'Liverpool da Bayern na son naɗa Alonso a matsayin koci'

Shugaban ƙungiyar Bayern Munich na jeka na yika Uli Hoeness ya ce ƙungiyarsa da Liverpool na hammaya da juna domin naɗa Xabi Alonso a matsayin manaja.

Alonso ya murza leda a ƙungiyoyin biyu kuma yana kan hanyarsa ta jagorantar Bayer Leverkusen domin lashe kofin gasar Bundesliga a karon farko a tarihin ƙungiyar.

Bayern da Liverpool na neman wanda za su bai wa kocin ƙungiyoyinsu a bazarar bana.

"Kungiyoyi kamar Liverpool Real Madrid, Leverkusen da FC Bayern, suna aiki a kansa," in ji Hoeness.

"Ya nuna cewa shi babban kocin ne. Akwai matukar wuya samun kocin da bai da aiki."

Thomas Tuchel zai bar Bayern Munich a ƙarshen kakar wasa ta bana a yayin da Jurgen Klopp ya sanar da cewa zai bar Liverpool.

Kocin Real Madrid Carlo Ancelotti ya sabunta yarjejeniyarsa har zuwa shekara ta 2026.

Alonso ya shafe shekaru biyar a matsayin ɗan wasan Real bayan ya bar Liverpool sannan daga Real ya tafi Bayern.

Yarjejeniyar Alonso a Leverkusen za ta kare ne a 2026.