New Zealand: Amashuri agiye kujya atanga ku buntu ibikoresho by'isuku y'imihango

Amashuri yose yo muri New Zealand (Nouvelle-Zélande) guhera mu kwezi kwa gatandatu azatangira gutanga ku buntu ibikoresho by'isuku abagore n'abakobwa bifashisha mu mihango (cyangwa ubutinyanka mu Kirundi).

Ni muri gahunda yo guhangana n'ikibazo cy'abanyeshuri bamwe badafite ubushobozi bwo kwibonera ibyo bikoresho.

Abategetsi bahangayikishijwe n'uko abanyeshuri bamwe b'abakobwa basiba kujya ku ishuri kubera kubura ibyo bikoresho by'isuku.

Ni icyemezo gikurikiye igerageza ryagenze neza ry'iyo gahunda ryabaye mu mwaka ushize rigakorerwa mu mashuri 15.

Madamu Jacinda Ardern, Minisitiri w'intebe wa New Zealand, yagize ati: "Urubyiruko ntirukwiye kunanirwa kwiga bitewe n'ikintu gisanzwe mu buzima bwa kimwe cya kabiri cy'abaturage".

Madamu Ardern yavuze ko umuntu umwe mu rubyiruko muri buri bantu 12 yasibaga kujya ku ishuri kubera kubura ibikoresho by'isuku yo mu mihango, aho ab'amikoro macye baba badashobora kubona ibikwiye byo kwifashisha.

Kuri uyu wa kane, yavuze ko gutanga ibyo bikoresho by'isuku ari bumwe mu buryo leta ye ishobora guhangana n'ubukene, kongera umubare w'abitabira ishuri, no "guteza imbere imibereho myiza y'abana".

Guhera ubu kugeza mu mwaka wa 2024, iyi gahunda izatwara leta ya New Zealand agera kuri miliyoni 18 z'amadolari y'Amerika (arenga miliyari 17Frw).

Mu kwezi kwa 11/2020, Scotland (Écosse) yabaye iya mbere ku isi itanze ku buntu ibikoresho by'isuku yo mu mihango kuri "buri wese ubicyeneye", harimo no kubishyira ahantu hahurirwa n'abantu benshi.

Mu Bwongereza, mu mwaka ushize ibikoresho nk'ibyo by'isuku yo mu mihango byatanzwe ku buntu mu mashuri yose abanza n'ayisumbuye.

Za leta zimwe zo muri Amerika na zo zatoye amategeko ategeka ko bitangwa ku buntu mu mashuri.

Mu kwezi kwa 12/2019, leta y'u Rwanda yatangaje ko ibikoresho by'isuku y'imihango "bishyizwe ku rutonde rw'ibidacibwa imisoro ya VAT [TVA] kugira ngo byorohe kubibona".

Kugeza ubu abakenera ibi bikoresho bavuga ko ku giciro cyabyo nta kintu cyahindutse, umwaka ushize babwiye BBC ko "bategereje bihanganye kandi bababaye".