Carvalho ya koma buga wasannin aro a Hull City

Hull City mai buga Championship ta dauki aron dan kwallon Liverpool, Fabio Carvalho zuwa karshen kakar bana.

Mai shekara 21 dan kwallon tawagar Portugal, ya buga wasannin aro a RB Leipzig kaka daya da rabi - amma sau daya ya buga wa kungiyar ta Jamus tamaula.

Carvalho ya fara taka leda a Fulham da cin kwallo 11 a wasa 40 a lik daga baya ya koma Liverpool kan £5m a Yulin 2022.

Zai fara buga wa Hull City wasa daga ranar Juma'a a karawar da za ta karbi bakuncin Norwich City.

Kociyan Hull City, Liam Rosenior ya ce daukar Carvalho da ya yi, zai taimakawa kungiyar a wasannin da take buga wa a bana.