Trump avuga ko Canada ishaka 'inyungu' zo kuba ari leta y'Amerika mu gihe ibiganiro by'ubucuruzi byahagaze
Ahavuye isanamu, Reuters
- Umwanditsi, Nadine Yousif
- Igikorwa, Umunyamakuru mukuru kuri Canada
- Yakoze inkuru ari, uri i Toronto
- Yatangajwe
- Igihe co gusoma: iminota 3
Perezida w'Amerika Donald Trump yavuze ko Canada ishaka "inyungu zo kuba ari Leta, kandi itari yo", nyuma yuko ibiganiro by'ubucuruzi hagati y'ibihugu byombi binaniranye mu ijoro ryo ku wa gatanu.
Mu magambo ye ya mbere kuva ibyo biganiro bihagaze, bigatuma imisoro mishya ya 50% ishyirwa ku bicuruzwa binyuranye bya Canada, Trump yanavuze ko abahinzi b'Abanyamerika bamaze imyaka "basoreshwa Imisoro myinshi cyane" ku bicuruzwa byabo byinjira muri Canada.
Ibi bibaye nyuma yuko Minisitiri w'intebe wa Canada Mark Carney yise iyo misoro mishya "kubara nabi" kugamije "kudukomeretsa [kutubabaza] no kuducamo ibice".
Carney yemeje ko azihorera mu buryo bungana kuri iyo misoro ya Trump "idolari ku idolari" guhera ku itariki ya 8 Nzeri (9) uyu mwaka, harimo imisoro ku byuma (steel), ku biribwa n'ibinyobwa bikomoka ku mata no ku bikoresho byo mu nzu bikoreshwa n'amashanyarazi hamwe n'ibya elegitoronike (electronics) by'Amerika. Yavuze ko Canada n'Amerika ubu biri mu "ntambara" y'ubucuruzi.
Ku wa gatandatu, Carney yagize ati: "Basabye byinshi cyane kandi batanze bicye cyane." Yongeyeho ati: "Uba uri mu ntambara iyo utewe. Twatewe."
Amagambo mashya ya Trump yunze mu byo yakomeje gukomozaho kuva yongeye kugera ku butegetsi byo kugira Canada "leta ya 51" y'Amerika, byateje uburakari mu bategetsi bo muri Canada no mu baturage bayo.
Inanirana ry'ibyo biganiro by'ubucuruzi ryahinduye burundu umubano wimbitse w'ubucuruzi hagati y'ibihugu byombi, ubu nta nzira isobanutse neza igaragara yo kugera ku bwumvikane.
Carney yagize ati: "Ntidushobora kwemera ibyo batanze, kandi ntituzatanga ibyo basabye."
Mbere yaho muri iki cyumweru, ibihugu byombi byari bifite icyizere cyo kugera ku masezerano, ariko ibiganiro byananiranye nyuma yuko impande zombi zishinjanye gukora impinduka zo ku munota wa nyuma.
Imisoro mishya ya 50% ireba ibicuruzwa binyuranye Canada yohereza muri Amerika, ikaba yiyongereye ku misoro yari isanzweho ku byuma, 'aluminium', imodoka n'imbaho za Canada.
Mu ngano, iyo misoro ni micye, ikaba ireba ibicuruzwa Canada yohereza muri Amerika by'agaciro ka miliyari hafi 20 z'amadolari y'Amerika, cyangwa hafi 5% k'ibicuruzwa yoherezayo byose hamwe, birimo divayi, ibiribwa n'ibinyobwa bikomoka ku mata, sima, imyenda n'ibikoresho byo mu mukino wa 'hockey'.
Minisitiri w'intebe yavuze ko Canada irimo kwihorera yigononwa kugira ngo irengere inyungu zayo. Yavuze ko amakuru arambuye ku ngamba zayo zo guhangana n'iyo misoro y'Amerika azatangazwa mu minsi iri imbere.
