Laurent Koscielny yanenze umutoza Didier Deschamps, asezera mu ikipe y'Ubufaransa

Laurent Koscielny, myugariro w'Ubufaransa n'uw'ikipe ya Arsenal, yasezeye ku gukinira ikipe y'igihugu y'Ubufaransa nyuma yo kunenga umutoza w'Ubufaransa Didier Deschamps ku kuntu yamufashe ubwo yari ari koroherwa imvune.

Koscielny yavunitse agatsinsino mukino wa kimwe cya kabiri cya Europa League wo mu kwezi kwa gatanu, ndetse bituma adakinira Ubufaransa bwatwaye igikombe cy'isi cy'uyu mwaka wa 2018 cyabereye mu Burusiya.

Koscielny w'imyaka 33 y'amavuko, yavuze ko "abantu benshi bamutereranye" mu gihe atakinaga kubera imvune.

Yagize ati:

"Wumva ari nkaho umuntu agukubise ikintu mu irugu."

"Iyo umeze neza mu mikinire, ugira inshuti nyinshi. Igihe wavunitse... nyuma y'igihe runaka uribagirana."

"[Deschamps] yampamagaye rimwe ubwo nizihizaga isabukuru y'amavuko mu kwezi kwa cyenda. Usibye ubwo, nta bundi [yampamagaye]. Abantu benshi barantereranye. Si umutoza wenyine."

Mu mwaka ushize wa 2017, Koscielny yari yavuze ko ashaka gusezera ku gukinira ikipe y'igihugu y'Ubufaransa nyuma y'imikino y'igikombe cy'isi kandi yavuze ko kuba atarashoboye gukina imikino y'igikombe cy'isi ntacyo byahinduye kuri uwo mugambi we.

Ariko yavuze ko kuba atarashoboye kuba ari kumwe n'ikipe y'Ubufaransa ku mpeshyi ishize mu Burusiya bizahora ari "igihe cy'umwijima" mu mupira w'amaguru we.

Yatangiye gukinira Ubufaransa mu kwezi kwa cumi na kumwe mu mwaka wa 2011, akaba asezeye amaze kubukinira inshuro 51, zirimo no mu gikombe cy'isi cyo mu mwaka wa 2014 cyabereye muri Brezili.

Yaherukaga gukinira Ubufaransa mu kwezi kwa gatatu uyu mwaka, mu mukino wa gicuti bwatsinzemo Uburusiya ibitego 3-1.