ગુજરાત : હવામાન વિભાગે ક્યા વિસ્તારો માટે જાહેર કર્યું યલો ઍલર્ટ, આ અઠવાડિયામાં ક્યાં ભારેથી અતિભારે વરસાદ પડશે?

ગુજરાતમાં ચોમાસું પૂરબહારમાં જામ્યું છે. ગુજરાતના મોટા ભાગના જિલ્લામાં પાછલા બે દિવસથી વરસાદનું જોર જોવા મળી રહ્યું છે.

ક્યાંક ધીમી ધારે તો ક્યાંક ધોધમાર વરસાદ જોવા મળ્યો હતો.

અત્યાર સુધીના ઑવરઑલ વરસાદની વાત કરીએ તો, કચ્છ પ્રાંતમાં 411.40 મિલીમીટર જેટલો સિઝનનો વરસાદ નોંધાયો હતો. આ ઉપરાંત ઉત્તર ગુજરાતમાં 660 મિલીમીટર સરેરાશ વરસાદ નોંધાયો હતો.

ઇસ્ટ-સેન્ટ્રલ ઝોન- અમદાવાદ, ખેડા, આણંદ, વડોદરા, છોટા ઉદેપુર, પંચમહાલ, મહિસાગર, દાહોદ જિલ્લામાં 671. 72 મિલીમીટર, સૌરાષ્ટ્ર ઝોનમાં 627.94 મિલીમીટર જેટલો તો દક્ષિણ ગુજરાત ઝોનમાં 1352.11 મિલીમીટર જેટલો વરસાદ નોંધાયો છે. રાજ્યના કુલ 251 પૈકી 43 તાલુકામાં 1000 મિલીમીટરથી વધુ વરસાદ નોંંધાયો છે. રાજ્યમાં કુલ 769.71 મિલમીટર જેટલો વરસાદ નોંધાયો છે. ટકાવારીની રીતે રાજ્યમાં 87.28 ટકા જેટલો વરસાદ નોંધાયો છે.

હવે ચોમાસું પૂરું થવાને આશરે એક મહિના જેટલો જ સમય બાકી છે ત્યારે હવામાન વિભાગે આગામી દિવસોમાં ફરીથી રાજ્યમાં વરસાદ અંગેની આગાહી કરી છે.

ગુજરાતના સુરત અને સાબરકાંઠા જિલ્લાનાં છૂટાછવાયાં સ્થળોએ ખૂબ જ સારો એવો વરસાદ પડ્યો હતો. જ્યારે કે અરવલ્લી, ગાંધીનગર, દાહોદ, સાબરકાંઠા, છોટા ઉદેપુર અને તાપી જિલ્લાનાં છૂટાછવાયાં સ્થળોએ ભારે વરસાદ પડ્યો હતો.

સૌરાષ્ટ્રમાં થોડાં સ્થળોએ વરસાદ પડ્યો જ્યારે કે કચ્છમાં હવામાન શુષ્ક રહ્યું હતું.

ગુજરાતમાં આગામી દિવસોમાં હવામાન કેવું રહેશે?

રવિવારે દક્ષિણપૂર્વ મધ્ય પ્રદેશ અને આસપાસના વિસ્તારો પર ધીમા દબાણનો વિસ્તાર આજે સવારે 5-30 કલાકે ઓછો થયો હતો. જોકે, બાકી રહેલું ઉપલા હવાનું ચક્રવાતી પરિભ્રમણ વિદર્ભ અને આસપાસના વિસ્તાર પર છે. આજે સવારે 8-30 કલાકે તે જ પ્રદેશમાં છવાયેલું છે. જે દરિયાની સપાટીથી સરેરાશ 7.6 કિલોમીટર ઉપર અને ઊંચાઈ સાથે દક્ષિણપશ્ચિમ તરફ નમે છે.

ચોમાસાનો એક પ્રવાહ હવે બિકાનેર, કોટા, ગુના, દમોહ, પેંડારા રોડ, સંબલપુર, પુરી અને ત્યાંથી પૂર્વ-દક્ષિણપૂર્વ તરફ મધ્ય બંગાળની ખાડીમાંથી પસાર થાય છે.

તારીખ 29 ઑગષ્ટથી તારીખ 4 સપ્ટેમ્બર સુધી જોઈએ તો કેટલાક ભાગોમાં ભારે વરસાદની શક્યતાઓ પણ હવામાન વિભાગ દ્વારા વ્યક્ત કરવામાં આવી રહી છે.

30 ઑગસ્ટ, શનિવારે ગુજરાતમાં અરવલ્લી, ખેડા, આણંદ, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, નવસારી, વલસાડ અને દમણ, દાદરા અને નગરહવેલીમાં કેટલીક જગ્યાએ ભારે વરસાદ પડી શકે છે.

શનિવારે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ અને મહીસાગર, વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી અને દમણ, દાદરા અને નગરહવેલી, સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છમાં હળવો વરસાદ પડવાની આગાહી છે.

ક્યા ક્યા જિલ્લામાં વરસાદ પડી શકે છે?

31 ઑગસ્ટ, રવિવારે અરવલ્લી, પંચમહાલ, દાહોદ, મહીસાગર, છોટા ઉદેપુર, ભરૂચ, સુરત, નવસારી, વલસાડ અને દમણ, દાદરા અને નગર હવેલીમાં ભારે વરસાદ પડશે તેવી આગાહી હવામાન વિભાગે કરી છે.

રવિવારે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ અને મહીસાગરમાં હળવો વરસાદ પડી શકે છે.

આ ઉપરાંત વડોદરા, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી અને દમણ, દાદરા અને નગરહવેલી, સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છમાં હળવા વરસાદની આગાહી છે.

આગામી સપ્તાહ દરમિયાન ક્યાં કેટલો વરસાદ પડશે?

પહેલી સપ્ટેમ્બરે-સોમવારે ગુજરાતમાં મહેસાણા, સાબરકાંઠા, અરવલ્લી, ખેડા, આણંદ, પંચમહાલ, દાહોદ, મહીસાગર, વડોદરા, છોટા ઉદેપુર, નવસારી, વલસાડ જિલ્લા અને દમણ, દાદરા અને નગરહવેલીમાં કેટલીક જગ્યાએ ભારે વરસાદ પડશે તેવું હવામાન વિભાગ જણાવે છે.

બીજી સપ્ટેમ્બરે સાબરકાંઠા, અરવલ્લી, પંચમહાલ, દાહોદ, મહીસાગર, છોટા ઉદેપુર, નવસારી, વલસાડ, દમણ, દાદરા અને નગરહવેલીમાં કેટલીક જગ્યાએ ભારે વરસાદ પડી શકે છે.

તારીખ ત્રીજી સપ્ટેમ્બર અને ચોથી સપ્ટેમ્બર, અને પાંચમી સપ્ટેમ્બરના રોજ ત્રણ દિવસ દરમિયાન સવારના સાડા આઠ વાગ્યાથી ચોથી સપ્ટેમ્બર સવારના સાડા આઠ વાગ્યા સુધી બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, દાહોદ, મહિસાગર જેવા વિસ્તારો તેમજ દક્ષિણ ગુજરાત પ્રદેશના વડોદરા, નર્મદા, ભરુચ, સુરત, તાપી, વલસાડ જેવા વિસ્તારો, સૌરાષ્ટ્ર-કચ્છના તમામ જિલ્લાઓમાં સુરેન્દ્રનગર, રાજકોટ, જામનગર, પોરબંદર, જૂનાગઢ, ગીર સોમનાથ, અમરેલી, ભાવનગર, બોટાદ, મોરબી, દ્વારકા, કચ્છ અને દીવમાં મોટાભાગનાં સ્થળોએ હળવાથી મધ્યમ વરસાદ-ગાજવીજ સાથે સંભાવના છે.

આ દિવસે ભારેથી અતિભારે વરસાદની સંભાવના

તારીખ ત્રીજી સપ્ટેમ્બરના રોજ સુરત, તાપી અને નવસારીમાં છૂટાછવાયાં સ્થળોએ ભારેથી અતિભારે વરસાદની સંભાવના છે.

આ સિવાય ગુજરાતના અરવલ્લી, ખેડા, પંચમહાલ, મહિસાગર, નર્મદા, ભરુચ, ડાંગ વલસાડ અને દમણ અને દાદરા નગર હવેલીમાં છુટાછવાયાં સ્થળોએ ભારેથી અતિભારે વરસાદની સંભાવના છે.

તારીખ ચોથી સપ્ટેબરના રોજ ગુજરાત પ્રદેશના ડાંગ, નવસારી, વલસાડ, તાપી અને દમણ, દાદરા નગર હવેલી જેવા જિલ્લાઓમાં છૂટાછવાયાં સ્થળોએ ભારેથી અતિભારે વરસાદની સંભાવના છે

તેમજ ગુજરાત પ્રદેશના બનાસકાંઠા, પાટણ, છોટાઉદેપુર, નર્મદા, ભરુચ અને સુરત જિલ્લાઓમાં છૂટાછવાયાં સ્થળોએ અને સૌરાષ્ટ્ર-કચ્છ જિલ્લામાં અમરેલી અને ભાવનગર જિલ્લામાં ભારે વરસાદની સંભાવના છે.

હાલોલ, હિંમતનગર અને ઉમરેઠમાં ભારે વરસાદ

બીબીસી ગુજરાતીની પંચમહાલ જિલ્લાના સહયોગી દક્ષેશ શાહના જણાવ્યા પ્રમાણે પંચમહાલ જિલ્લામાં છેલ્લા 24 કલાકમાં ભયંકર વરસાદ પડ્યો છે.

હવામાન ખાતાની પ્રેસનોટ પ્રમાણે છેલ્લા 24 કલાકમાં હાલોલમાં 6.69 ઇંચ જેટલો વરસાદ પડ્યો છે.

વડોદરા-હાલોલ-ગોધરા રોડ પર પાણી ભરાઈ ગયાં છે. પાવાગઢ ડુંગર ગામ અને હાલોલ સોસાયટીમાં નીચાણવાળા વિસ્તારોમાં પાણી ભરાઈ ગયાં છે.

બીજી તરફ આણંદ જિલ્લાના ઉમરેઠમાં પણ સવારથી ધોધમાર વરસાદ પડી રહ્યો છે. બીબીસી સહયોગી નચિતેતા મહેતાના જણાવ્યા પ્રમાણે ચાર ઇંચ વરસાદને કારણે ઉમરેઠના લોકોનું જનજીવન અસ્તવ્યસ્ત થઈ ગયું છે.

અહીં ડાકોર-નડિયાદ રોડ પાસે પાણી ભરાઈ ગયાં છે. જેને કારણે ડાકોર જતા માર્ગ પર ટ્રાફિકજામનાં દૃશ્યો સર્જાયાં હતાં. ઉમરેઠના મુખ્ય બજારમાં આવેલી દૂકાનોમાં પણ પાણી ઘૂસી ગયાં હતાં.

બીબીસી સંવાદદાતા પરેશ પઢીયારે આપેલી માહિતી અનુસાર હિંમતનગર નજીક હુન્જ, બખોર, રામપુરા અને અન્ય ગ્રામીણ વિસ્તારોમાં ભારે વરસાદ પડ્યો હતો, જેના કારણે ગાંભોઈ-ભિલોડા સ્ટેટ હાઇવે પર બની રહેલા ઓવરબ્રિજ પાસેના ડાયવર્ઝન પર ફરી વળ્યું હતું.

આ કારણે પાંચ કાર અને એક બસ ફસાઈ ગઈ હતી, જેમાં 17 મુસાફરો ફસાયા હતા. જોકે, સ્થાનિક તંત્ર અને પોલીસે ઘટનાસ્થળે પહોંચીને દોરડાંની મદદથી તમામ લોકોને સુરક્ષિત રીતે બહાર કાઢ્યા હતા.

બીબીસી માટે કલેક્ટિવ ન્યૂઝરૂમનું પ્રકાશન