Mount ya ci Aston Villa kwallo biyu da Chelsea ta koma ta hudu
Asalin hoton, Getty Images
Chelsea ta doke Aston Villa da ci 2-0 a wasan mako na 11 a gasar Premier League da suka kara ranar Lahadi a Villa Park.
Minti shida da fara wasa, Chelsea ta zura kwallo a raga ta hannun Mason Mount, shi ne ya kara na biyu a zagaye na biyu a karawar.
Wannan shi ne karo na uku da Mount ya ci kwallo biyu ko fiye da haka a Premier League da yake yi wa Chelsea.
A kakar 2021 cikin watan Oktoban, Mason ya ci Norwich City uku, sannan ya zura biyu a ragar Southampton cikin watan Aprilun 2022.
Sabon koci, Graham Potter ya ci wasa uku a jere da fara jan ragamr Chelsea a Premier League a kakar nan, tun bayan da ya maye gurbin Thomas Tuchel.
Da wannan sakamakon Chelsea wadda ta yi wasa takwas a babbar gasar tamaula ta Ingila, tana ta hudu a teburin Premier da maki 16.
Ranar 19 ga watan Oktoba, Chelsea za ta ziyarci Brentford a wasanta na gaba a Premier League.
Ita kuwa Aston Villa za ta ziyarci Fulham ranar Alhamis 20 ga watan Oktoba.
