Coolio waririmbye Gangsta’s Paradise yapfuye ku myaka 59
Ahavuye isanamu, Getty Images
Coolio, umuhanzi w'injyana ya rap wo muri Amerika uzwi cyane kubera indirimbo ye ‘Gangsta’s Paradise’ yamamaye cyane, yapfuye ku myaka 59.
Jarez Posey uhagarariye inyungu ze yabwiye ibinyamakuru muri Amerika ko bamusanze atagihumeka ari hasi mu bwogero bw’inzu y’inshuti ye i Los Angeles.
Coolio yatangiye gukora muzika mu myaka ya za 1980, ariko yashimangiye izina rye mu mateka ya hip hop ubwo yakoraga indirimbo Gangsta's Paradise mu 1995.
Impamvu nyakuri y’urupfu rwe rwabaye kuwa gatatu ntabwo iratangazwa.
Gusa Jarez Posey yabwiye ikinyamakuru TMZ, cyatangaje iyi nkuru mbere, ko abafasha b’abaganga bakeka ko yaba yagize guhagarara k’umutima.
Coolio, izina rye nyakuri ni Artis Leon Ivey Jr, yatwaye igihembo cya Grammy kubera Gangsta's Paradise, yakoreshejwe nk’injyana ivugira inyuma muri filimi ‘Dangerous Minds’.
Iyi nkuru irimwo ivyatanzwe na Google YouTube. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha Google YouTube amategeko agenga cookie n'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya YouTube ubutumwa
Iyi ndirimbo iracyakomeje kumvwa henshi ku isi, ndetse kuri Spotify yarengeje kumvwa ishuro miliyari imwe, nk’uko byanditse ku rubuga rwa Coolio.
Mu rugendo rwa muzika rw’imyaka igera kuri 40 yakoze album umunani, atsindira igihembo cya American Music Award na bitatu bya MTV Video Music Awards.
Izindi ndirimbo ze zakunzwe zirimo Fantastic Voyage, Rollin' With My Homies, 1, 2, 3, 4 (Sumpin' New), na Too Hot.
Yari agikora muzika kugeza ku rupfu rwe – apfuye mu gihe we n’abandi bahanzi bamamaye mu myaka ya za 1990 bari bageze hagati mu bitaramo bakoreraga ahatandukanye.
Mu minsi micye ishize, we n’abahanzi nka Vanilla Ice na Young MC bakoze igitaramo muri Texas.
Kuri Twitter, Vanilla yanditse ati: “Birandenze kumva ko inshuti yanjye nziza Coolio yapfuye”.
Snoop Dogg we yasobanuye ko Coolio mu ndirimbo ye yamamaye, arandika ati: "Gangstas paradise. R I P."
Yatangaje kandi ifoto bari kumwe ubwo batunganyaga amashusho y’indirimbo Gangsta Walk bakoranye mu 2006.
Iyi nkuru irimwo ivyatanzwe na Instagram. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha Instagram amategeko agenga cookie n'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya Instagram ubutumwa
Umuraperi (rapper) mugenzi we Ice Cube yagize ati: “Iyi ni inkuru ibabaje. Niboneye neza uyu mugabo azamuka ku gasongero muri muzika.”
Naho umuhanzi MC Hammer yavuze ko Coolio yari “umwe mu bantu beza cyane namenye”.
Yatangaje kandi ifoto bari kumwe, iriho na Tupac hamwe na Snoop Dogg.
