ગુજરાતમાં આ તારીખની આસપાસ ભારે વરસાદ પડી શકે, ક્યાં બની રહી છે સિસ્ટમ?

ગુજરાતમાં કેટલાક જિલ્લામાં પાછલા અમુક દિવસથી છૂટોછવાયો વરસાદ પડવાનો સિલસિલો યથાવત્ છે.

જોકે, થોડા દિવસથી વરસાદને કારણે વાતાવરણમાં પ્રસરેલી ઠંડક ઘણા જિલ્લાઓમાં જાણે ગાયબ થઈ ગઈ છે. અમદાવાદ સહિત રાજ્યના કેટલાક જિલ્લામાં બફારા અને તડકાને કારણે ગરમીનું જોર યથાવત્ રહ્યું હોય તેવો આભાસ થયો હતો.

અહીં નોંધનીય છે કે ભારતમાં 4 જૂનથી ચોમાસું બેસી ચૂક્યું છે, જે પ્રથમ કેરળમાં ઍૅન્ટ્રી પછી ભારતના અન્ય ભૂભાગો તરફ આગળ વધતું જઈ રહ્યું છે.

હવામાન વિભાગે ફરી એક વાર પોતાના તાજેતરના બુલેટિનમાં ભારતમાં ચોમાસાની આગેકૂચ અંગેની માહિતી અને રાજ્યમાં આગામી દિવસોમાં વરસાદ પડવાની સંભાવના અંગે આગાહી જાહેર કરી છે.

હવામાન વિભાગની આગાહી પ્રમાણે, 7 જૂનના રોજ છોટા ઉદેપુર, નર્મદા, સુરત, ડાંગ, તાપી, નવસારી, વલસાડ, અમરેલી, ભાવનગર અને ગીર સોમનાથમાં છૂટાંછવાયાં સ્થળોએ ગાજવીજ સાથે હળવાથી મધ્યમ વરસાદ પડવાની સંભાવના છે. આ ઉપરાંત બાકીના અન્ય જિલ્લાઓમાં હવામાન શુષ્ક રહેવાની આગાહી છે.

આ સિવાય 8 જૂનના રોજ ડાંગ, તાપી, નવસારી અને વલસાડ ખાતે છૂટાંછવાયાં સ્થળોએ ગાજવીજ સાથે હળવાથી મધ્યમ વરસાદ પડવાની સંભાવના છે. આ ઉપરાંત બાકીના અન્ય જિલ્લાઓમાં હવામાન શુષ્ક રહેવાની આગાહી છે.

બીબીસી માટે કલેક્ટિવ ન્યૂઝરૂમનું પ્રકાશન