Dick Cheney wabaye Visi Perezida w'Amerika yapfuye ku myaka 84

Dick Cheney wabaye Visi Perezida w'Amerika yapfuye ku myaka 84.

Umuryango we wavuze ko Cheney, wabaye Visi Perezida ubwo Amerika yari itegetswe na Perezida w'umurepubulikani George W Bush kuva mu mwaka wa 2001 kugeza mu 2009, yapfuye mu ijoro ryo ku wa mbere azize ibibazo biturutse ku ndwara y'umusonga, umutima n'imitsi.

Umuryango we wongeyeho uti: "Dick Cheney yari umugabo ukomeye kandi mwiza wigishije abana be n'abuzukuru be gukunda igihugu cyacu, no kubaho ubuzima bwa gitwari, icyubahiro, urukundo, ubugwaneza, no kurobesha urushundura."

Mu itangazo yasohoye, Perezida George W Bush yavuze ko urupfu rwa Cheney ari "igihombo ku gihugu n'akababaro ku nshuti ze", yongeraho ko yifatanyije n'umuryango we.

Mu myaka ya 1970, Cheney yabaye umukuru w'ibiro bya Perezida Gerald Ford. Nyuma yaho yamaze imyaka 10 ari Depite mu nteko ishingamategeko y'Amerika.

Yabaye umwe mu bacurabwenge b'"intambara yo kurwanya iterabwoba" nyuma y'ibitero byo muri Amerika byo ku itariki ya 11 Nzeri (9) mu mwaka wa 2001. Yanabaye mu ba mbere bashyigikiye igitero kiyobowe n'Amerika cyagabwe kuri Irake mu mwaka wa 2003.

Nyuma, Cheney yaje guhinduka umuntu unenga bikomeye ishyaka ry'abarepubulikani riyobowe na Perezida w'Amerika w'ubu, Donald Trump.