Martinez da Cubarsi sun buga wa Barcelona wasa na 50 kowanne
Asalin hoton, Getty Images
Masu tsaron bayan Baarcelona, Inigo Martinez da Pau Cubarsí sun buga wa ƙungiyar wasa 50 kowanne ranar Asabar.
A ranar ce Barcelona ta kai zagayen ƴan 16 a Copa del Rey, bayan da ta doke Barbastro 4-0.
A wasan ne Barcelona ta fara amfani da Szczęsny da kuma Toni Fernández a karon farko, yayin da Martinez da Cubarsí kowanne ya yi karawa ta 50 a ƙungiyar.
An fara wasan na ranar Asabar da Martinez daga baya aka sauya shi a minti na 62, inda Cubarsi ya shiga madadinsa.
Cubarsi ya fara yi wa Barcelona tamaula a Janairun 2024 a karawar Copa del Rey da Unionistas.
Shi kuwa Martinez ya koma Baarcelona tun kan fara kakar 2023, wanda ya fara yi mata wasa cikin watan Satumbar 2023 a gasar La Liga da Osasuna.
A kakar bana ya yi karawa 26, inda Barcelona ke fatan ƴan wasan za su zama fitattu a nan gaba a duniya.
