Urukiko rwo mu Busuwisi rwategetse ko Caster Semenya ashobora kurushanwa mu bagore

Caster Semenya ntabwo azakenera gufata imiti igabanya imisemburo ye ya kigabo ya testosterone kugira ngo akomeze kwitabira amarushanwa, nyuma yaho urukiko rwo mu Busuwisi rubaye ruhagaritse icyemezo gishya cy'impuzamashyirahamwe y'imikino ngororangingo ku isi (IAAF).

Semenya ufite umudali w'imikino Olempike mu gusiganwa metero 800, mu kwezi gushize kwa gatanu yatsinzwe mu kirego yari yagejeje mu rukiko nkemurampaka mu mikino (CAS) rukorera i Lausanne mu Busuwisi.

Icyo kirego cyari kijyanye n'ishyirwa mu bikorwa ry'icyemezo cy'impuzamashyirahamwe IAAF gisaba kugabanya ibipimo by'umusemburo wa kigabo wa testosterone ku bagore basiganwa mu kwiruka ku maguru.

Icyo cyemezo cyari kugira ingaruka ku bagore basiganwa guhera ku ntera ya metero 400 kugera kuri metero 1600.

Semenya yagize ati: "Nizeye ko bijyanye n'ubujurire bwanjye nzongera gushobora kwiruka mu bwisanzure".

"Ndashimira abacamanza bo mu Busuwisi kubera iki cyemezo".

Nyuma y'icyemezo cya CAS, uyu Munya-Afurika y'epfo w'imyaka 28 y'amavuko yari yagejeje ubujurire mu rukiko rw'ikirenga rw'Ubusuwisi, avuga ko acyeneye kurwana ku "burenganzira bw'ibanze bw'ikiremwa-muntu".

Umwunganizi we mu mategeko, Dr Dorothee Schramm, yagize ati: "Urukiko rwahaye ikaze kuba Caster Semenya yaba abaye akingiwe".

"Uru ni urubanza rw'ingenzi ruzagira ingaruka zikomeye ku burenganzira bwa muntu ku bagore bakina imikino ngororangingo".

Mu itangazo urukiko rw'ikirenga rw'Ubusuwisi rwagejeje kuri BBC, ruvuga ko "by'agateganyo cyane rwabaye rutegetse IAAF guhagarika ishyirwa mu bikorwa" ry'icyemezo gisaba kugabanya ibipimo by'umusemburo wa testosterone ku bagore basiganwa mu kwiruka ku maguru.