Brighton ta yi nasara a kan Ajax da Marseille da AEK Athens, wadda ta yi ta ɗaya a teburin rukuni.
Daga baya ne aka yi waje da kungiyar dake buga Premier League a zagayen ƴan 16, bayan rashin nasara a hannun Roma.
A kakar bana ƙungiyar tana ta 10 a teburin Premier League, wadda koda ta buga wasan karshe ranar Lahadi ba damar ta haura matakin da take a yanzu haka.
