Igitero cy'Uburusiya kuri stasiyo ya gariyamoshi cyishe abantu 25 – Ukraine

Ukraine ivuga ko igitero cy'ibisasu bya rokete cy'Uburusiya ahategerwa gariyamoshi cyishe abantu 25, ku munsi hari hashize amezi atandatu Uburusiya butangiye igitero cyabwo kuri iki gihugu.

Ukraine ivuga ko batanu mu bapfiriye muri icyo gitero mu mujyi wa Chaplyne wo mu burasirazuba bahiriye mu modoka kugeza bapfuye.

Abahungu babiri, uw'imyaka itandatu n'uw'imyaka 11, na bo bishwe.

Perezida wa Ukraine Volodymyr Zelensky yatangaje iby'icyo gitero mu nama y'akanama k'umutekano k'umuryango w'abibumbye (ONU/UN). Abandi bantu 31 bakomeretse.

Uburusiya bwavuze ko bwarashe kuri gariyamoshi ya gisirikare, bukica abasirikare ba Ukraine barenga 200.

Ukraine nta basirikare yavuze ko bapfiriye muri icyo gitero.

Zelensky yavuze ko yamenye iby'igitero cy'i Chaplyne, mu karere ka Dnipropetrovsk, ubwo yari arimo yitegura kugeza ijambo ku kanama k'umutekano ka ONU, yongeraho ati:

"Uku ni ko Uburusiya bwiteguye inama y'akanama k'umutekano ka UN".

"Ahicara abagenzi hane ubu harimo gushya... umubare w'abapfuye ushobora kwiyongera".

Mu kwezi kwa kane, igitero ku yindi stasiyo ya gariyamoshi cyishe abantu barenga 50.

Umunsi wo ku wa gatatu Ukraine yawumaze irimo kwizihiza imyaka 31 ishize ibonye ubwigenge.

Mbere, Zelensky yari yavuze ko Uburusiya bushobora kugira ikintu bukora cy'"ubugome" mu kudobya ibirori.

Mbere yaho, yashinje Uburusiya guhindura uruganda rw'ingufu kirimbuzi rwa Zaporizhzhia "akarere k'intambara" gateje ibyago kuri urwo ruganda no ku baturage b'Uburayi.

Yanashinje Uburusiya gushyira isi "ku nkeke y'amakuba y'ubumara [buvuye kuri urwo ruganda]".

Umunyamabanga mukuru wa ONU António Guterres yabwiye iyo nama k'akanama k'umutekano ko iyi "ntambara idafite ishingiro" ishobora gutuma abantu babarirwa muri za miliyoni baba mu bucyene bukabije, haba muri Ukraine n'ahandi ku isi.

Ahandi hamwe na hamwe ku isi, habayeho guterana mu mihanda kw'abashyigikiye Ukraine, mu kwizihiza umunsi w'ubwigenge bwayo wo ku itariki ya 24 y'ukwezi kwa munani.

Abategetsi bamwe bo ku isi na bo bifatanyije n'iki gihugu kiri mu ntambara, mu kwizihiza uwo munsi.

Minisitiri w'intebe w'Ubwongereza Boris Johnson yagaragaye mu murwa mukuru Kyiv mu ruzinduko rutari rwatangajwe mbere, mu kwereka Ukraine ko ayishyigikiye.

Yanatangaje ko Ubwongereza buyihaye indi mfashanyo ya gisirikare ifite agaciro ka miliyoni 54 z'amapawundi (angana na miliyari 66 uyavunje mu mafaranga y'u Rwanda).

Ariko ayo yabaye nk'apfukiranwe n'imfashanyo yatangajwe na Perezida w'Amerika Joe Biden, wavuze ko igihugu cye gihaye Ukraine indi mfashanyo ya gisirikare ifite agaciro ka miliyari 3 z'amadolari.

Ubutumwa bwo kwifatanya na Ukraine bwavuye mu bihugu bitandukanye ku isi: kuva muri Australia, Ubudage, Finland, Pologne (Poland), Turukiya n'ahandi.

I Vatican, Papa Francis yasabye ko haterwa "intambwe zifatika" mu gusoza iyi ntambara no kwirinda ibyago by'amakuba y'ingufu kirimbuzi avuye ku ruganda rwa Zaporizhzhia - rwa mbere mu bunini i Burayi.

Ariko mu mihanda y'i Kyiv, muri rusange hari hari ituze.

Ukraine yari yarabujije ko habaho guterana kw'abantu benshi kubera ubwoba ko Uburusiya bwashoboraga kwibasira aho abasivile bateraniye.

Ibyo byakurikiye kuburira kw'Amerika ku muturage wayo wese ngo ave muri Ukraine mbere y'iyo sabukuru y'ubwigenge bw'iki gihugu.