Ukraine - Russia: 'Imirwano y'amaraso' irimo kubera muri rwa ruganda Azovstal i Mariupol

Umunyamakuru wa BBC muri Ukraine avuga ko iyi ishobora kuba ari iminsi ya nyuma y'urugamba mu mujyi wa Mariupol.

Uruganda rw'ibyuma ruri ku cyambu ku nyanja ya Azov rwahindutse ikirango cyo kwihagararaho kwa Ukraine ku bitero by'Uburusiya, ariko bishobora kuba byegereye iherezo.

Mu gihe cy'ibyumweru, agace ka nyuma ko kwihagararaho kwa Mariupol kabaye uruganda ruri ku buso bwa 10 Km² rwa Azovstal.

Uruganda rufite imihora myinshi yo munsi y'ubutaka n'ibyumba by'imitamenwa byahungiyemo abasivile amagana, n'abarwanyi ba Ukraine.

Ingabo z'Uburusiya zakomeje kunanizwa kwinjira muri uru ruganda ariko nazo zikomeza kuharasa ibisasu ubudakuraho.

Mu minsi micye ishize, nyuma y'uruzinduko rwa Antonio Guterres wa ONU i Moscow, nibwo ingabo z'abarusiya zacururutse abasivile ba mbere basohorwa muri urwo ruganda.

Ubu ingabo z'abarusiya biravugwa ko zagabye igitero simusiga cy'abasirikare kuri uru ruganda ndetse no gukomeza kurasayo ibisasu bidahagaze.

Komanda w'ingabo za Ukraine zisigaye muri uru ruganda yavuze ko harimo kuba "imirwano y'amaraso ikomeye", mbere y'uko itumanaho n'abarimo ricika.

Mu butumwa bw'amashusho bwashyizwe kuri Telegram kuwa gatatu, komanda Denis Prokopenko yashimagije abasirikare be ku "umuhate urenze muntu" mu guhangana n'abarusiya, yongeraho ko ari "ibintu byari bigoye".

Ikigo Institute for the Study of War (ISW) cyatangaje ko ku nshuro ya mbere bishoboka ko ingabo z'abarusiya zabashije kwinjira muri uru ruganda.

Ni nyuma y'uko kuwa gatatu abasivile barenga 100 babashije kuvanwa muri uru ruganda bagahungishwa.

Mu ijoro ryo kuwa gatatu, Perezida Volodymyr Zelensky yavuganye kuri telephone na Antonio Guterres amusaba ko yafasha mu kurokora ubuzima bw'inkomere zikiri muri Azovstal.

Bivugwa ko abasivile bagera kuri 200 baba bakiri muri uru ruganda ubu rugeramiwe no gufatwa n'ingabo z'Uburusiya, maze Mariupol yose ikaba ifashwe.

Gufata uyu mujyi biha ingabo z'Uburusiya inzira y'ubutaka ibahuza n'umwigimbakirwa wa Crimea Uburusiya bwigaruriye mu 2014.