Kherson: Ukraine iri gukaza igitero cyo kwisubiza uyu mujyi – abasirikare bo mu burengerazuba

Ibikorwa bya Ukraine byo kwisubiza akarere ka Kherson kigaruriwe n'Uburusiya "birimo gutera intambwe", nkuko bivugwa n'abasirikare bo mu burengerazuba (Uburayi n'Amerika).

Iteme rikomeye ryerekeza mu mujyi wa Kherson byabaye ngombwa ko rifungwa nyuma yo kwangizwa n'ibisasu bya rokete bya Ukraine birasa mu ntera ndende, mbere byatanzwe n'Amerika.

Bivuze ko abasirikare b'Uburusiya babarirwa mu bihumbi ubu bari mu byago byo gusigara ukwabo ntibashobore kugera mu kindi gice cy'aka karere bigaruriye.

Uyu mujyi uri mu burengerazuba bw'umugezi wa Dnipro, ni wo wabaye uwa mbere wigaruriwe n'abasirikare b'Uburusiya muri iyi ntambara.

Abasirikare ba Ukraine ku wa kabiri barashe ku iteme rya Antonivskiy ry'i Kherson bakoresheje ubwirinzi bw'ibisasu biremereye bya rokete buzwi nka HIMARS (High Mobility Artillery Rocket System). Abasirikare bo mu bihugu byo mu burengerazuba bavuze ko ibyo byatumye iryo teme risigara "ridakoreshwa na gato".

Igice cyangiritse ni cyo gisigaye gusa kuri iryo teme rya metero 800. Ni rimwe mu nzira ebyiri zo ku mugezi wa Dnipro, ubu zombi zarashweho.

Uburusiya bwashingiraga kuri izo nzira kugira ngo bushobore kongera abasirikare n'ibikoresho ku ngabo zabwo ziri mu burengerazuba bw'uwo mugezi, none ubu bari mu byago byo gusigara ukwa bonyine batari hamwe n'abandi basirikare b'Uburusiya bigaruriye aka karere.

Abasirikare batanze amakuru bo mu bihugu by'uburengerazuba bavuze ko Kherson ari ho "hafi cyane muri politiki Uburusiya bwageze heza cyane ku ikamba ryabwo ryo kwigarurira" Ukraine - kandi ko kuyitakaza, ni ko bavuga, "byabangamira bikomeye amagerageza y'Uburusiya yo kugaragaza ko uku kwigarurira kwageze ku ntego".

Ku wa gatatu nimugoroba, Oleksiy Danilov, umunyamabanga w'akanama k'umutekano ka Ukraine, yavuze ko Uburusiya ubu "burimo kwerekeza umubare munini cyane ushoboka w'abasirikare mu cyerekezo cya Kherson".

BBC ntiyashoboye kugenzura mu buryo bwigenga ibyo uwo mutegetsi yavuze.

Ahandi mu karere ka Donetsk ko mu burasirazuba bwa Ukraine, abasirikare b'Uburusiya bavuze ko bafashe stasiyo ya kabiri mu bunini y'amashanyarazi (umuyagankuba mu Kirundi) muri Ukraine - iyi ni stasiyo ya Vuhlehirsk itanga amashanyarazi avuye mu makara.

Muri Kherson, abategetsi bashyizweho n'Uburusiya bemeje ko igitero cy'intwaro za rutura cya Ukraine cyangije bikomeye iteme rya Antonivskiy, bituma kurikoresha bihagarara.

Avugana n'ibiro ntaramakuru RIA bya leta y'Uburusiya, umutegetsi wungirije w'uyu mujyi, Kirill Stremousov, yavuze ko amato (ubwato) matoya ari yo ubu agiye kujya akoreshwa mu gutuma hakomeza kubaho guhura kw'abo hakurya y'umugezi wa Dnipro n'abo mu kindi gice gisigaye cyigaruriwe n'Uburusiya.

Hashize iminsi igisirikare cya Ukraine cyibasira amateme gikoresheje ibisasu bya rokete bihamya cyane kurushaho cyahawe n'Amerika.

Nkuko bivugwa n'abasirikare b'i Burayi n'Amerika, iki gitero kiri mu gikorwa cya Ukraine cyo kugarukana (kwigaranzura) abasirikare b'Uburusiya igatuma basigara bari ukwa bonyine, intego ari ukwisubiza ako karere.

Mu gihe cyaba kigenze neza, iki gikorwa kirimo kwigerezaho cyatuma Ukraine igira umuhate icyeneye cyane, ibinyujije mu kwambura Uburusiya agace k'ingenzi cyane k'abaturage bumaze gufata kugeza ubu kuva bwagaba igitero mu kwezi kwa kabiri - ari ko umujyi wa Kherson.

Uyu mujyi wo mu majyepfo ya Ukraine, wari utuwe n'abaturage 290,000 mbere y'intambara, ubu utegekwa n'abategetsi bashyigikiwe n'Uburusiya, nyuma yo kwigarurirwa n'abasirikare b'Uburusiya mu ntangiriro y'iyi ntambara.

Nkuko bitangazwa n'ibiro ntaramakuru TASS bya leta y'Uburusiya, abategetsi b'uyu mujyi bateye intambwe mu minsi ya vuba aha ishize muri gahunda yabo ya kamarampaka (referendum) yo kwiyomeka ku Burusiya ku mugaragaro - abategetsi bakaba barashyizeho akanama k'amatora mu kwitegura icyo gikorwa.

Amerika yashinje Uburusiya gutegura kwiyomekaho mu buryo bunyuranyije n'amategeko ibice bya Ukraine bwigaruriye.

Mu ijambo rye rya buri joro yavuze ku wa gatatu, Perezida Volodymyr Zelensky yasezeranyije ko Ukraine izageraho ikongera kubaka iteme rya Antonivskiy n'andi mateme yo mu karere ka Kherson.

Yagize ati: "Turimo gukora buri kintu cyose kugira ngo dutume ingabo zigaruriye [ibice] zitagira uburyo na bumwe bw'imikorere n'ibikoresho mu gihugu".

Mu minsi ya mbere y'iyi ntambara, ni bwo Uburusiya bwafashe Kherson nta mirwano ikomeye ibayeho.

Kandi icyo gihe kunanirwa kw'ubutasi bwa Ukraine ko gusenya amateme yo ku mugezi wa Dnipro, byemezwa ko mu cyumweru gishize kwatumye Zelensky yirukana Ivan Bakanov, wari umukuru w'urwego rw'ubutasi.