Covid - Kigali: Guma mu rugo yarangiye, umumotari ati 'ubuzima buragarutse'

Yves Bucyana/BBC Gahuzamiryango i Kigali

Ibikorwa by'abantu ku giti cyabo byongeye gusubukurwa mu mujyi wa Kigali nyuma y'ibyumweru bitatu by'amategeko ya 'Guma mu rugo', umwe yabwiye BBC asa nuwiruhutsa ko yumva "ubuzima bugarutse".

Abashinzwe ubuzima bavuga ko muri iki gihe cya 'lockdown' ubwandu bushya n'abicwa na Covid-19 byagabanutse bigaragara mu mujyi wa Kigali no mu gihugu.

Mu gitondo cy'uyu munsi kuwa mbere imodoka zitwara abagenzi zongeye gutangira kunyuranamo n'amapikipiki, amaduka menshi nayo yafunguye, ubuzima buragaruka gahoro gahoro…

"Ubuzima ndabona bugarutse, si neza cyane kuko haracyari kare ariko kumara ibyumweru bitatu mu rugo ni 'danger'. Gusa kuba twasubiye mu kazi nyuma yo kudupimwa Covid ni byiza ndabyishimiye" - Umwe mu bamotari abwira BBC.

Abakora ubushabitsi bwo gutwara abagenzi mu modoka no kuri moto muri Kigali babanje gupimwa mbere yo gusubira muri iyo mirimo uyu munsi.

Minisiteri y'ubuzima ivuga ko abagera ku 8,000 bapimwe hagamijwe kureba uko uru rwego ruhura n'abantu benshi ruhageze.

Gusa ubuzima ntibuzasubira nka mbere vuba, amashuri, utubari, insengero, imyidagaduro, ibikorwa byose bihuza abantu, byose biracyafunze, kandi abantu kuva uyu munsi bagomba kugera mu ngo zabo bitarenze saa moya z'ijoro.

Ndetse ingendo hagati ya Kigali n'utundi turere zirabujijwe.

Dr Mpunga Tharcisse umunyamabanga wa leta muri Ministeri y'ubuzima yabwiye televiziyo ya leta ko muri ibi byumweru bitatu bishize imibare ya Covid-19 yagabanutse.

Yagize ati: "Abantu bandura bavuye kuri hafi 365 ku munsi tugeze hafi ku 150 mu gihugu hose, muri Kigali twavuye ku 197 hafi 200 tugeze kuri 50, 60, ibyo ni ikizere...

"Abari gupfa nabo bari kugabanuka mu minsi ishize twari hafi 10 ku munsi ubu tugeze kuri babiri batatu…"

Kuba gahunda ya guma mu rugo yarangiye mu mujyi wa Kigali ariko ngo ntibireba abafite Covid bari gukurikiranwa bari mu ngo, nk'uko minisitiri w'ubutegetsi bw'igihugu yabivuze.

Minisitiri Shyaka Anastase ati: "…Ejo utaza gusanga abantu barwariye mu rugo nabo bagiye ku isoko kugura ibishyimbo n'ibijumba, abo bagomba kuguma mu ngo."

Perezida Paul Kagame ejo yatangaje ko u Rwanda rwizeye kubona urukingo mu mpera z'uku kwezi, nubwo nabwo ngo 'rutazabuza abantu gukomeza kwirinda'.