Coronavirus: Abatega Emirates bazishingirwa Covid-19 ku buvuzi no gushyingurwa
Ahavuye isanamu, Getty Images
Emirates niyo kompanyi ya mbere mu zitwara abantu mu ndege yatangaje ko igiye guha abagenzi ubwishingizi ku buntu ku ndwara ya Covid-19, ni umuhate wo gushishikariza abantu kuyitega nanone.
Abagenzi bazaba bashinganye ku kuvurwa, gushyirwa muri hoteli mu kato, ndetse n'ibijyanye n' n'urupfu mu gihe bakwandura coronavirus bari ku rugendo n'iyi kompanyi.
Batangaje ibi mu gihe kompanyi nyinshi ku isi zazahajwe n'ingamba zo gukumira iki cyorezo ubu ziri kwitegura gusubukura ingendo zo gutwara abantu.
Rwandair, kompanyi ya leta y'u Rwanda, yaraye itangaje ko itegereje cyane ko abantu bagaruka kujyana nayo, yerekana uko abakozi bo mu ndege bazaba bambaye mu kwirinda no kurinda abagenzi.
Mu mpera z'ukwezi kwa kane, Rwandair yatangaje igabanya ry'imishahara y'abakozi bayo ku kigero kigera kuri 65%.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookie n'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Mu ntangiriro z'uku kwezi, Emirates, kompanyi ijya kure kurusha izindi ku isi, yabwiye BBC ko ifite gahunda yo kugabanya abakozi bagera ku 9,000.
Mu itangazo Emirates yasohoye, umukuru wayo Sheikh Ahmed bin Saeed Al Maktoum yagize ati:
"Tuzi ko abantu bashaka kugenda kuko imipaka ku isi iri kongera gufungurwa, ariko bakeneye koroherezwa no kwishingirwa mu gihe hari ikibaye kitateganyijwe mu rugendo rwabo".
Iyi kompanyi ivuga ko aya ubu bwishingizi, bufite agaciro mu gihe cy'iminsi 31 uhereye igihe umugenzi yafatiye urugendo, buzahita butangira gukora kugeza mu kwezi kwa cumi uyu mwaka.
Nta kiguzi gisabwa kuri ubwo bwishingizi kandi ntibwita ku kiciro cy'aho umugenzi yicaye mu ndege cyangwa aho agiye, ndetse buhabwa umugenzi wese atarinze kubwiyandikishamo.
Iyi kompanyi ifite ikicaro i Dubai, ivuga ko ubu bwishingizi buzavuza umuntu kugeza ku giciro cy'amadorari ya Amerika $176,500 (ni arenga miliyoni 176 mu mafaranga y'u Rwanda)
Buzishyura kandi igiciro cyo gushyirwa mu kato muri hotel, bibaye ngombwa, mu gihe cy'ibyumweru bibiri ku giciro cy'amadorari $117 ku munsi.
Mu gihe umugenzi yakwicwa na Covid-19 yanduriye mu rugendo rwabo, ubwishingizi buzahita butanga $1,700 yo gutegura ibyo kumushyingura.
Ubwoba bw'ingendo z'indege
Kuva mu kwezi kwa gatatu ingendo z'indege henshi ku isi zarahagaritswe mu gihe byabonekaga ko icyorezo gikwirakwira kurushaho kubera ingendo mpuzamahanga.
Mu kwezi gushize, ikigo mpuzamahanga cy'iby'ubwikorezi bwo mu kirere (IATA) cyavuze ko uyu mwaka wa 2020 ushobora kuzaba ariwo "mubi cyane" mu bukungu mu by'indege.
Biteganyijwe ko urwego rw'indege ku isi ruzahomba arenga miliyari $84 muri uyu mwaka, ibyo rwinjizaga bikazagabanukaho 50% ugereranyije na 2019.
Kompanyi ya Emirates mu byumweru bitatu bishize yabwiye BBC ko iteganya kugabanya abakozi 9,000, iyi kompanyi isanzwe ifite abakozi bagera ku 60,000.
Nibwo bwari ubwa mbere iyi kompanyi y'indege ivuze imirimo izagabanya.
