Covid-19: Afurika y'epfo igiye kongera gufungura imipaka

Afurika y'epfo ivuga ko ku wa mbere izongera gufungura imipaka 20 yo ku butaka yari yafunzwe mu kwezi gushize mu kugerageza guhagarika ikwirakwira ry'ubwandu bwa Covid-19.

Ni icyemezo cyafatiwe mu nama y'abaminisitiri ku wa gatandatu.

Afurika y'epfo yashegeshwe bikomeye n'inkubiri ya kabiri y'ubwandu bw'iki cyorezo bufitanye isano n'ubwoko bushya bw'iyi ndwara.

Imaze gutangaza abanduye Covid-19 bagera hafi kuri miliyoni 1,5, muri bo yishe abarenga 47,000 - ba mbere benshi yishe muri Afurika, nkuko imibare ya Kaminuza ya Johns Hopkins yo muri Amerika ibigaragaza.

Ku isi, abantu barenga miliyoni 108 batangajwe ko banduye coronavirus kuva yakwaduka mu mpera y'umwaka wa 2019, muri bo abarenga miliyoni 2,3 yarabishe, nkuko imibare ya Kaminuza ya Johns Hopkins ikomeza ibigaragaza.

Leta y'Afurika y'epfo yavuze iki nyirizina?

Ku wa gatandatu, leta yatangaje ko ahantu hatandukanye h'imipaka ihuza iki gihugu na Zimbabwe, Botswana, Mozambique, Namibia, Lesotho na Eswatini hagiye gufungurwa.

Aaron Motsoaledi, Minisitiri w'ubutegetsi bw'igihugu, yagize ati:

"Kugenzurana umuhate kandi mu buryo buboneye abantu banyura ku mipaka yacu ni igice cy'ingenzi cya gahunda rusange y'igihugu yo guhangana n'ibyago mu kurwanya ikwirakwira rya Covid-19".

Ariko uyu minisitiri yaburiye ko abantu bose bashaka kwambuka imipaka bagomba kwerekana icyemezo cyuko bapimwe ntibabasangemo Covid-19 kandi icyo cyemezo kikaba ari icy'ibipimo biherutse gufatwa mu gihe cya vuba.

Bwana Motsoaledi yavuze ko we ubwe azasura imipaka ine ikoreshwa cyane kurusha iyindi akirebera uko abagenzi bagenzurwa.

Ku itariki ya 11 y'ukwezi kwa mbere ni bwo Afurika y'epfo yafunze imipaka iyihuza n'ibihugu by'ibituranyi, nyuma yuko hatahuwe ubwoko bushya bwa Covid-19.

Kuva icyo gihe ibihugu bimwe byahagaritse ingendo zose ziva cyangwa zijya muri Afurika y'epfo.