Tunisia yirukanye umutoza Lamouchi nyuma y'umukino umwe mu gikombe cy'isi

Tunisia yirukanye uwari umutoza mukuru w'ikipe y'igihugu y'umupira w'amaguru, Sabri Lamouchi, nyuma yuko iyo kipe itsinzwe mu mukino wayo wa mbere wo mu gikombe cy'isi cya 2026.

Suède yanyagiye Tunisia ibitego 5-1 mu mukino wo ku cyumweru wo mu itsinda F wabereye ku kibuga Estadio Monterrey, i Guadalupe, muri Mexique.

Amakuru yatangajwe nyuma y'uko gutsindwa yumvikanishije ko Lamouchi yahise yirukanwa, ariko abahaye amakuru BBC Sport bavuze ko uyu Mufaransa w'imyaka 54 yakoresheje imyitozyo ku wa mbere.

Ariko ishyirahamwe ry'umupira w'amaguru muri Tunisia ubu ryemeje ko kontaro ye yasheshwe "ku bwumvikane bw'impande zombi".

Umufaransa Hervé Renard wahoze atoza Maroc na Arabie Saoudite yagizwe umutoza mukuru w'iyo kipe kugeza iri rushanwa rirangiye.

Igenda rya Lamouchi risobanuye ko ari we mutoza wa mbere mu mateka y'igikombe cy'isi wirukanwe nyuma y'umukino umwe gusa.

Mu mwaka wa 1998, Tunisia yirukanye umutoza w'Umunya-Pologne Henryk Kasperczak nyuma y'uko ikipe y'igihugu ya Tunisia itangiye nabi mu mikino y'igikombe cy'isi cyo muri uwo mwaka, ikananirwa gutsinda n'umwe mu mikino ibiri yayo ibanza.

Umutoza w'Umunya-Koreya y'Epfo Cha Bum-Kun yirukanwe n'igihugu cye muri iryo rushanwa ryo muri uwo mwaka nyuma yo gutsindwa imikino ibiri ibanza.

Ni mu gihe umutoza w'Umunya-Espagne Julen Lopetegui na we yirukanwe n'ikipe y'igihugu cye habura iminsi ibiri ngo imikino y'igikombe cy'isi cyo mu 2018 itangire, nyuma yo kwemera kuba umutoza wa Real Madrid.

Ariko ubu bubaye ubwa mbere umutoza yirukanwe nyuma y'umukino umwe gusa mu gikombe cy'isi, ndetse ibi bishyize iherezo ku mezi atanu Lamouchi yari amaze atoza Tunisia.

Uwo wahoze atoza ikipe ya Nottingham Forest yo mu Bwongereza yari yagizwe umutoza wa Tunisia muri Mutarama (1) uyu mwaka, ubwo yasimburaga Umunya-Tunisia Sami Trabelsi, wirukanwe amaze gutsindwa na Mali mu mikino ya 1/8 cy'irangiza mu gikombe cy'Afurika cy'ibihugu.

Nyuma yo gutsindwa na Suède, Lamouchi yavuze ko uko gutsindwa byamubabaje.

Yagize ati: "Gutangira irushanwa utsindwa nabi gutya rwose biragoye."

"Twakoze amakosa menshi cyane, kandi iki si ikintu dushobora gukora. Turimo kwirasa mu kirenge, turimo kwibabaza."

Lamouchi yatsinze umukino umwe mu mikino itanu yatoje Tunisia, igitego 1-0 yatsinze Haïti mu mukino we wa mbere nk'umutoza wa Tunisia.

Mu mikino ibiri yo kwitegura igikombe cy'isi yabaye mbere yaho muri uku kwezi, Tunisia yatsinzwe na Autriche (Austria) igitego 1-0, nyuma iza kunyagirwa n'Ububiligi ibitego 5-0.

Tunisia izakina n'Ubuyapani n'Ubuholandi mu mikino isigaje yo mu itsinda F.