Umugore yirukanywe muri komine aregwa ‘gutwara abagabo b’abandi’ atabarwa na buramatari w'Intara

Umukuru w’intara ya Muyinga mu majyaruguru ashyira uburasirazuba bw’u Burundi yahagaritse icyemezo cy’imwe muri komine zaho ya Butihinda cyo kwirukana ikubagahu muri iyo komine umugore abandi bashinja ko abatwarira abagabo.

Ku mbuga nkoranyambaga ibaruwa iriho umukono wa Gilbert Ndikumasabo, umukuru wa Komine Butihinda, yahererekanyijwe cyane kuva mu gitondo cya none kuwa kane.

Iyi baruwa itegeka umukuru w’umutumba wa Kamaramagambo aho abo bagore batuye, kubahiriza icyemezo cyo kwirukana uwo mugore, uvuka mu ntara ya Karusi ituranye na Muyinga, akava muri iyi komine bitarenze ejo kuwa gatanu.

Ndikumasabo avuga ko iki cyemezo cyafashwe nyuma y’uko aregewe n’abandi bagore bo kuri uwo mutumba ko uwo bashinja “abatwara abagabo”, uyu mutegetsi akavuga ko basanze uwo mugore “afite intego yo gusenya ingo z’abubakanye”.

Umugore watangajwe mu ibaruwa ya komine ntacyo aravuga kumugaragaro kubyo ubutegetsi buvuga ko yashinjwe na bagenzi be.

Ku mbuga nkoranyambaga benshi banenze iki cyemezo cya Komine Butihinda ko kidakurikije amategeko, abandi bagishima bavuga ko ibyo uwo mugore ashinjwa ari ikibazo gikomeye muri iki gihe.

Kuri Twitter, Intara ya Muyinga yatangaje ko icyemezo cyo kwirukana uwo mugore muri Komine “kitubahirije amategeko” bityo umukuru w’intara “agikuyeho kuva uyu munsi” .

Mu mezi ashize Mme Angeline Ndayubaha Ndayishimiye, umugore wa perezida w’u Burundi, yatangaje ko bamagana abagore badafite abagabo basenya ingo z’abandi.

Ntibizwi neza niba umuyobozi wa Komine Butihinda yari yafashe icyo cyemezo muri uwo muhate.