Perezida wa Bénin yategetse amaperereza ku ihohoterwa rishingiye ku gitsina mu banyamakuru b’abagore

Perezida Patrice Talon yategetse ko hakorwa amaperereza ku birego by'ihohoterwa rishingiye ku gitsina byatangajwe n'abanyamakuru babiri b'abagore.

Angéla Kpeidja ukorera radio na televiziyo y'igihugu izwi nka ORTB, na Pricile Kpogbeme, batangaje ibyo birego by'ihohoterwa babinyujije mu butumwa butandukanye kuri Facebook.

Ubutumwa bwa Madamu Kpeidja bwo ku itariki ya mbere y'uku kwezi bwamaganye "guceceka ugahebera urwaje" avuga ko birangwa mu banyamakuru b'abagore baba bakorewe ihohoterwa rishingiye ku gitsina.

Naho Madamu Kpogbeme we yizihije umunsi mpuzamahanga w'ubwisanzure bw'itangazamakuru, uba buri mwaka ku itariki ya gatatu y'ukwa gatanu, atangaza videwo ivuga ku ihohoterwa avuga ko yakorewe mu kazi.

Yavuze ko mu itangazamakuru ryo muri icyo gihugu abagore bafatwa nk'"ibikoresho byo gukoresha imibonano mpuzabitsina" .

Yongeyeho ko ubu nta kazi afite kuko yanze kubanza gukorana imibonano mpuzabitsina n'abakuru bo ku kazi babimusabaga mbere yuko bakamuha.

Perezida Talon yavuze ko yamaze gukorana inama n'abakuru ba radio na televiziyo y'igihugu - ORTB - ndetse ahura na Madamu Kpeidja, ategeka ko hakorwa amaperereza kuri ibyo birego.

Mu butumwa bwo kuri Facebook, Perezida Talon yagize ati:

"Namaze kwizera ko igikorwa cyakozwe na Madamu Angela Kpeidja kizaba intangiriro nshya yo gutuma abakorewe ihohoterwa rishingiye ku gitsina barindwa neza kurushaho mu gihugu cyacu".

Ubuyobozi bw'igitangazamakuru ORTB bwavuze ko "butaragezwaho ikirego na kimwe kijyanye n'ihohoterwa ryo mu bitekerezo cyangwa rishingiye ku gitsina cyangwa gufatwa ku ngufu ku bakozi b'abagore".

Ku mbuga nkoranyambaga, abo bagore babiri bashyigikiwe na bagenzi babo ku gikorwa bakoze cyo gutangaza ibyo birego.