Zaha ya koma buga wasannin aro a Charlotte ta Amurka

Wilfried Zaha ya koma buga wasannin aro a gasar tamaula ta Amurka a ƙungiyar Charlotte FC, kan yarjejeniyar zuwa Janairun 2026.

Haka kuma da zarar Zaha ya taka rawar gani, za a iya tsawaita masa zuwa karshen Yunin 2026.

Tsohon ɗan wasan Crystal Palace yana buga wasannin aro a Lyon daga Galatasaray ta Turkiya.

Ya buga wa ƙungiyar Faransa wasa shida a kakar nan, biyar daga ciki a matakin sauyin ɗan wasa.

Zaha, mai shekara 32, ya yi wa Palace karawa 458, shi ne na uku a yawan yi wa ƙungiyar wasanni, wanda ya ci ƙwallo 90.

Ya koma Manchester United a 2013, sai ya sake komawa Selhurst Park kaka ɗaya tsakani a matakin aro.

Ɗan wasan tawagar Ivory Coast ya koma Galatasaray kan yarjejeniyar kaka uku, bayan da yarjejeniyarsa ya kare a Palace a kakar 2023.

A kakarsa ta farko a Turkiya, Zaka ya zura ƙwallo 10 ya bayar da biyar aka zura a raga a wasa 42 lokacin da Galatasaray ta lashe babban kofin tamaula na Turkiya.