Ngaba abafana ba ruhago bahembwa $50,000 kugira ngo barebe imikino yose y'Igikombe cy'Isi

Igikombe cy'isi kiri kugenda gifata indi ntera, aho hateganyijwe imikino itandatu ku munsi kugeza ku mpera y'icyiciro cy'amatsinda. Ibyo bigatuma kuyireba bisa nk'akazi ka buri munsi.

Urebye uko ni ko bimeze kuri Kevin Akoto na Austin Franklin. Aba bafana bombi bari guhembwa buri umwe amadolari y'Amerika 50,000 (angana na miliyoni 73 FRW) kugira ngo barebe imikino yose uko ari 104 y'igikombe cy'isi.

BBC yaganiriye n'aba bafana b'umupira w'amaguru, hashize icyumweru kirenga batangiye akazi kabo ko kwitwa "Chief World Cup Watchers" ba Fox One (Abakurikira by'Umwihariko Igikombe cy'Isi ), kugira ngo harebwe uko byabagendekeye.

Biragoye kutabona icyumba cyihariye bubakiwe gikozwe mu birahure, giherereye hagati mu gace ka Times Square mu mujyi wa New York, aho abafana bashobora kubitegereza bari hanze. Icyo cyumba gifite intebe zo kuruhukiramo, intebe y'ifoteyi y'uruhu rw'ikigina ijyanye (isa) n'izo ntebe zindi, televiziyo ebyiri nini, ndetse n'ameza y'umukino wa foosball (ameza yo gukiniraho umupira w'amaguru ariko ugakinishwa intoki).

Kirimo kandi ibikoresho byose bya ruhago n'ibiryo bituma wiyumva nk'uri mu rugo rw'umufana nyawe.

Kevin yabwiye BBC ati: "Ni nk'icyifuzo cy'umusore w'imyaka 20, iyo wemerewe gushyiramo icyo ushaka cyose, nk'umufana wa ruhago, ni ibi wahitamo."

Kevin, ukora akazi ko guteka muri Florida, na Austin, ukora ibijyanye no kwamamaza kuri internet (influencer) ukomoka muri Philadelphia, batsinze abandi bantu ibihumbi bari bari guhatanira aka kazi. Aka kazi kabasaba kutareba gusa buri mukino, ahubwo no gukora inkuru n'ibirimo bigenewe abafana.

Nubwo hakiri ibyumweru byinshi imbere, bavuga ko barimo kugena ingufu bakoresha.

Kevin yagize ati: "Hari ubwo mba numva nananiwe, na Austin na we bimeze uko, bityo turimo kwiga uko twakomeza gukurikirana ibiba byose."

Austin na we arabihamya, akabigereranya n'inkambi yo mu mpeshyi, aho iminsi igenda ihurirana (igenda isa, gutandukanya umunsi n'undi bikagorana).

"Ni urugendo rurerure cyane. Akazi ubwako ntikagoranye cyane, kuko nicara mu ntebe ndeba umupira ariko karananiza, ni yo mpamvu ngerageza kubona amasaha umunani yo gusinzira igihe cyose mbishoboye."

Ku bw'amahirwe, aka kazi ntikabasaba kurara muri cya cyumba cy'ikirahure kiri muri Times Square, bityo bashobora gutaha barangije akazi bakaruhuka mbere yo gutangira ak'umunsi ukurikiyeho.

Kugeza ubu, bamaze kubona ibihe by'amateka: barebye Lionel Messi aca agahigo ko gutsinda ibitego byinshi mu mateka y'igikombe cy'isi, icyo gihe bari bari kurya ibyokeje (barbecue) byo muri Argentine. Indi nyungu y'aka kazi ni uko bagaburirwa amafunguro yo mu bihugu byitabiriye irushanwa.

Hagati y'imikino, bagize amahirwe yo guhura n'abafana benshi, urugero ni Abanya-Brésil ibihumbi bari buzuye muri Times Square. Aho hantu hakunze gusurwa n'abakerarugendo, hahindutse ahantu h'ingenzi ku bakurikirana igikombe cy'isi, harimo n'Abanya-Norvège bagaragaje imbyino yabo izwi nka 'Viking Row'.

Austin avuga ko igice akunda cyane ari uguhura n'abafana baturutse hirya no hino ku isi, bakaganira ku mupira w'amaguru, ku muco n'uburyo barimo kumenya ubuzima bwo muri Amerika.

Yagize ati: "Igice gitangaje kurusha ibindi ni ukuntu nibagirwa kenshi ko ndi muri Times Square kandi abantu baba bandeba. Hari igihe ndeba umukino iminota 10 cyangwa 15 nkawibandaho cyane, maze nkitegereza ku ruhande nkabona Kevin ndetse n'abantu benshi bagenda muri Times Square, ugasanga wibagiwe burundu aho uri."

Na ho se ku bijyanye n'ikipe baha amahirwe yo kwegukana igikombe?

Kevin ahamya ko Espagne izatwara igikombe cy'isi, nubwo we afana Amerika na Ghana bitewe n'inkomoko ye. Austin we yambara umwambaro w'ikipe ya Norvège, atari uko ayikomokamo, ahubwo bitewe n'imikinire yayo ndetse n'umukinnyi wayo Erling Haaland ukinira Manchester City.

Yagize ati: "Biroroshye kuvuga ko Espagne cyangwa Ubufaransa bishobora gutsinda, ariko mbona Norvège iri hafi cyane. Niba ibintu bibahiriye, rwose bashobora no kwegukana igikombe."

Ariko abafana ntibavuga rumwe ku kuba bakwifuza gukora ako kazi.

Umufana wa Norvège, Eimund Liland w'imyaka 52, hamwe n'umukobwa we Camille w'imyaka 15, bavuga ko kureba imikino yose uko ari 104 nta bwisanzure ufite bishobora ku kubera byinshi cyane.

Undi witwa Matthew Mendez w'imyaka 18 yabwiye BBC ko gukurikirana igikombe cy'isi uri kumwe n'inshuti cyangwa umuryango ari byo byiza kurushaho.

Ariko Miguel Sanchez w'imyaka 20 we ntashobora kwiyumvisha amahirwe bagize.

Ati: "Uti ngo iki? Biruta no kujyayo [ku kibuga] wowe ubwawe. Guhabwa amafaranga ureba igikombe cy'isi, ni ibintu birenze, birarenze rwose."